Sil 12
12
1 #
Mat 7.6
Wenda kwĩka mũndũ nesa, nyuva ũla ũkwĩka ũseo ũsu,
naku ũkatũngĩwa mũvea nũndũ wa meko maku maseo.
2Weeka mũndũ wĩ na kĩkĩo kya Ngai nesa ũkatuvwa,
ethĩwa mũndũ ũsu ti we ũkaũtuva,
vate nzika Ũla wĩ Ĩũlũ Mũno akaũtuva.
3Mũndũ ũla wĩkalaa kĩla ĩvinda ayĩka ũthũku ndakona ũseo,
na o ta ũu mũndũ ũla ũtatethasya ngya ndakona nesa.
4Nenga andũ ala me na kĩkĩo kya Ngai ũtethyo,
ĩndĩ ndũkatethye eki ma naĩ.
5Meke nesa ala menyivasya,
ĩndĩ andũ ala mate na kĩkĩo kya Ngai ndũkamanenge kĩndũ;
ndũkamanenge lĩu o na wĩva,
wamanenga makatũmĩa lĩu ũsu makũvalũkye,
nĩkwĩthĩwa ũkakwata ũthũku mavinda elĩ,
nũndũ wa ũseo w'onthe ũla wĩĩka andũ asu.
6Ũla wĩ Ĩũlũ Mũno nũmenete eki ma naĩ,
na akakany'a ala mate na kĩkĩo kya Ngai.
7Nenga mũndũ mũseo ũtethyo,
ĩndĩ ndũkatethye mwĩki wa naĩ.
8Mũnyanyae wa mũndũ ndamanyĩkaa yĩla maũndũ maendee nesa,
na yĩla kwĩ thĩna mũndũ ndakalea kũmanya mũmaitha wake nũũ.
9Yĩla mũndũ waendeea nesa, amaitha make nĩmew'aa woo,
ĩndĩ yĩla kwĩ mathĩna, o na anyanyae nĩmamũtiaa.
10Ndũkaaĩkĩĩe mũmaitha waku,
nĩkwĩthĩwa ũthũku wake ũkakũmina ũndũ nganga ĩminaa kyũma.
11O na eenyivya na kũkumana e mbee waku,
ĩsũvĩe na ũyĩsiĩanĩa nake;
ĩthĩwa kwake ta mũndũ ũla ũkutaa kĩoo,
nĩ kana kĩikakwatwe nĩ nganga na kwanangĩka vyũ.
12Ndũkekalye mũmaitha waku vakuvĩ naku,
weeka ũu akakũsinda na kwosa mwanya waku.
Ndũkamwĩkalye kw'okonĩ kwaku kwa aũme,
weeka ũu akoosa kĩvĩla kyaku kya ndaĩa;
nĩvo ĩndĩ mũminũkĩlyonĩ wĩmanya ũw'o wa ndeto syakwa,
naku ũyĩlila nũndũ wa ndeto ila naneena.
13Mũndũ ũla ũvoovasya nzoka, aũmwa nĩyo vai mũndũ ũmwĩw'ĩaa tei,
na o ta ũu mũndũ ũla ũthengeeaa nyamũ mbai, aũmwa nĩyo ndew'ĩawa tei.
14Kwoou vai mũndũ wĩw'ĩaa tei mũndũ ũla ũtindanasya na mwĩki wa naĩ,
na ayĩsa kũlika naĩnĩ ĩsu.
15Mwĩki wa naĩ ekalanasya naku o kwa kavinda,
ĩndĩ wakwatwa nĩ thĩna aikũtia.
16Mũmaitha aneenaa ndeto nzeo,
ĩndĩ mosũanĩonĩ make, avangaa ũkwĩkya ĩimanĩ;
mũmaitha nũĩaa aketa methoi,
ĩndĩ akwata mwanya ayĩanĩsya wendi wake wa ũkũaa.
17Yĩla wĩkwatwa nĩ thĩna ũkamwĩthĩa e vau mbee waku;
akoonany'a ta ũendee ũkũtetheesya ĩndĩ aikũvĩla ũvalũke.
18Nĩvo ĩndĩ eĩyonany'a nesa nĩwe ũũ,
akathingithya mũtwe na aikũnanga moko,
na ũkũsuka kũla kwĩ andũ angĩ.
Currently Selected:
Sil 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011