Sil 24
24
Ũĩ Ũitaĩwa
1Ũĩ nĩwĩtaĩaa ewe mwene,
na nũtavanasya ĩũlũ wa ũkumyo wake katĩ wa andũ make.
2Ũĩ nĩwĩkumasya wũmbanonĩ wa Ũla wĩ Ĩũlũ Mũno,
na nĩwĩkumasya e mbee wa asikalĩ make na kwasya atĩĩ,
3“Ninyie ndeto ĩla yaneeniwe nĩ Ũla wĩ Ĩũlũ Mũno,
na navw'ĩkĩte nthĩ ta mũumbĩ.
4 #
Kuma 33.9-10
Wĩkalo wakwa waĩ matunĩ ĩũlũ,
na kĩvĩla kyakwa kya kĩ-ũsumbĩ kyaĩ kĩtuĩnĩ kya mũumbĩ.
5Nĩneelingĩile yayaya ĩũlũ nĩ weka,
na nesĩla kũndũnĩ kũliku vala maveva ma ala akw'ũ mekalaa.
6Itulumo sya ũkanga, nthĩ yonthe, andũ onthe na nthĩ syonthe,
nitw'ĩkĩte syakwa.
7Nĩnamanthie vandũ va kũthũmũa katĩ wa isu syonthe;
nĩnamanthie naĩlĩte kwĩkala kĩsionĩ kyaũ.
8“Nĩvo ĩndĩ mũmbi wakwa, ũla woombie syĩndũ syonthe,
wambĩaĩie na andavya vala naĩlĩte kwĩkala.
Ambĩie atĩĩ, ‘Seũvya mũsyĩ waku nzyawanĩ sya Yakovo;
o ũtiĩwa waku Ĩsilaeli.’
9Kuma tene, mwambĩlĩĩlyonĩ nĩw'o wambũmbie,
na ndikaeka kwĩthĩwa vo o na kũvika tene na tene.
10Nĩnamũthũkũmaa Ĩeemanĩ yake ĩtheu,
na kwoou natũa Kĩĩmanĩ kya Saioni.
11Nĩwanengie vandũ va kũtũa ndũanĩ ĩla yendetwe,
na anenga ũtonyi ĩũlũ wa Yelũsalemu.
12Nĩneelũlũmĩĩlye katĩ wa andũ me ndaĩa,
ala Mwĩai wanyuvĩte methĩwe make.
13“Nĩnaasavie ta mĩkũũ ĩla yĩ Levanoni,
na ta mĩtalakwe ĩla yĩ Kĩĩmanĩ kya Elimoni.
14Nĩnaasavie ta mũkĩndũ wĩ Eni-ngeti,
na ta tũkuthu twa losi twĩ Yeliko;
ta mũtĩ mũseo wa mũthata wĩ kĩthekanĩ,
na ta mũtĩ wa mũalamoni ũla ũmeaa ũtee wa ũsĩ.
15Naumasya mũuke mũseo ta wa mauta ala manyungaa nesa ma kalavuu na sinamoni,
na nanyaĩĩkasya mũuke wakwa mũseo ta wa mauta ala maseo vyũ ma manemane,
angĩ metawa sitakiti, onuka na ngalivani,
na ta wa ũvani ũnyungaa nesa wa Ĩeema ĩtheu.
16Nĩndambũũkasya mbonge syakwa ta sya mũtĩ wa mwalonĩ,
na mbonge syakwa syĩ ndaĩa na nĩ sya kwendeesya.
17Nĩnathongooie nthongoo sya kwendeesya ta mũsavivũ;
na malaa makwa nĩmasyaie matunda me ndaĩa na maingĩ.
18 # 24.18 Maandĩko amwe ma Ndeto ya Ngai nĩmongelete mũsoa wa mĩongo ĩlĩ na nyanya ũkwasya: Ninyie inyia wa wendo mũseo, kĩkĩo, ũĩ na wĩkwatyo mũtheu nũndũ nĩkalaa tene na tene, nĩnĩnenganĩtwe kwa syana syakwa syonthe, ila ũwetete masyĩtwa masyo.
19“Ũkai kwakwa inyw'onthe, inyw'ĩ ala mũmbendaa,
na mũiya matunda makwa mũvũne.
20Nũndũ kũndilikana kwĩ mũyo mbee wa ũkĩ wa nzũkĩ,
na kwĩthĩwa nakwa kwĩ mũyo mbee wa ĩwa yĩ ũkĩ.
21Ala mandĩsaa makeethĩwa mayenda kũndya ĩngĩ,
na ala manyusaa nyie makeethĩwa mayenda kũnyw'a ĩngĩ.
22Ũla ũmbĩw'aa ndakekĩĩthw'a nthoni,
na ala nĩtetheeasya kũthũkũma maikeka naĩ.”
Ũĩ na Mĩao
23Ĩvuku yĩĩ yonthe nĩ ũtianĩo wa Ngai Ũla wĩ Ĩũlũ Mũno,
mĩao ĩla Mwose watwĩaĩie,
yĩthĩwe ũtiĩwa wa wũmbano wa nzyawa sya Yakovo.
24 # 24.24 Maandĩko amwe ma Ndeto ya Ngai nĩmongelete mũsoa wa mĩongo ĩlĩ na inya ũkwasya: Ndũkaeke kũmwĩkwatya Mwĩai wĩlũmĩtye, ĩkalany'a nake nĩ kana akwĩkĩe vinya. Mwĩai Mwene Ũtonyi W'onthe e weka nĩwe Ngai, na vai mũtangĩĩi ũngĩ ate o we.
25Mĩao yusũasya andũ na ũĩ ũndũ Ũsĩ wa Visoni wusũaa,
na ta ũndũ Ũsĩ wa Tingilisi wusũaa ĩvindanĩ ya ngetha ya ũsyao wa mbee.
26Mĩao nĩmausũasya na ũmanyi ũndũ Ũsĩ wa Euvalati,
na Ũsĩ wa Yolotani syusũaa ĩvindanĩ ya ngetha.
27Nĩtumaa momanyĩsyo matisa ta kyeni,
ta Ũsĩ wa Ngioni ĩvindanĩ ya kũketha nzavivũ.
28Mũndũ wa mbee ndaamanya nesa Ũĩ nũũ,
o na ũla wa mũthya ndakethĩwa atonya kũmũmanya.
29Nĩkwĩthĩwa mosũanĩo ma Ũĩ nĩ maingĩ mbee wa kĩw'ũ kya ũkanga,
na ũtao wa Ũĩ nĩ mũliku mbee wa kũla kũliku vyũ ũkanganĩ.
30Ngalĩkonĩ ĩla yakwa, nailyĩ mũtaũ mũnene wumĩte ũsĩnĩ,
na ta mũtaũ wa kĩw'ũ ũendete mũũndanĩ.
31Nĩnaisye atĩĩ, “Nĩngũnyithya mũũnda wakwa,
na kwĩkĩa mĩũnda yakwa ya malaa kĩw'ũ nginya ĩkole.”
Ĩndĩ mũtaũ ũsu wakwa mũnene nĩwatw'ĩkie ũsĩ,
na ũsĩ wakwa watw'ĩka ũkanga.
32Kwoou ngatuma ĩngĩ momanyĩsyo makwa matisa ta kyeni kya kwakya,
na ngatuma matisa makanĩte kũthi kũvika kũasa.
33Ngaete o ĩngĩ momanyĩsyo makwa maingĩ ta wathani,
na kũmaeka metũmĩwa nĩ nzyawa syonthe ila syũkĩte.
34Manya kana nditethasya wĩa ũũ mũito kwondũ wakwa nĩ nyioka,
ĩndĩ kwondũ wa onthe ala mamanthaa ũmanyi.
Currently Selected:
Sil 24: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011