Sil 22
22
Ũtulu na Ũtumanu
1Mũndũ mũtulu nĩ ũndũ ũmwe na ĩvia yĩ ĩko,
na kĩla mũndũ nũnyungunyĩasya nũndũ wa nthoni syake.
2Mũndũ mũtulu nĩ ũndũ ũmwe na mbumbu ya mai,
mũndũ ũla ũmakwataa nũmavuunzaa maume mokonĩ.
3Nĩ ũndũ wĩ nthoni mũndũ kwĩthĩwa e ĩthe wa mwana ũte mwĩkalo mũseo,
na kwĩthĩwa na mwĩĩtu ũte mwĩkalo mũseo nĩ wasyo.
4Mwĩĩtu wĩ kĩlĩko nũkwataa mũũme,
ĩndĩ ũla wĩkaa maũndũ me nthoni nũtumaa ĩthe wake ethĩwa na kyeva.
5Mwĩĩtu ũte mwĩkalo mũseo nĩwĩkĩĩthasya ĩthe na mũũme wake nthoni,
na elĩ nĩmamũvũthasya.
6Ngewa ĩeetwe ĩvindanĩ yĩtaĩlĩte nĩ ũndũ ũmwe na mbathi ikwinwa ĩvindanĩ ya kyeva;
ĩndĩ kũkany'a na kũmanyĩsya mwĩkalo mũseo nĩ ũĩ wa kĩla ĩvinda.
7 # 22.7 Maandĩko amwe ma Ndeto ya Ngai nĩmongelete mũsoa wa mũonza ũkwasya: Syana ila ieetwe nesa nivithaa thĩna ũla asyai masyo maeiwe naw'o.
8 # 22.8 Maandĩko amwe ma Ndeto ya Ngai nĩmongelete mũsoa wa nyanya ũkwasya: Syana ila syĩ ngũlũ na ng'endu nĩsyanangaa ndaĩa ya mũsyĩ woo.
Ũĩ na Ũtumanu
9Mũndũ ũla ũmanyĩasya ndia nĩ ũndũ ũmwe na ũla ũkwatanasya ilĩo sya mbisũ,
kana ũla ũamũkasya mũndũ ũkomete too mũito.
10Ũla ũtavasya ndia ngewa ethĩawa aitavya mũndũ ũkwombosya,
na mũminũkĩlyonĩ yĩsaa kũmũkũlya atĩĩ, “Wĩndavasya ata?”
11Ĩai nũndũ wa mũndũ mũkw'ũ, nĩkwĩthĩwa ndonaa kyeni;
Ĩai nũndũ wa ndia, nĩkwĩthĩwa ndĩ na ũmanyi.
Mũikaĩe mũno nũndũ wa ũla mũkw'ũ, nũndũ nũthũmũĩte;
ĩndĩ thayũ wa ndia nĩ mũthũku mbee wa kĩkw'ũ.
12 #
Mwa 50.10; Yund 16.24 Andũ maĩaa nũndũ wa mũndũ mũkw'ũ vandũ va mĩthenya mũonza,
ĩndĩ maĩaa nũndũ wa ndia kana nũndũ wa ũla ũtesĩ Ngai mĩthenya yonthe ya thayũ woo.
13Ndũkaneene ndeto mbingĩ na mũndũ mũtumanu,
kana ũthokee mũndũ ũte kĩlĩko.
Ĩkala vaasa nake ndũkese kũkwatwa nĩ thĩna,
na nĩ kana ndakaũthokoany'e.
Ĩkala vaasa nake na ũkakwata ũthũmũo,
na ndũkanow'a nĩ ũtumanu wake.
14Nĩ kyaũ kĩito mbee wa kyũma kĩũmu?
Kĩndũ kĩu ĩsyĩtwa yakyo nĩ, “Ndia.”
15Nĩ kavaa kũkua kĩthangathĩ, mũnyũ na kĩlungu kya kyũma,
kũte kũmĩanĩsya na ndia.
16O tondũ kĩlungu kya mũtĩ kĩathĩĩwe mwakonĩ kĩkalũma,
kĩtatonya kũthaw'a nĩ kĩthingitho kya nthĩ,
now'o mũndũ ũsũanĩĩte ũndũ nesa na akatw'a kũwĩka,
ũtethĩawa na w'ĩa ĩvindanĩ ya thĩna.
17Kĩlĩko kĩla kĩsũanĩaa ũndũ na ũĩ,
nĩ ũndũ ũmwe na ũkũta mũlũmu na mwanakavye.
18O tondũ wiio wĩkĩĩtwe vandũ vatũlu,
ũvalũkaw'a nĩ kĩseve kyauutana,
now'o kĩlĩko kĩna w'ĩa na kĩna motw'ĩo ma ndia,
kĩtatonya kũmĩanĩsya na maũndũ ma kũtelemya.
Kũsũvĩa Ndũũ
19Mũndũ ũla ũtonyaa itho nũtumaa methoi mauma,
na mũndũ ũla ũũmĩasya ũngĩ thayũnĩ nũmanyaa nesa kĩla kĩ ngoonĩ yake.
20Ũla ũkimaa nyũnyi na ĩvia nĩwilũngasya ikathi,
na ũla ũumaa mũnyanyae nĩwanangaa ũnyanya.
21O na ethĩwa nĩwakũĩa mũnyanyau ũvyũ,
ndũkakw'e ngoo, nũndũ ve o nzĩa mũtonya kũtũngĩĩa ũnyanya wenyu.
22Ethĩwa nĩwaneenea mũnyanyau naĩ, ndũkathĩnĩke,
nĩkwĩthĩwa nĩmũtonya kũekanĩa.
Ĩndĩ wamũuma, wamũvũthya, watavany'a syĩmbithĩ syake, kana wamũvithũkĩa ateyũmbanĩtye,
mũnyanyau o na wĩva ndalea ũkũkola.
23Tuma mũtũi waku akũĩkĩĩa ĩvindanĩ yĩla wĩ na ũkya,
nĩ kana wĩthĩwe ũtonya kũtana vamwe nake aendeea nesa.
Ĩthĩawa vamwe nake ĩvindanĩ ya thĩna,
nĩ kana ekũaĩa ũtiĩwa ũla wĩkwata.
24O tondũ syũki na mĩthũmũ syumaa ĩikonĩ mwaki ũtanamba kwakana,
now'o kũumana kũkaa mbee wa mũndũ kũaa ũngĩ.
25Ndikew'a nthoni ngĩsũvĩa mũnyanyawa,
na ndikamwĩvitha.
26Ĩndĩ ethĩwa ve ũndũ mũthũku ũkangwata nũndũ wake,
mũndũ o na wĩva ũla ũkew'a ũvoo ũsu akeesũvĩana nake.
Mboya ya Kũtetheew'a Mũndũ Ndakeke Naĩ
27Nenda kethĩwa nĩnĩkĩwa kĩndũ kya kũnziĩĩa kanyw'a,
na ilomo iitumwa nesa,
nĩ kana iikatume nĩvalũka,
na ũĩmĩ wakwa ndũkambanange!
Currently Selected:
Sil 22: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011