Sil 30
30
Kũea Syana
1Ũla wendete mwana wake nũmũkanasya kĩla ĩvinda,
nĩ kana etanĩa ũndũ mwana ũsu wĩĩthĩwa ailyĩ eana.
2Ũla ũmanyĩasya mwana wake mwĩkalo mũseo akatethw'a nĩwe,
na akeekathĩĩa nũndũ wake e andũnĩ ala wĩsene namo.
3Ũla ũmanyĩasya mwana wake akatuma amaitha make makwatwa nĩ kĩwĩu,
na akeekathĩĩa nũndũ wa mwana ũsu e katĩ wa anyanyae.
4Yĩla ĩthe wake wĩkw'a ũkeethĩa no ta wĩ o thayũ,
nĩkwĩthĩwa atia mũndũ ũilyĩ take,
5ũla wasiasya e thayũ akatana,
na aikw'a amũsisya ndaĩ na kyeva.
6Ĩthe ethĩawa atia mũndũ ũla ũkaĩvanĩsya kũla kwĩ amaitha make,
na ũla ũkaĩva ũseo wa anyanyae make.
7Ũla wanangaa mwana wake akoova itau syake,
na kĩla ĩvinda mwana ũsu waĩa ĩthe akatelemaa.
8Mbalasi ĩtemanyĩsye nĩyĩthĩawa na ngũlũ,
na o ta ũu mwana ũtemũmanyĩsye mwĩkalo mũseo nũmeasya ngũlũ.
9Weesũva mwana mũno akakũtelemya;
wathaũka nake akatuma wĩthĩwa na kyeva.
10Ndũkatheke nake, ndũkese kũĩa vamwe nake,
na mũminũkĩlyonĩ ũivevetany'a maeo ũyĩlila.
11Ndũkamũnenge mwanya wa kwĩka ũndũ ũkwenda ĩvindanĩ ya wana wake,
na ndũkalee kũmũlũnga yĩla wavĩtya.
12Ĩvindanĩ ya wana wake, mũmanyĩsye kwĩthĩawa e mwĩwi,
na ũimũvũaa ĩvindanĩ ya wana wake.
Walea kwĩka ũu, akeethĩwa na ngũlũ na aieka ũkwĩw'a,
na kũtuma wĩthĩwa na kyeva nũndũ wake.
13Manyĩsya mwana waku mwĩkalo mũseo na kwĩthĩwa na wũmĩĩsyo,
nĩ kana ndakaakũthatye na meko make me nthoni.
Ũima wa Mwĩĩ
14Nĩ kavaa mũndũ kwĩthĩwa e ngya na e na ũima wa mwĩĩ na vinya,
kwĩ mũndũ kwĩthĩwa e mũthwii, na e na mathĩna manene ma mwĩĩ.
15Kwĩthĩwa na ũima wa mwĩĩ na vinya kwĩ vata mbee wa thaavu,
na mwĩĩ mũlũmu wĩ vata mbee wa kwĩthĩwa na ũthwii mwingĩ.
16Vai ũthwii mũseo kũte kwĩthĩwa na ũima wa mwĩĩ,
na vai ũtanu ũvĩtũkĩte kwĩthĩwa na mũyo ngoonĩ.
17Nĩ kavaa kũkw'a kũte kwĩkala thayũ wa thĩna,
na nĩ kavaa kũthũmũa tene na tene kũte kwĩthĩwa na ũwau ũtavoaa.
18Kũnenga lĩu mũseo mũndũ ũtatonya kũũya,
nĩ ũndũ ũmwe na nthembo ya lĩu yiĩtwe mbũanĩ.
19Ve vata mwaũ kũthembea ngai ya mũvw'anano?
Ngai ĩsu ndĩtonya kũya kana kũnyungĩa.
Ũu nĩw'o mũndũ ũla ũkũthĩnw'a nĩ Mwĩai wĩthĩawa ailyĩ.
20Mũndũ ũsu asiasya lĩu na kũluma,
o tondũ mũndũ mũvakũe ũlumaa akumbatĩlya mwĩĩtu.
Ũtanu na Kyeva
21Ndũketĩkĩle ũkwatwe nĩ kyeva,
na ndũkethĩny'e we mwene kwa ngenda.
22Ũtanu wa ngoo nĩw'o thayũ wa mũndũ,
na mũndũ kwĩthĩwa na ũtanu nĩkũtumaa ekala thayũ mũasa.
23Ĩtanĩthye na ũithũmũsya ngoo yaku,
ndũketĩkĩle wĩkale na kyeva,
nũndũ kyeva nĩkĩminĩte andũ aingĩ,
na vai ũtethyo kyeva kĩetae o na vanini.
24Kĩwĩu na ũthatu nikuvĩvasya thayũ,
na kĩũũyũ nĩkĩtumaa mũndũ akũa mĩtũkĩ.
25Mũndũ ũla wĩ ngoo nzeo na mũtanu,
ndaemawa nĩ lĩu na nĩwĩw'aa mũyo aiya.
Currently Selected:
Sil 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011