Sil 38
38
Ũwau na Ndakĩtalĩ
1Nengae ndakĩtalĩ ndaĩa ĩla yaĩlĩte nũndũ wa wĩa ũla ũtethasya,
nĩkwĩthĩwa oombiwe nĩ Mwĩai.
2Ũla wĩ Ĩũlũ Mũno nĩwe ũmũnengete ũtonyi wa kũvosya,
na mũsumbĩ nũnengae ndakĩtalĩ mũthĩnzĩo nũndũ wa ũu.
3Ũmanyi wa ndakĩtalĩ nũtumaa anengwa ndaĩa,
na nũkumaw'a e katĩ wa andũ me ndaĩa.
4Ngai oombie ndawa syonthe kuma mũthanganĩ,
na mũndũ ũla mũĩ ndakaivũthya.
5 #
Kuma 15.23-25
Ve ĩvinda mũtĩ wekiw'e kĩw'ũnĩ na watuma kĩsama mũyo,
nĩ kana vinya wa Ngai woneke.
6Ngai anengie andũ ũmanyi,
nĩ kana ataĩwe mawĩanĩ make ma ũseng'yo.
7Ndakĩtalĩ atũmĩaa ndawa isu kũvosya andũ na kũmina kyalya,
8mũndũ ũla ũseũvasya ndawa nĩwivulanasya.
Ngai ndaekaa kũtethya mawĩa make,
na kuma kwake andũ ma nthĩ yonthe nĩmakwataa ũima wa mwĩĩ.
9Mwana wakwa, yĩla wawaa ndũkavũthĩĩsye ũwau ũsu,
ĩndĩ mũvoye Mwĩai nake nũkũũvosya.
10Umbũla naĩ syaku na ũyĩkaa ũla ũlũngalu,
thesya ngoo ndĩkethĩwe na naĩ o na ĩmwe.
11Umĩsya Mwĩai nthembo yĩna mũuke mũseo,
na nthembo ya ũlilikany'o ya mũtu mũvinyu;
ĩtĩkĩsya nthembo yaku mauta maingĩ kwĩanana na ũndũ ũtonya kwona meana.
12Wamina kwĩka ũu, nenga ndakĩtalĩ mwanya,
nũndũ Mwĩai nĩwe wamũmbie;
ndũkaeke akũtie, nũndũ wĩ na vata nake.
13Mavinda amwe ndakĩtalĩ nĩsyĩthĩawa itonya kũvosya,
14nũndũ o nasyo nimũvoyaa Mwĩai,
aitonyethye kũiita mũndũ avoe,
na kũtangĩĩa thayũ wake.
15Mũndũ ũla ũmũvĩtĩasya Mũmbi wake,
aĩlĩte kũwaa nginya akatw'ĩka wa kũiitwa nĩ ndakĩtalĩ.
Kũĩĩa Mũndũ Mũkw'ũ
16 #
Sil 22.11-12
Mwana wakwa, ĩĩa mũndũ mũkw'ũ,
ũkĩlya wasya ũĩe wonany'e kana wĩ na kyeva.
Thika mwĩĩ wake na ndaĩa ĩla yaĩlĩte,
ndũkalee kũthi mathikonĩ make.
17Ĩa kĩĩo kĩ woo wĩyumĩtye vyũ,
ĩa kĩĩo kĩmwĩanĩe ũla mũkw'ũ,
mũĩĩe mũthenya ũmwe kana ĩlĩ ndũkese kũneenewa nĩ andũ,
na ĩndĩ ĩtina wa ũu kiakiw'a nũndũ wa kyeva kyaku.
18Nũndũ kyeva nĩkĩtonya kũtuma mũndũ akw'a,
ngoo yĩna kyeva nĩtumaa mũndũ athela vinya.
19Andũ nĩmaendeeaa kwĩthĩwa na kyeva makw'ĩĩwa nĩ mwendwa woo,
ĩndĩ mayaĩlĩte kũeka kyeva kĩu kĩmatw'ĩkĩthye ngya.
20Ndũkaeke ngoo yaku yĩkale na kyeva,
vetanga kyeva na ũililikana mũminũkĩlyo wa thayũ waku.
21Ndũkolwe kana mũndũ akw'a ndatonya kũsyoka;
ndũtonya kũmũtethya ũla mũkw'ũ, ũkeeyĩka naĩ we mwene.
22Lilikana kĩkw'ũ kyake, nũndũ o naku ũkakw'a o ũu,
ũmũnthĩ nĩwe na ũnĩ nue.
23Mũndũ amina kũthikwa, mumye mosũanĩonĩ maku,
na ũyĩanĩwa thayũnĩ amina kũthi.
Mũandĩki Aisianĩw'a na Andũ ala Matethasya Wĩa wa Moko
24Mũandĩki eethĩwa na mwanya wa kũthũmũa nũkwataa ũĩ mwingĩ;
mũndũ ũla ũte na mawĩa maingĩ nũendeeaa kũĩva.
25Kũtonyeka ata mũndũ ũla ũĩmaa na mũlaũ akethĩwa e mũĩ,
ũla ũtanĩaa kũinga nzaũ na ndata,
ũla ũingaa ng'ombe aisũanĩa wĩa ũla ikũtethya,
ũla ũtanenaa ĩũlũ wa kĩndũ kĩngĩ eka indo?
26Ethĩawa aisũanĩa ĩũlũ wa mĩkao ĩla ũkũtema,
na mawĩoo ethĩawa ainenga moi syake ũĩthyo.
27Ũu nĩw'o kĩla mũndũ wĩ na ũmanyi wa kũseũvya syĩndũ,
na ũla wonanasya ũndũ syĩndũ ikũseũvw'a methĩawa mailyĩ,
ala mathũkũmaa mũthenya na ũtukũ.
Ala maseũvasya mĩulĩ ya kwĩkĩa ũvano,
mekalaa mavinda onthe maĩsũanĩa ũndũ matonya kũseũvya ũvano wĩ kĩvathũkany'o.
Methĩawa mayenda mũno kũseũvya mũvw'anano ũilyĩ ta wĩ thayũ,
na nĩmekalaa nthĩ kũkatuka mũno mayenda kũmina kĩla mekũseũvya.
28Now'o mũtwii wa syũma, ekalĩte kĩtuĩonĩ kyake wĩthĩawa ailyĩ:
Aisũanĩa ĩũlũ wa kĩndũ kĩla ũkũseũvya na kĩlungu kya kyũma,
nũvĩvaw'a nĩ mwaki ũsu akanyala,
na nũthĩnaw'a nĩ ũvyũvu wa ĩiko yake;
nĩwalĩkaw'a matũ nĩ makũna ma kĩiva,
na metho make methĩawa maketee vala ũkũkũna;
nĩwĩtw'ĩĩaa ngoonĩ yake kana aĩlĩte kũmina wĩa ũsu,
na nĩwĩkalaa nthĩ kũkatuka ayanakavya kĩla ũkũseũvya.
29O na mũmbi wa mbisũ ekala nthĩ wĩanĩ wake ethĩawa ailyĩ o ta ũu:
Athyũũaa ndĩa na maũũ make;
kĩla ĩvinda ethĩawa aisũanĩa mũno ĩũlũ wa wĩa wake,
na ũtalo wa syĩndũ ila ũkwenda kũmba.
30Nũkimaa yũmba na moko make,
na kũyĩvinyĩthya na maũũ make;
etw'ĩaa ngoonĩ yake kana nũkũtendesya syĩndũ isu amine,
nũthũkũmaa kũkatuka mũno aithesya ndumbĩa yake.
31Andũ aa onthe nĩmaĩkĩĩaa wĩa wa moko moo,
na kĩla ũmwe nĩwĩsĩ wĩa wake nesa.
32Mate vo ndũa ndĩtonya kwambĩĩwa,
na andũ maitonya kũthi vo kana kũtũa vo.
33Ĩndĩ o na vamwe na ũu mayĩthĩawa matalĩtwe nzamanĩ ya ndũa,
o na mayĩthĩawa me ataĩe katĩ wa andũ.
Mayĩkalĩlaa kĩvĩla makasilany'a andũ,
o na maieleawa nesa nĩ ũtw'ĩo wa ĩkoani.
34Maitonya kũelesya momanyĩsyo kana kũelesya ũtw'ĩo wa ĩkoani,
na mayĩthĩawa mesĩ kũtũmĩa nthimo.
35Ĩndĩ wĩa woo wĩ vata mũno nĩ kana andũ mekale thayũ mũseo ĩũlũ wa nthĩ,
na nĩmavoyaa nũndũ wa wĩa woo.
Currently Selected:
Sil 38: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011