Sil 32
32
1Ethĩwa nĩwatw'ĩkĩthw'a mũnene wa mboka, ndũkenenevye,
ĩkala o ta ũmwe wa andũ ala me vau mbokanĩ.
Sũvĩa aeni na ĩndĩ ũyĩkala nthĩ.
2Wamina kũtethya mawĩa maku, ĩkala nthĩ vala waĩlĩte kwĩkala,
nĩ kana wĩtanĩthye vamwe na andũ ala angĩ,
na ũinengwa ĩlaa ya ndaĩa kwondũ wa ũtongoi waku mũseo.
3Ethĩwa wĩ mũkũũ mbee wa andũ ala angĩ neena nũndũ nĩwaĩlĩte kwĩka ũu,
ĩndĩ neena ndeto sya ũĩ na ndũkaũngamye wathi.
4Ethĩwa andũ nĩmaendee kũtanĩthw'a, ndũkaneene;
ndũkonany'e ũĩ waku ĩvindanĩ yĩtaĩlĩte.
5Wathi ũkwinwa mbokanĩ ya kũnyw'a ndivai,
nĩ ta mavia ma thooa mũnene metawa nganeti mombĩĩwe thaavunĩ.
6Wathi wĩ mũyo vamwe na kũnyw'a ndivai,
nĩ ta mavia ma thooa mũnene metawa emelandi mombĩĩwe thaavunĩ.
7Ethĩwa wĩ wa mũika, neena ethĩwa ve vata wa kũneena,
neena wakũlw'a ũneene, ĩndĩ ti mbee wa mavinda elĩ.
8Neena kwa ũkuvĩ; neena maũndũ maingĩ ũitũmĩa ndeto nini.
Onany'a kana nĩwĩsĩ maũndũ maingĩ, ĩndĩ ndũkwenda kũneena.
9Ndũkeyĩkalye ta wĩanene na andũ ala me ndaĩa yĩla wĩ katĩ woo,
na ndũkaneene yĩla mũndũ ũngĩ ũendee kũneena.
10O tondũ ũtisi ũsembaa mbee wa kĩtundumo,
now'o ndaĩa ĩtongoeasya mũndũ ũla wĩ na wĩnyivyo.
11Uma mbokanĩ ĩvindanĩ yĩla yaĩlĩte, na ndũkethĩwe wĩ wa mũthya kuma vo.
Ĩnũka mĩtũkĩ, na ndũketeelange.
12Ĩtanĩthye ũndũ ũkwenda wĩ vau,
ĩndĩ ndũkeke naĩ kwa kũneena na ngathĩĩo.
13Ĩndĩ ĩũlũ wa maũndũ onthe, taĩa Mũmbi waku,
ũla ũkũnengae syĩndũ syonthe ila nzeo.
Kwĩthĩwa na Kĩkĩo kya Ngai
14Mũndũ ũla ũmũkĩaa Mwĩai nĩwĩtĩkĩlaa ũkany'o wake,
na ala maamũkaa tene makamũmanthe nĩmakwataa ũathimo wake.
15Ũla wendaa kũmanya mĩao akamĩmanya nesa,
ĩndĩ mwangangany'a akaluluutĩkw'a nĩyo.
16Ala mamũkĩaa Mwĩai methĩawa na motw'ĩo maw'o,
na meko moo ma ũlũngalu matisatisaa ta kyeni.
17Mwĩki wa naĩ nũleaa ũkany'o,
na nũalyũlaa mĩao kwĩanana na wendi wake.
18Mũndũ wĩ kĩlĩko ndavũthasya woni wa mũndũ ũngĩ,
ĩndĩ mũndũ mũng'endu na wĩ ngathĩĩo ndakĩaa kĩndũ.
19Ndũkeke ũndũ o na wĩva ũtanamba kũsũanĩa mũno,
na wawĩka ndũkelile weeka ũu nĩkĩ.
20Ndũkesĩle nzĩanĩ yusũĩte mĩisyo,
na ndũkasyokee ĩvĩtyo kelĩ.
21Ndũkaaĩkĩĩe mũno nzĩa ndũngalu ila wĩsĩlaa,
22ĩndĩ ĩsũvĩe mũno nzĩa ĩla ũendaa nayo.
23Ĩsũvĩae maũndũnĩ onthe ala wĩkaa,
nũndũ kwĩka ũu nĩkwĩanĩsya mĩao.
24Mũndũ ũla wĩtĩkĩlaa mĩao nĩwĩanĩasya ũndũ ĩkwasya,
na ũla wĩkwatasya Mwĩai ndakethĩwa na wasyo.
Currently Selected:
Sil 32: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011