Sil 28
28
1Mũndũ ũla ũĩvanĩasya o nake akaĩvanĩw'a nĩ Mwĩai,
na Mwĩai akaĩkĩĩthya kana mũndũ ũsu nĩwĩkĩte naĩ.
2 #
Mat 6.17; Mk 11.25 Ekea mũtũi waku ĩvĩtyo yĩla ũkũvĩtĩsye,
na ũkaekewa naĩ syaku yĩla wavoya.
3Nĩkũlya, mũndũ nũtonya kũendeea kũthatĩa ũngĩ,
na aivoya Mwĩai amũvosye?
4Ethĩwa ndatonya kwĩw'ĩa mũndũ ũla ũngĩ tei,
nĩkũlya, kwa w'o nĩwaĩlĩte kũvoya Mwĩai amũekee naĩ syake?
5Ethĩwa mũndũ nĩwĩkalaa athatĩe ũngĩ,
nũũ ũla wĩmumĩsya nthembo aekewe naĩ syake?
6Lilikana mũminũkĩlyo wa thayũ waku,
na ũieka kwĩthĩwa na ũmaitha.
Lilikana wanangĩko na kĩkw'ũ,
na ũyĩanĩsya mĩao.
7Lilikana mĩao na ndũkamũthatĩe mũtũi waku;
lilikana ũtianĩo wa Ũla wĩ Ĩũlũ Mũno,
na ndũkatalĩle mũtũi waku mavĩtyo.
Ngananĩo
8Ndũkalike ngananĩonĩ, na wĩĩthĩwa waolanga naĩ syaku,
nũndũ mũndũ ũla ũthataa nũtumaa ngananĩo syambĩĩa.
9Mũndũ ũla wĩkaa naĩ nĩwanangaa ndũũ sya andũ angĩ,
na kũtuma andũ ala mekalaa na mũuo mamenana.
10Mwaki wakanaa kwĩanana na ũndũ wĩkĩĩtwe ngũ syĩana,
na ũndũ wũmũ wa ngoo wĩana, now'o ngananĩo syĩthĩawa singĩvĩte.
Ũndũ mũndũ wĩ na vinya wĩana, now'o ũthataa mũno wĩana,
na o ũndũ mũndũ wĩ na ũthwii wĩana,
now'o wĩthĩawa na ũthilĩku wĩana.
11Ĩteta yĩla yambĩĩaa mĩtũkĩ nĩyakanasya mwaki,
na ngananĩo sya mĩtũkĩ nietae kwĩtĩkya nthakame.
Kũneena Ndeto nthũku
12Wavuvĩĩa ĩkaa ya mwaki nĩyakanaa,
wayĩtwĩla mata nĩyĩvoaa;
maũndũ asu elĩ maumaa kanyw'anĩ waku.
13 #
Sil 51.2-6; Yak 3.5-12 Nĩaumanĩwe mũndũ ũla ũsukanaa na ũla ũumanaa,
nĩkwĩthĩwa nĩmanangĩaa andũ aingĩ mũuo.
14Ndeto sya ũvũngũ nitumĩte andũ aingĩ matethĩwa na mũuo,
na ikatuma manyaĩĩka kuma nthĩ ĩmwe kũthi ĩla ĩngĩ;
nĩsyanangĩte ndũa ndũmu,
na ikavalũkya mĩsyĩ ya andũ me nguma.
15Ndeto sya ũvũngũ nitumĩte iveti sya kũĩkĩĩwa itia mĩsyĩ yasyo,
na ikaivata ũsyao wa mĩnoo yasyo.
16Mũndũ ũla wĩthukĩĩasya ndeto sya ũvũngũ ndakakwata ũthũmũo,
o na ndakekala na mũuo.
17Mũsalisa wakũna mũndũ nũtumaa vala vakũnwa vaimba,
ĩndĩ ũĩmĩ wakũna mũndũ nũtũlangaa mavĩndĩ.
18Andũ aingĩ nĩmoaĩtwe na ũvyũ,
ĩndĩ ala moaĩtwe na ũĩmĩ nĩ aingĩ mbeange.
19Mũndũ ũla ũsũvĩawa ndakakwatwe nĩ mathĩna ma ũĩmĩ ethĩawa na ũtanu,
ũla ũtaakomana na ũthatu waw'o,
ũla ũtaakua ĩsoki yaw'o,
na kwovwa na mbĩngũ syaw'o.
20Nĩkwĩthĩwa ĩsoki yaw'o nĩ ya kyũma,
na mbĩngũ syaw'o nĩ sya kyũma kĩtawa mbulonzi.
21Kĩkw'ũ kĩla kĩetawe nĩ ndeto sya ũvũngũ nĩ kĩkw'ũ kĩthũku,
nĩ kavaa vala maveva ma ala akw'ũ mekalaa kũte mũndũ kũneenewa ndeto sya ũvũngũ.
22Ala mamũkĩaa Ngai maitonya kũsumbĩkwa nĩ ndeto sya ũvũngũ;
asu maikavĩvw'a nĩ mũĩ sya ndeto isu.
23Ala matiaa Mwĩai nĩmo masindawa vinya nĩsyo;
syakanaa nthĩnĩ woo mwaki ũtavoeka.
Ndeto isu ikamavithũkĩa ta mũnyambũ,
na kũmatembũanga ũndũ kĩkoyo kĩtembũangaa kĩndũ.
24Iĩĩa syĩndũ syaku na wiio wa mĩw'a,
na ũivingĩa thaavu vamwe na silĩva waku,
25o ta ũu thima ndeto syaku ila ũneenaa,
na ũiseũvĩsya kanyw'a waku mũomo na kĩvulĩ.
26Ĩsũvĩe kũvĩtya na ũĩmĩ waku,
ndũkese kũvalũka mbee wa ũla wĩthĩawa akũteete.
Currently Selected:
Sil 28: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011