Sil 39
39
1Ĩndĩ mũndũ ũla wĩnenganĩte kwĩmanyĩsya mĩao ya Ũla wĩ Ĩũlũ Mũno,
ethĩawa e kĩvathũkany'o.
Nũmanthaa ũĩ wa andũ ma tene,
na kũtũmĩa ĩvinda yake ayĩmanyĩsya mawathani.
2Nĩwiaa moneeni ma andũ me nguma,
na nĩwĩthĩawa esĩ nesa maũndũ ala mamanyĩĩtw'e na ngelekany'o.
3Nũmanthaa momanyĩsyo mavithe ala mamanyĩĩtw'e na nthimo,
na ndethĩawa na thĩna kũelesya momanyĩsyo mevithĩte ma ngelekany'o.
4Nũthũkũmaa andũ me nguma,
na kwĩkalany'a na atongoi;
nũendaa nthĩ sya ũeninĩ,
na kwĩmanyĩsya ũseo na ũthũku wa andũ.
5Nũvangaa kũamũka kĩoko tene,
akavoye Ngai ũla wamũmbie,
na kũmwĩsũva Ũla wĩ Ĩũlũ Mũno.
Nĩwathamasya kanyw'a wake,
na kũvoya aekewe naĩ syake.
6Ethĩwa nĩkw'o kwenda kwa Mwĩai ũla wĩ ũtonyi,
mũndũ ũsu akausũw'a veva wa ũmanyi,
nake akaneenaa ndeto sya ũĩ,
akavoyaa na kũmũtũngĩa Mwĩai mũvea.
7Mwĩai akamũtongoesya ethĩwe atonya kũtaa na kwĩthĩwa na ũmanyi,
yĩla ũkasũanĩa ĩũlũ wa syĩmbithĩ sya Mwĩai.
8Akoonany'a ũmanyi wake yĩla ũkũmanyĩsya,
na kwĩkathĩĩaa mĩaonĩ ya ũtianĩo wa Mwĩai.
9Aingĩ makakathĩĩa ũmanyi wake,
na maikolwa nĩ w'o.
Andũ maikolwa nĩ we,
akalilikanawa nĩ nzyawa syonthe ila ikoka.
10Andũ ma nthĩ ingĩ makawetaa ũĩ wake,
wũmbano wa andũ ũkawetaa nguma yake.
11Ethĩwa akekala thayũ mũasa,
akatia nguma nene mbee wa andũ aingĩ,
na o na akw'a akeethĩwa e mwĩanĩe.
Wathi wa Kũtaĩa Ngai
12Nĩna maũndũ angĩ nĩsũanĩĩte ngwenda kũneena,
nĩĩw'a mambusũĩte ki o tondũ mwei wusũaa ũkethĩwa wĩ mũima.
13Mbĩthukĩĩsyei inyw'ĩ syana ndĩkĩĩku,
na mũilaũka ta ĩlaa ya losi yĩmeete ũtee wa ũsĩ.
14Umyai mũuke mũseo ta wa ũvani,
na mũilaũka ta ĩlaa ya lili.
Nyaĩĩkyai mũuke mũseo, na mũyina wathi wa kũtaĩa,
mũkathei Mwĩai nũndũ wa mawĩa make onthe.
15Tavany'ai ũnene wa ĩsyĩtwa yake,
na mũimũtũngĩa mũvea kwa mbathi sya kũmũtaĩa.
Mwinĩei na mawasya menyu mũkũnĩte ngitaa nini,
inai mũyasya atĩĩ:
16“Maũndũ ala Mwĩai wĩkaa nĩ maseo mũno!
Na maũndũ onthe ala wĩaĩte nĩmekawa ĩvindanĩ yĩla ũtw'ĩte.”
17Ndũkaaneene wasye atĩĩ, “Kĩĩ nĩ kyaũ?” Kana, “Kũilyĩ ũu nĩkĩ?”
Nũndũ maũndũ ta asu makamanyĩka ĩvinda yĩla Ngai ũtw'ĩte.
Ngai nĩweeaĩie kĩw'ũ kyoombana kĩvumbu,
nĩwaneenie na syĩw'ũ syoombana vamwe.
18Yĩla waneena, kwenda kwake nĩkwĩanĩw'e,
vai mũndũ ũtonya kũola vinya wake wa kũtangĩĩa.
19Ethĩawa ene meko ma syũmbe syake syonthe,
vai ũndũ ũtonya kũvithwa ũkethĩa ndawene.
20Onaa kuma mwambĩlĩĩlyonĩ nginya mũminũkĩlyonĩ,
na vai kĩndũ kĩtonya kũmũseng'ya.
21Ndũkaaneene wasye atĩĩ, “Kĩĩ nĩ kyaũ?” Kana, “Kũilyĩ ũu nĩkĩ?”
Nũndũ kĩla kĩndũ kyũmbĩtwe kĩtũmĩawe wĩanĩ ũla wakyo.
22Ũathimo wake ũilyĩ ta kĩw'ũ kyusũĩte ũsĩ kĩkakĩla,
kĩla kĩnyithasya nthĩ nyũmũ ĩkakola.
23Ũthatu wake nũnyaaĩĩkasya andũ ma mbaĩ ingĩ,
o tondũ ũalyũlaa kĩw'ũ kĩseo kĩkamesya mũnyũ.
24Nzĩa syake syĩthĩawa syĩ ndũngalu kwa ala me na kĩkĩo kya Ngai,
ĩndĩ syĩthĩawa syĩ isiĩĩi kwa ala athũku.
25Kuma mwambĩlĩĩlyonĩ syĩndũ nzeo syoombĩiwe andũ ala aseo,
ĩndĩ syĩndũ nthũku syoombĩiwe eki ma naĩ.
26Syĩndũ ila syĩ vata mũno thayũnĩ wa mũndũ,
nĩ kĩw'ũ, mwaki, kyũma na mũnyũ,
mũtu wa nganũ, ĩia na ũkĩ wa nzũkĩ,
ndivai, mauta na ngũa.
27Kwa andũ aseo syĩndũ ii nĩ nzeo,
ĩndĩ kwa eki ma naĩ, syĩndũ ii ialyũkaa ikatw'ĩka ũthũku.
28Ngai oombie iseve imwe akanasye andũ nasyo,
na akaitw'ĩkĩthya mũnzyũ wa ũthatu wake;
mũthenya wa kũkany'a andũ syũkaa na vinya,
na kũusya ũthatu wa Mũmbi wasyo.
29Mwaki na mbua ya mavia, yũa na ũwau mũthũku,
syonthe syoombiwe ikanasye;
30maeo ma nyamũ mbai, ing'auĩ na nzoka,
na ũvyũ ũla ũkanasya andũ ala matamũkĩaa Ngai kwa kũmamina.
31Syĩndũ isu syonthe nitanaa kwĩanĩsya mĩao ya Mwĩai,
vaa ĩũlũ wa nthĩ syĩkalaa syĩyũmbanĩtye kũmũthũkũma,
na ĩvinda yavika iikalea kwĩanĩsya mĩao yake.
32Kwoou kuma mwambĩlĩĩlyonĩ nĩnĩthĩĩtwe ndiĩkĩĩa vyũ,
na nĩnĩsũanĩĩte mũno maũndũ asu na ngamaandĩka.
33Mawĩa ma Mwĩai onthe nĩ maseo,
nake nĩwĩanĩasya mavata onthe ma andũ ĩvinda yamo yeanĩa.
34Ndũkaaneene wasye atĩĩ, “Kĩndũ kĩĩ nĩ kĩthũku kwĩ kĩya,”
nũndũ kĩla kĩndũ kĩkamanyĩka ũseo wakyo ĩvindanĩ yakyo yĩla yaĩlĩte.
35Kwoou yu ina na ngoo yaku yonthe na wasya waku w'onthe,
na ũitaĩa ĩsyĩtwa ya Mwĩai!
Currently Selected:
Sil 39: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011