Sil 21
21
Naĩ sya Mĩthemba yĩ Kĩvathũkany'o
1Mwana wakwa, nĩwĩkĩte naĩ? Ndũkeke naĩ ĩngĩ.
Ĩndĩ ĩtya ũekeo wa naĩ ila ũminĩte kwĩka.
2Semba ũkĩe naĩ ta ũkĩĩte nzoka,
nũndũ wathengeea naĩ nĩkũkũũma.
Maeo mayo mailyĩ ta ma mũnyambũ,
na nĩminaa mathayũ ma andũ.
3Mũndũ eeka ũndũ o na wĩva ũtekwosana na mĩao,
ũmwĩkĩaa kĩtau kĩtavoa,
ta kĩtau kĩla kĩtiawa mũndũ atemwa na ũvyũ mũĩ ngalĩko syelĩ.
4Ũng'endu na kĩthokoo nitumaa ũthwii wanangĩka,
ũu now'o nyũmba ya ala me ngathĩĩo ĩkatiwa ĩte kĩndũ.
5 #
Sil 35.17-19
Ngya yavoya nĩyĩw'ĩkaa nĩ Ngai,
na Ngai nũsũngĩaa mboya ĩsu na mĩtũkĩ.
6Ũla ũmenaa ũkany'o aendeeaa kwĩka naĩ,
ĩndĩ ũla ũkĩaa Mwĩai nĩwumbũlaa kuma ngoonĩ yake.
7Mũndũ wĩsĩ kũneena nesa nũmanyĩkaa nĩ andũ aingĩ,
ĩndĩ yĩla wavĩtya, ũla wĩ na kĩlĩko nũmanyaa.
8Mũndũ ũla wakaa nyũmba na mbesa sya andũ angĩ,
nĩ ũndũ ũmwe na mũndũ ũla wĩyũmbanĩasya mavia ma mbũa.
9Wũmbano wa andũ athũku nĩ ũndũ ũmwe na ndii syũmbanĩtw'e vamwe,
mũminũkĩlyo woo nĩ kũvĩvw'a na mwaki.
10Nzĩa ya eki ma naĩ ĩseũvĩtw'e nesa na tũvila tũseo,
ĩndĩ nzĩa ĩsu ĩendete kũlika ĩimanĩ ya vala maveva ma ala akw'ũ mekalaa.
Ũĩ na Ũtumanu
11Mũndũ ũla wĩkaa ũndũ mĩao ĩkwasya nũsũvĩaa mosũanĩo make,
na wĩanĩu wa kĩkĩo kya Mwĩai nĩ ũĩ.
12Mũndũ ũte mũĩ ndatonya kũmanyĩw'a,
ĩndĩ ve ũĩ wongeleelaa woo.
13Ũĩ wa mũndũ mũĩ wongelekaa ta kĩw'ũ kingĩ,
na ũtao wake ta kĩthima kyumĩte kĩw'ũ.
14Kĩlĩko kya ndia kĩilyĩ ta mbisũ ngw'ũ,
kĩitonya kwĩkalya ũmanyi.
15Yĩla mũndũ mũĩ weew'a ndeto sya ũĩ,
nĩwikumasya na kũsyongeleela;
ĩndĩ yĩla ndia yeew'a ndeto sya ũĩ,
nĩyimenaa na ĩyũlwa nĩsyo.
16Kwĩthukĩĩsya ũneeni wa ndia nĩ ũndũ ũmwe na kũthi kyalo ũkuĩte mũio mũito,
ĩndĩ ndeto sya mũndũ mũĩ syĩthĩawa syĩ mũyo kwĩthukĩĩw'a.
17Andũ me wũmbanonĩ nĩmendaa kwĩw'a ũneeni wa mũndũ wĩ kĩlĩko,
na nĩmasũanĩaa ĩũlũ wa ndeto syake mũno.
18Ndia yonaa ũĩ wĩ wa mana ta nyũmba mbomboku,
na ũĩ wa mũndũ ũte na ũmanyi nĩ kũneena maũndũ ũtasũanĩĩte nesa.
19Kwa mũndũ ũte kĩlĩko, kĩsomo nĩ ũndũ ũmwe na nyololo imwovete maũũ,
na ta mbĩngũ imwovete kw'oko kwa aũme.
20Ndia nĩthekaa na wasya mũnene,
ĩndĩ mũndũ mũĩ athekaa avindĩtye.
21Kwa mũndũ wĩ kĩlĩko, kĩsomo nĩ ũndũ ũmwe na ĩsoa ya thaavu,
na ta ũvangili wĩ kw'okonĩ kwa aũme.
22Ndia yĩkalaataa ĩkalika nyũmba,
ĩndĩ mũndũ wĩsĩ ũndũ ũkwĩka eteelaa nza e na ndaĩa.
23Mũndũ ũte na ndaĩa nũkunĩkĩlaa nyũmba kwĩsĩla mũomonĩ,
ĩndĩ mũndũ wĩ na mwĩkalo mũseo nĩweteelaa nza.
24Nĩ mwĩkalo mũthũku mũndũ kwĩthukĩĩsya ũndũ andũ mekwasya e mũomonĩ;
mũndũ wĩ kĩlĩko nĩwĩw'aa nthoni kwĩka ũndũ ta ũsu.
25Andũ mateũmanya ũndũ mekwasya maneenaa ndeto itamakonetye,
ĩndĩ mũndũ mũĩ aneenaa ndeto aisũanĩĩte nesa.
26Ndia ĩneenaa ĩtasũanĩĩte,
ĩndĩ mũndũ mũĩ nũsũanĩaa atanamba kũneena.
27Yĩla mũndũ ũtesĩ Ngai waumanĩa mũmaitha,
ethĩawa eeyĩumanĩa we mwene.
28Mũndũ ũla ũsukanaa avukasya thayũ wake mwene,
na nũmenawa nĩ atũi make.
Currently Selected:
Sil 21: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011