Sil 33
33
1Mũndũ ũla ũkĩaa Mwĩai ndakakwatwa nĩ ũthũku,
ĩndĩ Mwĩai akamũtangĩĩaa kĩla ĩvinda akwatwa nĩ matatwa.
2Mũndũ mũĩ ndamenaa mĩao,
ĩndĩ mwangangany'a maũndũnĩ ma mĩao athingithangaw'a ta ĩsiwa yĩ itulumonĩ.
3 #
Kuma 28.30; Sil 45.10 Mũndũ ũla wĩ kĩlĩko nũĩkĩĩaa mĩao,
kwake mĩao nĩ ya kwĩkwatw'a ta ũtw'ĩo wa Ngai.
4Ĩyũmbanĩsye kĩla ũkũneena, naku ũkeethukĩĩw'a.
Ũtanamba kũsũngĩa ũndũ tũmĩaa kĩla wamanyĩiw'e.
5Ndia yĩsilasya ũndũ o ũmwe,
o tondũ ndĩa ya ĩkasya ĩthyũlũlũkaa o vandũ vamwe.
6Mũnyanya wĩ kĩvũthya nĩ ta mbalasi nũme,
ĩla yanasya o na ethĩwa ĩtũlĩtwe nũũ.
Kĩvathũkany'o kya Andũ
7Nĩkĩ mũthenya ũmwe wĩthĩawa wĩ mũseo mbee wa mũthenya ũngĩ,
o na kau syũa yĩla yĩmulĩkaa kĩla mũthenya mwakanĩ noyo yĩmwe?
8Mwĩai nĩwe watwie mĩthenya yĩthĩwe yĩ kĩvathũkany'o,
na nĩwe wanyuvie mavinda na mboka syĩ kĩvathũkany'o.
9Nĩwavathie mĩthenya ĩmwe kwĩthĩwa yĩ mĩtheu na ya vata,
na atia mĩthenya ĩla ĩngĩ ĩte mĩvathe.
10Andũ onthe maumie mũthanganĩ,
na o ta ũu Atamu oombiwe na kĩtoo.
11Ĩndĩ Mwĩai nũndũ wa ũĩ wake mwingĩ nĩwamavathũkanisye,
na anenga kĩla ũmwe wĩa wĩ kĩvathũkany'o.
12Nĩwaathimie amwe na amanenevya,
na athesya angĩ na amaia vakuvĩ nake.
Ĩndĩ nĩwaumanĩie angĩ na amanyivya,
na amavetanga wĩkalonĩ woo.
13O tondũ yũmba yĩ mokonĩ ma mũmbi wa mbisũ,
wũmbaa kĩla ũkwenda,
now'o andũ onthe me mokonĩ ma Mũmbi woo,
wĩkanaa namo ũndũ ũkwenda.
14Vala ve ũseo vayĩthĩawa ũthũku,
vala ve thayũ vayĩthĩawa kĩkw'ũ,
na vala ve naĩ vayĩthĩawa kĩkĩo kya Ngai.
15Sisya mawĩa onthe ma Ũla wĩ Ĩũlũ Mũno,
o ta ũu o namo methĩawa me kũndũ kwĩlĩ,
ũndũ ũmwe wĩthĩawa ũtailyĩ ũla ũngĩ.
16Nyie naĩ mũndũ wa mũthya kũsyaĩĩsya maũndũ asu,
nailyĩ ta mũndũ ũla ũkolanasya nzavivũ ĩtina wa akethi mamina kũketha, na kusũsya kĩvivĩo kyakwa,
17ĩndĩ Mwĩai nĩwangathimie naendeea nesa,
na nĩnausũisye kĩvivĩo kyakwa o ta mũndũ ũla ũkethaa nzavivũ.
18Lilikana kana ndyaatethya wĩa nĩtetheke nĩ nyioka,
ĩndĩ kwondũ wa onthe ala mendaa ũmanyĩsyo.
19Mbĩthukĩĩsyei inyw'ĩ anene ma andũ;
nenyu inyw'ĩ atongoi ma wũmbano teai matũ.
Ũseo wa Kwĩthĩwa na Ũthasyo
20Ĩvindanĩ yonthe ya thayũ waku,
ndũkaaĩtĩkĩle mwana waku, kĩveti kyaku, mwana-a-ĩthe waku, kana mũnyanyau ethĩwe e na ũtonyi ĩũlũ waku.
Ndũkanenge mũndũ ũngĩ ũthwii waku,
ndũkese kũsũanĩa ũndũ ũngĩ na ũyasya ũtũngĩwe.
21Ethĩwa wĩ o thayũ na no ũkũveva,
ndũketĩkĩle mũndũ ũngĩ ose mwanya waku.
22Nĩkwĩthĩwa nĩ kavaa syana syaku iikwĩtya ũtethyo,
kũte we ũisyĩkwatya ikũtetheesye.
23Ĩkaa maũndũ onthe nesa,
nĩ kana ndũkanange ndaĩa yaku.
24Ĩvinda yĩla wĩmina mĩthenya ya thayũ waku,
ũkilĩlye kũkw'a wĩaany'a ũthwii waku.
Ũndũ Ngombo Syaĩlĩte Kwĩkwa
25O tondũ ĩng'oi yaĩlĩte kũnengwa nyeki, wĩa na yĩikũnwa,
no w'o nayo ngombo yaĩlĩte kũnengwa lĩu, wĩa na ũkany'o.
26Nenga ngombo yaku wĩa, na nũũkwata ũthũmũo,
walea kũmĩnenga wĩa wa kũtethya, nĩkũmantha ũthasyo.
27O tondũ nyamũ yĩkĩawa ĩsoki nĩ kana yĩthĩwe yĩ mbĩwi,
now'o ngombo nthũku yovawa na syĩndũ na ĩithĩnw'a.
28Mĩnenge wĩa wa kũtethya, nĩ kana ndikekale mana,
29nĩkwĩthĩwa kwĩkala mana kũtumaa mũndũ alika mothũkunĩ maingĩ.
30Mĩnenge wĩa ũndũ yaĩlĩte kũnengwa,
na yalea kwĩw'a, myove na nyololo ndũmu.
Ndũkomĩsye mũndũ maũndũ mbee wa ũndũ vaĩlĩte,
na ndũkeke mũndũ ũndũ ũtaĩlĩte.
31Ethĩwa wĩ na ngombo o ĩmwe, mĩke ũndũ we mwene wenda wĩkwe,
nĩkwĩthĩwa ũmĩthooete na yuutĩa yaku.
Ethĩwa wĩ na ngombo o ĩmwe, ĩkala nayo ta mwana-a-ĩthe waku,
nũndũ ũkeethĩwa wĩ na vata nayo o tondũ wĩthĩawa na vata na thayũ waku.
32Wamĩka naĩ ĩkasemba ĩkũtie,
33naku ũkathi kũmĩmantha va?
Currently Selected:
Sil 33: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011