Sil 31
31
Mathĩna ala Maetawe nĩ Mbesa
1Kũlea kũkoma nũndũ wa ũthwii nĩkũtumaa mũndũ amosa,
na kwĩthĩwa na kĩũũyũ nũndũ wa ũthwii nĩkũtumaa mũndũ atakoma.
2Mũndũ eethĩwa na kĩũũyũ ũtukũ nĩkĩtumaa aĩwa nĩ too,
o tondũ ũwau mwingĩ ũtumaa mũndũ atakoma.
3Mũndũ mũthwii nũthũkũmaa mũno ũthwii wake ũendee kwongeleka,
na yĩla wathũmũa nĩwĩtanĩthasya na syĩndũ syake nzeo.
4Mũndũ ngya nũthũkũmaa mũno na aiendeea kũnyivĩwa,
na yĩla wathũmũa nũendeeaa kwĩthĩwa e na thĩna.
5Mũndũ ũla wendete mbesa ndesaa kwĩthĩwa ate na mavĩtyo,
na mũndũ ũla ũmanthaa mbesa mũno ikamwasya.
6Andũ aingĩ nĩmanangĩtwe nĩ mbesa,
na mo ene makakomana na wanangĩko ũsu.
7Mbesa nĩ mũteo kwa ala makusaw'a nĩsyo,
na kĩla ndia nĩtw'ĩkaa ngombo yasyo.
8Nĩ mũathime mũndũ mũthwii ũla wĩthĩawa ate na ĩvĩtyo,
na ũla ũtetĩkĩlaa atongoew'e nĩ mbesa.
9Nĩkũlya, ve mũndũ wa mũthemba ũsu nĩ kana tũmũkathĩĩe?
Nĩkwĩthĩwa nĩwĩkĩte maũndũ ma kũseng'ya katĩ wa andũ make.
10Nũũ ũla waatatwa na mbesa akethĩwa ate na ĩvĩtyo?
Ũndũ ũsu no ũtume ekathĩĩa.
Ũla weethĩiwe na ũtonyi wa kũvĩtya na alea kũvĩtya nũũ,
na eethĩwa na ũtonyi wa kwĩka naĩ na alea kũmĩka?
11Mũndũ wa mũthemba ũsu akaendeea nesa,
na kĩla mũndũ akaneena ĩũlũ wa ũlau wake.
Mwĩkalo ũla Waĩlĩte Mũndũ e Mbokanĩ
12Wathokw'a mbokanĩ ya mũndũ wĩ ndaĩa,
ndũkethĩwe na ĩtomo,
o na ndũkaneene wasye, “Vaa ve lĩu mwingĩ mũno!”
13Lilikana kana itho yĩ ĩtomo nĩ kĩndũ kĩthũku.
Kĩla kyoombiwe kĩ ĩtomo mbee wa itho nĩ kyaũ?
Nĩkyo kĩtumi yĩtaa methoi kĩla ĩvinda.
14Ndũkatambũũkye kw'oko wose syĩndũ syonthe ila wene,
na ndũkaluute ũla wĩ vakuvĩ naku wose lĩu.
15Manya kana ũndũ ũkwĩw'a now'o mũndũ ũla ũngĩ ũkwĩw'a,
na maũndũnĩ onthe ũisũanĩa ĩũlũ wa ala angĩ.
16Ya ta mũndũ kĩla kiĩtwe mbee waku,
na ndũkatanyuke na ĩtomo ndũkese kũmenwa.
17Ĩthĩwa wĩ wa mbee kũeka kũya, nĩ kana wonany'e mwĩkalo mũseo,
na ndũkekũthĩĩe lĩu, ndũkese kũthatya andũ.
18Ethĩwa ũilyĩ katĩ wa andũ aingĩ,
ndũkethĩwe wĩ wa mbee kwĩvũa lĩu.
19Lĩu mũnini wĩthĩawa wĩ mwĩanu kwa mũndũ ũla wĩ mwĩkalo mũseo,
na ndaemawa nĩ kũveva athi kũkoma.
20Mũndũ aya lĩu wĩanĩe akomaa nesa;
nũamũkaa tene, na ayĩw'a e mũthangaau.
Mũndũ ũla wĩ ĩtomo ndakomaa nesa,
na nũkwatawa nĩ ngoo na kũvũnĩwa.
21Ethĩwa nĩwaya lĩu mwingĩ mũno,
ũkĩla ũthi ũkatavĩke, na nũkwĩw'a nesa.
22Mwana wakwa, mbĩthukĩĩsye na ndũkalee ũndũ ngũkwĩa,
na mũminũkĩlyonĩ ũkatũnga mũvea nũndũ wa ndeto syakwa.
Mawĩanĩ maku onthe ĩthĩawa na kĩthito,
na ndũkakwatwa nĩ ũwau o na wĩva.
23Andũ nĩmakumasya mũndũ mũlau ũnenganae lĩu,
na ũkũsĩ woo ĩũlũ wa ũlau wake nĩ wa kũĩkĩĩwa.
24Andũ onthe ndũanĩ nĩmanyungunyĩasya nũndũ wa mũndũ mũtoonu ũtanenganae lĩu,
na ũkũsĩ woo ĩũlũ wa ũtoonu wake nĩ wa w'o.
25Ndũkende kwonany'a vinya waku kwa kũnyw'a ndivai,
nĩkwĩthĩwa ũthengi nũminĩte andũ aingĩ.
26O tondũ ĩiko yĩthimaa kyũma yĩla kyavĩvw'a na kyaindwa mwakinĩ,
now'o nayo ndivai ĩthimaa mathayũ ma andũ yĩla andũ me ngathĩĩo mekũkananĩa.
27Ndivai nĩ ta kĩw'ũ kya thayũ kwa andũ,
ethĩwa mũndũ nĩwanyw'a ĩla yĩanĩe.
Thayũ wĩthĩawa ũilyĩ ata vate ndivai?
Ndivai yoombiwe ĩtanĩthasye andũ.
28Ndivai ĩla yĩanĩe yanyuwa ĩvindanĩ yĩla yaĩlĩte,
nĩtanĩthasya ngoo na kũete mũyo thayũnĩ.
29Mũndũ anyw'a ndivai mbingĩ mũno nĩtumaa akwatwa nĩ woo thayũnĩ,
nũkwatawa nĩ ĩteta na ailuluutĩka.
30Ũnywi nĩwongeleelaa ũthatu wa ndia ĩkeyĩũmĩsya yo mwene,
nũolaa vinya wayo na kwongela maũũmĩsye.
31Ndũkakanĩsye mũtũi waku mwĩ mbokanĩ ya kũnyw'a ndivai,
na ndũkamũvũthĩĩsye yĩla ũendee kũtanĩa mboka.
Ndũkamũtavye ndeto o na ĩmwe ya kĩvũthya,
na ndũkamũthĩny'e kwa kũmwĩa aĩve makoani.
Currently Selected:
Sil 31: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011