Sil 23
23
1Ame Mwĩai, ĩthe wakwa na mũsumbĩ wa thayũ wakwa,
ndũkandeke ndongoew'e nĩ ndeto syakwa,
na ndũkaeke imbalũkye!
2Nenda kethĩwa mosũanĩo makwa nĩmakũnwa ivoko,
na kĩlĩko kyakwa kĩimanyĩw'a mwĩkalĩle wa ũĩ,
nĩ kana iikaekane nakwa nĩlike mavĩtyonĩ,
na iikalee kũngany'a nũndũ wa naĩ syakwa syonthe.
3Ethĩwa ti ũu mavĩtyo makwa makaendeea kwongeleka,
na naĩ syakwa iyingĩva;
nĩvo ĩndĩ nĩsindwa nĩ amaitha makwa,
na nthũ syakwa iitana nũndũ wa kũsindwa kwakwa.
4Ame Mwĩai, ĩthe na Ngai wa thayũ wakwa,
ndũkambĩtĩkĩlye kwĩthĩwa na ngathĩĩo;
5mbetangĩe mawendi mathũku.
6Ndũkandeke nĩsumbĩkwe nĩ ĩtomo kana wendi;
ndũkandeke nĩthĩwe na mawendi asu me nthoni.
Kwĩvĩta
7Syana syakwa, ĩthukĩĩsyei motao ĩũlũ wa ũneeni;
mũndũ ũla ũkwataa motao asu ndakakwatw'a nĩ ndeto syake.
8Andũ ala mekaa naĩ nĩmakwataw'a nĩ ndeto ila maneenaa,
ala maumanaa na mekathĩĩaa nĩmakwataw'a nĩ ndeto isu.
9 #
Mat 5.34; Yak 5.12 Ndũkethĩwe na kĩmanyĩo kya kwĩvĩta,
kana ũtindĩae kũweta ĩsyĩtwa ya Ũla Mũtheu.
10O tondũ mũthũkũmi ũla ũthĩnaw'a aikũlw'a ũndũ, ũtaa malanga,
now'o mũndũ ũla ũtindĩaa kwĩvĩta na kũweta Ĩsyĩtwa yĩu
ũtaekaa kwĩthĩwa na naĩ.
11Mũndũ ũla wĩvĩtaa mawĩvĩto maingĩ ethĩawa e na mavĩtyo maingĩ,
na ũkany'o ndũkathela nyũmba kwake.
Ethĩwa nĩweevĩta na alea kwĩanĩsya wĩvĩto, akaendeeaa kwĩthĩwa e na ĩvĩtyo;
ĩndĩ avũthya wĩvĩto ũsu, akeethĩawa avĩtya mavinda elĩ.
Ethĩwa akeevĩta wĩvĩto wa ũvũngũ, ndakaleaa kũtalĩlwa ĩvĩtyo,
nĩkwĩthĩwa mũsyĩ wake ũkeethĩawa wusũĩte mathĩna.
Kũneena Ndeto Nthũku
12Ve mũneenele ũtonya kũelekanw'a na kĩkw'ũ;
mũneenele ũsu ndũkaaĩw'ĩke ũineenwa nĩ ũmwe wa andũ ma Ĩsilaeli.
Andũ ala mamũkĩaa Ngai mayĩthĩawa na mwĩkalo ta ũsu;
maikethokoanasya na naĩ.
13Ndũkamanyĩsye kanyw'a waku kũneenaa ndeto nthũku,
nũndũ kũneena ndeto iilyĩ ũu nĩkũtumaa mũndũ eka naĩ.
14Yĩla wekala mbee wa andũ me ndaĩa,
lilikanaa ĩthe na inyia waku,
ndũkese kũlwa nĩmo wĩ mbee wa andũ asu,
na ũyoneka ta wĩ ndia nũndũ wa mwĩkalo mũthũku.
Nĩvo ĩndĩ wĩĩlila wasye keka ndwaasyawa,
na kũumanĩa mũthenya ũla wasyaiwe.
15Mũndũ ũla wamanyĩie kũneena ndeto sya kũumana,
ndakesa kũekana na mwĩkalo ũsu thayũnĩ wake w'onthe.
Naĩ ya Ũlaalai
16Ve nzĩa mbingĩ sya kwĩka naĩ,
ila itumaa ũthatu wa Mwĩai wũka,
ĩndĩ wendi wa kwĩka ũlaalai nĩ ta mwaki wakanĩte,
na ndũtonya kũvow'a nginya yĩla ũkevosya.
Mũndũ ũla wĩkaa ũlaalai na mũndũ maileny'e ũndũ,
ndaekaa kwĩka ũu nginya mwaki ũsu ũkamũvĩvya vyũ.
17Mũndũ kĩlaalai nĩwendeeaw'a nĩ aka onthe,
na ndeanĩawa nginya yĩla wĩkw'a.
18Mũndũ ũla wĩthĩawa ate mũĩkĩĩku kũla kwĩ kĩveti kyake,
asũanĩaa akekũlya atĩĩ, “Ũla ũmbene nũũ?
Vaa ve kĩvindu kingĩ, nĩmbithĩtwe nĩ ngũta,
na vai mũndũ ũmbene. Yu nĩthĩnw'a nĩ kyaũ?
Ũla wĩ Ĩũlũ Mũno ndekwona naĩ yakwa!”
19Mũndũ wa mũthemba ũsu akĩaa o andũ me oka,
na ndamanyaa kana metho ma Mwĩai makenaa kũndũ ngili ĩkũmi mbee wa syũa.
Monaa maũndũ onthe ala mũndũ wĩkaa,
na kwona kũndũ kw'onthe kũla kwĩvithĩte.
20Mbee wa nthĩ ĩtanamba kũmbwa, Mwĩai nĩweesĩ maũndũ onthe,
o na ĩtina wa kũmbwa kwayo no ũmesĩ.
21Mũndũ ũsu akakanĩw'a nzĩanĩ sya ndũa,
na vala ũtataĩĩe nĩvo ũkakwatĩwa.
22Ũu now'o kũkethĩwa kwa kĩveti kĩla kĩte kĩĩkĩĩku kũla kwĩ mũũme,
kĩla kĩmũeteae kana kĩsyaĩte na mũndũ-ũme ũngĩ.
23Nĩkwĩthĩwa mbee, nĩkĩleete kwĩanĩsya mwĩao wa Ũla wĩ Ĩũlũ Mũno,
kelĩ, nĩkĩvĩtĩsye mũũme,
na katatũ, ũmalwayanĩ wakyo nĩkĩkĩte ũlaalai,
na kĩkasyaa syana na mũndũ-ũme ũngĩ.
24Kĩveti kĩu kĩkaetwe mbee wa wũmbano,
na ũkany'o wakyo ũkakwata syana syakyo o nasyo.
25Syana syakyo iikethĩwa na ũlũmu,
na iikethĩwa na mĩsyĩ yasyo.
26Kĩveti kĩu kĩkatia ĩũlũ wa nthĩ ũlilikany'o wa kĩumo,
na ũndũ ũsu wĩ nthoni kyeekie ndũkola ĩũlũ wa nthĩ.
27Ala metiwa me thayũ kyamina kũkw'a,
makamanya kana vai kĩndũ kĩseo mbee wa kũmũkĩa Mwĩai,
na vai kĩndũ kĩ mũyo mbee wa kwĩanĩsya mĩao yake.#23.27 Maandĩko amwe ma Ndeto ya Ngai nĩmongelete mũsoa wa mĩongo ĩlĩ na nyanya ũkwasya: Kũmũatĩĩa Ngai nĩ ũndũ wĩ ndaĩa nene, na kwĩtĩkĩlwa nĩwe nĩ kũkwata thayũ mũasa.
Currently Selected:
Sil 23: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011