Sil 29
29
Kũkova na Kũĩva
1 #
Kuma 22.25; Ali 25.35-38 Mũndũ ũla wĩ tei nũkovethasya mũtũi wake,
kwa kũmũtetheesya mũtũi ethĩawa ayĩanĩsya mĩao.
2Kovethasya mũtũi waku ĩvindanĩ yĩla wĩ na vata,
na wakova mũtũi waku mũĩvae ũtekũmũselesya.
3Ĩanĩasya ndeto syaku na ũyĩthĩawa wĩ mũĩkĩĩku kwake,
na kĩla ĩvinda ũkakwataa kĩla ũkwenda.
4Andũ aingĩ masũanĩaa kĩndũ kya kũkova nĩ ta mũthĩnzĩo,
na maithĩny'a ala mamatetheeasya.
5Mũndũ nĩwĩsũvaa ũngĩ nginya akamũkovethya,
na ayĩnyivya yĩla ũkũneena ĩũlũ wa mbesa sya mũtũi wake;
ĩndĩ ĩvinda ya kũĩva yavika nũseleasya,
na kwathana kana nũkũĩva na ailea kwĩka ũu,
na kwasya kana ĩvinda yĩla ũnengetwe nĩ ĩkuvĩ.
6Ethĩwa mũndũ ũla ũkovethanĩtye nĩwaandũa na kĩthikii,
atũngĩwa nyusu, yĩu yĩthĩawa yĩ ĩvuso kwake.
Mũndũ ũsu ũkovethanĩtye alea kũandũa na kĩthikii,
ũla ũkovete ethĩawa amũvena mbesa syake, na kũmũtw'ĩkĩthya mũmaitha vate kĩtumi.
Mũndũ ũsu ũkovete amũĩvaa akĩmũumanĩa na kũmũumanga,
na vandũ va kũmũnenga ndaĩa amũĩvaa kĩvũthya.
7Kwoou nũndũ wa ũthũku wa mũthemba ũsu,
andũ aingĩ nĩmaleaa kũkovethany'a;
nĩmakĩaa maikavenwe vate kĩtumi.
Kwĩthĩwa na Ũlau
8Maũndũ asu me o vo, ũmĩanĩasya na mũndũ ũla ngya,
na ndũkamwĩkalasye eteelete ũtethyo waku.
9Tetheeasya ngya nũndũ mwĩao waĩtye ũu,
na nũndũ mũndũ ũsu ngya e na vata, ndũkamũeke athi ate na kĩndũ.
10Tũmĩaa mbesa syaku kũmũtethya mwana-a-ĩthe waku, kana mũnyanyau,
na ndũkaeke syanangwe nĩ nganga ũitumbĩte na ĩvia.
11Tũmĩaa ũthwii waku kwĩanana na ũndũ mĩao ya Ũla wĩ Ĩũlũ Mũno ĩkwasya,
na ũkakwata ũtandĩthyo mũnene mbee wa thaavu.
12Yĩla wanenga ngya ũtethyo wĩthĩawa ũyongeleela ũthwii waku,
na ũthwii ũsu ũkakũtangĩĩa ĩvindanĩ ya mathĩna maingĩ.
13Ũthwii ũsu ũkakũtangĩĩa o na mbee wa ngao ndũmu na ĩtumo ĩito;
ũkakũkitĩa kũla kwĩ amaitha maku.
Kũĩvĩa mũndũ Thiĩ alea Kũĩva
14Mũndũ mũseo nũĩkĩĩthasya kana akaĩvĩa mũtũi wake thiĩ alea kũĩva,
ĩndĩ mũndũ ũte nthoni nũleaa kwĩka ũu.
15Ndũkaaũlwe nĩ ũseo wa ũla ũĩkĩĩthasya kana nũkũĩva thiĩ walea kũĩva,
nĩkwĩthĩwa nũnenganĩte thayũ wake nũndũ waku.
16Mwĩki wa naĩ nĩwanangaa syĩndũ sya mũndũ ũla ũĩkĩĩthasya kana akamũĩvĩa thiĩ alea kũĩva,
17na mũndũ ũte mũvea nũtiaa ũla wamũtangĩĩie yĩla waĩ na thĩna.
18Kũĩkĩĩthya mũndũ kana ũkamũĩvĩa thiĩ wake alea kũĩva nĩkũminĩte andũ aingĩ me syĩndũ,
na nĩkũmathingithĩtye ta mekũthingithw'a nĩ itulumo sya ũkanga;
Nĩkũtumĩte andũ me ũtonyi makĩa makathi kwanganga nthĩ sya ũeninĩ.
19Mwĩki wa naĩ ũla wĩtĩkĩlaa kũĩkĩĩthya kana akaĩvĩa mũndũ ũngĩ thiĩ alea kũĩva aimantha ũtandĩthyo,
akalika makoaninĩ.
20Tetheesya mũtũi waku kwĩanana na ũtonyi waku,
ĩndĩ ũyĩsũvĩa ndũkese kũvalũka.
Mũndũ Kwĩkala Kweene
21Syĩndũ ila syĩ vata thayũnĩ nĩ kĩw'ũ, lĩu, ngũa,
na nyũmba ya kwĩkala wĩ ũsũvĩonĩ.
22Nĩ kavaa mũndũ e ngya ayĩkala nyũmbanĩ yake mwene o na ethĩwa nĩ nthũku,
kwĩ mũndũ kũĩĩa lĩu mũseo nyũmbanĩ kwa andũ angĩ.
23Ĩanĩwa nĩ kĩla wĩ nakyo o na ethĩwa nĩ kĩnini kana kingĩ,
na ndũkaneenewa naĩ nĩkwĩthĩwa ũtw'ĩkĩte mũeni wa andũ angĩ.
24Mũndũ wa kũtũũa kuma mũsyĩ ũmwe kũthi ũla ũngĩ ekalaa thayũ wa kyeva,
na mũndũ e mũeni vandũ ndethĩawa atonya kũneena kĩndũ.
25Ũkathokasya aeni, na kũmanenga syĩndũ sya kũnyw'a, na vai mũndũ ũkakũtũngĩa mũvea,
na kwongela ũu, ũkeew'aa maikũneenea ndeto nthũku ta ii:
26“We mũeni, ũka vaa, seũvya vala andũ mekũĩĩa lĩu,
na ethĩwa wĩ na kĩndũ kĩue ete vaa nĩye!
27We mũeni, uma nyũmbanĩ yakwa ũthi, nũndũ nĩ na mũeni wa ndaĩa wooka;
mwana-a-ia nĩwooka kũngethya, na nĩngwenda nyũmba yakwa ya aeni.”
28Maũndũ aa ma kũumwa nũndũ wa vala ũkũkoma,
na kwĩkĩĩthw'a nthoni nĩ ũla ũkũkovethetye,
me vinya mũno kũmĩĩw'a nĩ mũndũ ũkũsũanĩa nesa.
Currently Selected:
Sil 29: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011