Sil 20
20
Mũndũ Kũmanya yĩla Waĩlĩte Kũneena
1Mũndũ nũtonya kũkanw'a ĩvinda yĩla yĩtaĩlĩte,
nĩ kavaa mũndũ ũla ũvindasya, ĩndĩ ayĩthĩwa e mũĩ.
2Nĩ ũseo mbeange kũkany'a mũndũ,
kwĩ kũmũthatĩa.
3Ũla wĩtĩkĩlaa mavĩtyo make,
ndesaa kwĩthĩwa na ũvalũku.
4Mũndũ ũla wĩkaa ũndũ waĩlĩte kwa kũingĩĩw'a,
nĩ ũndũ ũmwe na mũndũ mũvakũe wĩ wendi wa kũkwata mwĩĩtu na vinya.
5Andũ amwe nĩmavindasya na kwoou mayoneka me oĩ,
ĩndĩ angĩ nĩmamenawa nũndũ wa kũneena mũno.
6Andũ amwe mavindasya nũndũ mai na ũndũ wa kũneena,
ĩndĩ angĩ mavindasya nũndũ nĩmesĩ yĩla maĩlĩte kũneena.
7Andũ ala oĩ mekalaa mavindĩtye nginya ĩvinda yĩla yaĩlĩte,
ĩndĩ ndia yĩ ngathĩĩo ndĩsĩ ĩvinda yĩla yaĩlĩte ya kũneena.
8Mũndũ ũla ũneenaa ndeto mbingĩ nũmenawa,
o ta ũu ũla wĩyoseaa mwanya wa kũneena nũmenawa.
Moalyũku ala Mekĩkaa na Mĩtũkĩ
9Mũndũ wĩ thĩnanĩ nũtonya kũkwata vaati nzeo,
ĩndĩ vaati nzeo nĩtonya kũetee mũndũ wasyo.
10Kwĩ mũthĩnzĩo ũtaeteae mũndũ ũtandĩthyo o na ũmwe,
ĩndĩ kwĩ ũngĩ ũetae ũtandĩthyo kũndũ kwĩlĩ.
11Mũndũ nũtonya kũkwata wasyo aimantha ndaĩa,
ĩndĩ ve andũ matethĩawa na ndaĩa mesaa kwambata makanengwa ndaĩa nene.
12Mũndũ nũtonya kũthooa syĩndũ mbingĩ kwa thooa mũnini,
ĩndĩ ayĩsa kũĩva syĩndũ isu kũndũ mũonza mbee wa ũndũ waaĩlĩte kũĩva.
13Mũndũ ũla mũĩ nũtumaa endwa nĩ andũ nũndũ wa ndeto syake,
ĩndĩ kwĩseũvya kwa ndia no kwa mana.
14Mũthĩnzĩo wa ndia ndũtonya ũkũtethya,
nĩkwĩthĩwa yendaa we ũmĩtethye mavinda maingĩ.
15Ĩnenganae kĩndũ kĩnini, ĩndĩ ĩineenea mũndũ mũno;
ĩmũneeneaa na wasya mũnene ta mũndũ ũkũtavany'a ũndũ ndũnyũ.
Ĩkovethasya ũmũnthĩ na ũnĩ ĩyasya ĩtũngĩwe.
Mũndũ wa mũthemba ũsu nũmenawa mũno.
16Ndia ĩneenaa ĩkasya atĩĩ, “Ndi mũnyanyawa,
na vai mũndũ ũndũngĩaa mũvea yĩla neeka nesa.
Ala maĩsaa lĩu wakwa maneeneaa naĩ.”
17Nĩw'o ndia ĩkathekeeawa nĩ andũ mavinda onthe!
Ũneeni Ũtaĩlĩte
18Nĩ kavaa kũtiũũka ũvalũke kũte kũtiũũka ũneeninĩ waku.
Ala athũku makaminwa na mĩtũkĩ o tondũ mũndũ ũtiũũkaa akavalũka.
19Mũndũ ũte mũvea ailyĩ ta ngewa ĩla ĩeawa ĩvinda yĩla yĩtaĩlĩte,
ĩla ĩendeeaa kũtũngĩlĩĩlwa nĩ mũndũ mũtumanu.
20Nthimo ĩneenetwe nĩ ndia nĩleawa,
nĩkwĩthĩwa ndĩmĩneenaa ĩvindanĩ yĩla yaĩlĩte.
21Mũndũ nũtonya kũsiĩĩwa kwĩka naĩ nĩ ũkya wake,
kwoou we yĩla ũthũmũĩte ndew'aa e na ĩvĩtyo yĩkũmũthĩny'a thayũnĩ.
22Mũndũ nũtonya kwasya thayũ wake nũndũ wa kwĩw'a nthoni,
kana akawasya nũndũ wa kũkĩa andũ.
23Mũndũ nũtonya kwatha mũnyanyae kĩndũ nũndũ wa kwĩw'a nthoni sya kũmwĩa aiee,
na kwoou aituma atw'ĩka mũmaitha wake vate kĩtumi.
Kũneena Ũvũngũ
24Ũvũngũ nĩ ĩlanga ĩthũku mũno yĩ mũndũnĩ,
mũndũ mũtumanu akenganaa kĩla ĩvinda.
25Kĩng'ei kĩ kavaa kwĩ mũndũ wamanyĩie kũkengana,
ĩndĩ onthe me elĩ makaminwa.
26Mũndũ ũla ũkenganaa eyĩeteae kĩvũthya,
na ekalaa na nthoni kĩla ĩvinda.
Ndeto sya Ũĩ
27Mũndũ ũla ũneenaa na ũĩ aendeeaa nesa,
na ũla wĩ kĩlĩko nĩwendeeasya andũ me ndaĩa.
28Ũla ũĩmaa mũũnda akoombany'a ngetha yake,
na ũla wendeeasya andũ me ndaĩa akaekewa mavĩtyo make.
29Mĩthĩnzĩo na ĩtuvi ya wendeesyo nitumaa ala oĩ matona ũw'o;
ikunĩkaa makanyw'a moo ũkethĩa maitonya kũkany'a andũ.
30Ũĩ ũte mumĩlye na ũthwii mũvithe,
syelĩ syĩ vata mwaũ?
31Nĩ kavaa mũndũ ũla ũvithaa ũtumanu wake,
kwĩ ũla ũvithaa ũĩ wake.
32 # 20.32 Maandĩko amwe ma Ndeto ya Ngai nĩmongelete mũsoa wa mĩongo ĩtatũ na ilĩ ũkwasya: Nĩ kavaa kũmũmantha Mwĩai na wũmĩĩsyo ũtekũthela, kũte mũndũ kwĩtongoesya thayũnĩ wake mwene.
Currently Selected:
Sil 20: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011