Sil 26
26
Ũtanu wa Kwĩthĩwa na Kĩveti Kĩseo
1Mũndũ ũla wĩ kĩveti kĩseo ethĩawa e mũtanu,
nĩkĩtumaa mĩthenya ya thayũ wake yongeleka kũndũ kwĩlĩ.
2Kĩveti kĩĩkĩĩku nĩkĩtumaa mũũme atana;
mũũme akekala myaka yonthe ya thayũ wake e na mũuo.
3Kĩveti kĩseo nĩ ũathimo mũnene;
kĩkanenganwe ta ũmwe wa moathimo ala manengawe mũndũ-ũme ũla ũkĩaa Mwĩai.
4Mũndũ-ũme ũsu, o na ethĩwa nĩ mũthwii kana ngya, ngoo yake nĩmbĩanĩe,
na onekaa e mũtanu ĩvinda yonthe.
5Ve maũndũ atatũ ala matelemasya ngoo yakwa,
na wa kana nĩw'o ũtumaa nĩkĩa mũno:
Ndeto sya ũvũngũ ikũnyaĩĩkw'a ndũanĩ, nguthu ya andũ me na kĩthokoo,
na kũsikatana ũvũngũ.
Maũndũ asu onthe nĩ mathũku mbee wa kĩkw'ũ.
6Ĩndĩ nĩvethĩawa woo na kyeva yĩla kĩveti kĩkwĩw'ĩa kĩngĩ kĩwĩu,
na kĩithi kĩneenete naĩ na kũtuma kĩla mũndũ amanya.
7Kĩveti kĩthũku nĩ ũndũ ũmwe na ĩsoki yĩng'ũlũtaa ngingo;
kũũngamĩa kĩveti kĩu nĩ ũndũ ũmwe na kũkwata kĩng'auĩ.
8Kĩveti kĩnyw'ĩte kĩetae ũthatu mũnene;
kĩitonya kũvitha nthoni syakyo.
9Kĩveti kĩlaalai kĩmanyĩkaa nũndũ wa metho makyo me na wendi;
nĩkĩmanyĩkaa na mũvenelye wakyo.
10Syaĩĩasya mwĩĩtu waku mũno ethĩwa nĩ mbaa matũ,
walea kwĩka ũu, akwata mwanya akaũtũmĩa kwĩyĩka naĩ.
11Ĩsũvĩane na metho make mate nthoni,
na ndũkasaanĩw'e akũvĩtĩsya.
12O tondũ mũendi wa kyalo e na waũni wathamasya kanyw'a wake,
na kũnyw'a kĩw'ũ o na kĩva kĩla kĩ vakuvĩ,
now'o mwĩĩtu ũsu wĩĩkala nthĩ kĩla vandũ,
na kwĩnengane kwa kĩla mũndũ-ũme.
13Kĩveti kyũmbe nesa nĩkyendeeasya mũũme,
na ũmanyi wakyo nũtumaa ethĩwa na vinya.
14Kĩveti kĩvindĩtye nĩ mũthĩnzĩo kuma kwa Mwĩai,
na vai kĩndũ kĩ vata mũno mbee wa mwĩkalo wakyo mũseo.
15Kĩveti kĩ wĩnyivyo kĩendeeaa kwendeesya mbee na mbee,
na vai kĩthimi kĩtonya kũthima ũseo wa ngoo yakyo ntheu.
16O ta syũa yĩyuma yayayanĩ ya Mwĩai,
now'o wanake wa kĩveti kĩseo ũilyĩ mũsyĩnĩ wakyo mũseũvye nesa.
17O ta taa wakanĩte wĩ ĩũlũ wa kĩndũ kĩtheu kya kwilĩĩla taa,
now'o ũthyũ wake mwanake wonekaa kĩũngamonĩ kyake kĩseo.
18O ta ituĩ sya thaavu syĩ na matina ma silĩva,
now'o maũũ make manake me na nyaĩĩ ndũmu mailyĩ.
19-27 # 26.19-27 Maandĩko amwe ma Ndeto ya Ngai nĩmongelete mĩsoa ya 19-27 ĩkwasya: 19 Mwana wakwa, sũvĩa vinya wa ũika waku, na ndũkanenge aeni vinya waku. 20 Mantha kĩsio kĩnou kĩla vandũ, na ũivanda mbeũ syaku mwene vo, wĩ na wĩkwatyo wa kwĩthĩwa na ũsyao mũseo. 21 Kwoou syana syaku ikekala thayũ na nũndũ wa kwĩthĩwa syĩ na ũlũmu, nũndũ wa kũewa nesa ikatw'ĩka andũ me nguma. 22 Mũndũ mũka ĩlwaya nĩ ũndũ ũmwe na mata; mũndũ mũka wangangaa nĩ ũndũ ũmwe na mwako mũtũlu wa kĩkw'ũ. 23 Mũndũ mũka ũla ũtamũkĩaa Ngai anengawe mũũme mũthũku, ĩndĩ mũndũ mũka mũseo anengawe mũũme ũmũkĩaa Mwĩai. 24 Kĩveti kĩte nthoni nĩkĩtanĩaa kwĩyĩkĩĩthya nthoni, ĩndĩ kĩveti kĩting'ĩte kĩthĩawa na wĩting'o o na yĩla kĩ na mũũme. 25 Mũndũ mũka mbaa matũ nĩ ũndũ Ũmwe na ngitĩ, ĩndĩ ũla wĩw'aa nthoni nũmũkĩaa Mwĩai. 26 Kĩveti kĩla kĩnengae mũũme ndaĩa kyonekaa nĩ kĩla mũndũ kĩ na ũĩ, ĩndĩ kĩla kĩmũvũthasya kĩna ngathĩĩo kyonekaa nĩ kĩla mũndũ kĩ kĩthũku. Mũndũ-ũme ũla wĩ na kĩveti kĩseo nũtanaa nĩkwĩthĩwa mĩthenya ya thayũ wake ĩkongeleka kũndũ kwĩlĩ. 27 Kĩveti kĩ kĩneene kĩla kĩendaa kĩtavanĩtye maũndũ, nĩ ũndũ ũmwe na soo wa kaũ, na mũndũ-ũme ũla wĩkwatanasya na kĩveti kya mũthemba ũsu ekalaa thayũ wa kaũ.
Maũndũ Maetae Woo
28Ve maũndũ elĩ matumaa nĩkwatwa nĩ woo ngoonĩ,
na ũndũ wa katatũ nũnthatasya mũno:
Mũsikalĩ wĩ na thĩna nũndũ nĩmũthelele,
andũ oĩ mavũthaw'a,
na mũndũ ũla ũtiaa ũlũngalu akeka naĩ;
Mwĩai akakany'a mũndũ ta ũsu na kĩkw'ũ!
29Mũtandĩthya ndatonya kwĩkala atekwĩka mavĩtyo,
na mũthoosya wa syĩndũ ndesa kwĩwa nde na naĩ.
Currently Selected:
Sil 26: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011