Sil 11
11
1Ethĩwa mũndũ ngya e na ũĩ,
ethĩawa na kĩtumi kya kwĩkathĩĩa,
ũĩ nũtumaa ekala vamwe na andũ me ndaĩa.
Ndũkasilĩle Mũndũ Kwĩanana na ũndũ Ũilyĩ
2Ndũkakathĩĩe mũndũ nũndũ wa wanake wake,
kana ũvũthye mũndũ nũndũ wa wũmbo wake.
3Nzũkĩ nĩ ĩmwe katĩ wa tũsamũ tũla tũnini tũũlũkaa,
ĩndĩ kĩla ĩseũvasya kĩ mũyo mbee wa syĩndũ syonthe.
4Ndũkekathĩĩe nũndũ wĩkĩĩte ngũa mbanake,
kana wĩtũlye yĩla wanengwa ndaĩa.
Nĩkwĩthĩwa mawĩa ma Mwĩai nĩ ma kũseng'ya,
na mawĩa make nĩmavithĩtwe andũ.
5Asumbĩ aingĩ nĩmaumĩte ivĩlanĩ makekala nthĩ mũthanganĩ,
na mũndũ ũtesĩkĩe o na vanini akekĩwa ngovia ya kĩ-ũsumbĩ.
6Atongoi aingĩ nĩmekĩĩthĩtw'e nthoni mũno,
na andũ me nguma makanenganwe ũtonyinĩ wa andũ angĩ.
Kwĩkala Wĩsũvĩĩte
7Ndũkatũle mũndũ mũtĩ ũtanamba kũatĩĩa ũmanye ũw'o;
sũanĩa mbee na ĩndĩ ũyony'a mũndũ mavĩtyo make.
8Ndũkasũngĩe ũtanamba kwĩthukĩĩsya,
na ndũkatilĩle mũndũ aendee kũneena.
9Ndũkalike ngananĩonĩ sya ũndũ ũtaũkonetye,
o na ndũkethĩwe mũamba na eki ma naĩ yĩla mekumya ũtw'ĩo.
10Mwana wakwa, ndũkekwatany'e na maũndũ maingĩ,
weeyongeleela kwĩka maũndũ maingĩ, ndũkalea kũtũlwa mũtĩ.
O na weekalaata mũno, ndũkavika,
na o na wakĩa, ndũkavonoka.
11Kwĩ andũ mathũkũmaa mĩtũkĩ me na kĩthito kingĩ,
ĩndĩ mũminũkĩlyonĩ methĩawa me o na thĩna.
12Kwĩ angĩ mekaa maũndũ mbola na mendaa kũtetheew'a,
mayĩthĩawa na vinya na methĩawa na ũkya mwingĩ,
ĩndĩ Mwĩai nĩwendeeaw'a nĩmo,
nũmaumasya thĩnanĩ woo,
13nũmanenevasya,
na kũtuma andũ aingĩ maseng'a mamona.
14Ũseo na ũthũku, thayũ na kĩkw'ũ,
ũthwii na ũkya, syonthe syumaa kwa Mwĩai.
15 # 11.15 Maandĩko amwe ma Ndeto ya Ngai nĩmongelete mũsoa wa ĩkũmi na itano ũkwasya: Ũĩ, ũmanyĩsyo na ũmanyi wa Mĩao syumaa kwa Mwĩai; wendo na kũmanya kwĩka ũla ũseo syumaa kwake.
16 # 11.16 Maandĩko amwe ma Ndeto ya Ngai nĩmongelete mũsoa wa ĩkũmi na thanthatũ ũkwasya: Ũthũku na kĩvindu syoombĩiwe eki ma naĩ; ala mendete ũthũku makakũa mayĩka o ũthũku.
17Mũthĩnzĩo wa Mwĩai kwa ala mamũkĩaa nĩwĩkalaa,
ũseo wake wĩthĩawa vo kĩla ĩvinda kũmatongoesya.
18 #
Sav 49.10; Lk 12.16-21 Mũndũ nũtonya kũtw'ĩka mũthwii kumana na kĩthito kyake na kwĩyĩima,
na yĩĩ nĩyo ĩtuvi yĩla ũkwataa:
19Yĩla wasũanĩa asya, “Yu nĩnĩthũmũĩte,
na nĩngũtanĩa kĩla nĩthũkũmĩĩte,”
ndethĩawa esĩ eĩkala ĩvinda yĩana ata,
na aikw'a atiĩe andũ angĩ ũthwii ũsu.
20We lũmya ũtianĩo waku,
na ũikũa o ũendee kũthũkũma wĩa ũla waku.
21Ndũkaseng'we nĩ mawĩa ma mwĩki wa naĩ,
ĩndĩ mwĩkwatye Mwĩai na ũitethya wĩa waku.
Nĩkwĩthĩwa kwa Mwĩai ti ũndũ wĩ vinya,
kũtw'ĩkĩthya ngya mũthwii mĩtũkĩ na kwa kĩthũlũmũko.
22Ũathimo wa Mwĩai nĩw'o mũthĩnzĩo wa ala mamũkĩaa;
Ngai nũmaathimaa mĩtũkĩ.
23Ndũkaneene wasye, “Nĩ kyaũ yu ngwenda?
Ĩvindanĩ yũkĩte ngakwata kyaũ?”
24O na ĩngĩ ndũkaneene wasye,
“Nĩna syĩndũ syonthe imbĩanĩe.
Ĩvindanĩ yũkĩte ngakwatwa nĩ thĩna mwaũ?”
25Ĩvindanĩ yĩla mũndũ ũendee nesa, nĩwũlawa nĩ mathĩna,
na ĩvindanĩ ya mathĩna, vai mũndũ ũlilikanaa yĩla waendee nesa.
26Nĩkwĩthĩwa kwa Mwĩai ti ũndũ wĩ vinya,
kũtuva mũndũ mũthenyanĩ wa kĩkw'ũ kyake kwĩanana na meko make.
27Mathĩna ma kavinda o kanini nĩmatumaa mũndũ olwa nĩ ũtanu;
mũminũkĩlyonĩ wa thayũ wake meko make nĩmavuanaw'a.
28Ndũkaneene wasye mũndũ nĩ mũathime atanamba kũkw'a;
mũndũ amanyĩkaa kwĩanana na ũndũ mũminũkĩlyo wake ũilyĩ.
Sisya Nesa Anyanyau ala Ũkũnyuva
29Ndũkathokye o kĩla mũndũ mũsyĩ kwaku,
nĩkwĩthĩwa mĩteo ya ala nzeleke nĩ mingĩ.
30Mũndũ wĩ mĩkathĩĩo nĩ ta mũteo wa ũkũlikya mũisyonĩ,
aatĩĩaa amanye wonzu waku,
31nĩkwĩthĩwa ekalaa ovetye nĩ kana aalyũle maũndũ maseo moneke ta mathũku,
na kwasya maũndũ maseo nĩ mathũku.
32Ngala ĩmwe ya mwaki nĩkwatasya mbumbu ya makaa,
na mwĩki wa naĩ nĩwovasya oae.
33Ĩsũvĩane na mũndũ mũthũku nũndũ aseũvasya mĩvango mĩthũku,
ndakese ũkwanangĩa ndaĩa ĩvindanĩ yonthe ya thayũ waku.
34Wathokya mũndũ ũtamwĩsĩ nyũmba kwaku akaete kĩthokoo,
na aituma ũemanwa na andũ ma mũsyĩ waku mwene.
Currently Selected:
Sil 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011