Sil 10
10
1Mũtongoi mũĩ nũmanyĩasya andũ make,
na ũtongoi wa mũndũ wĩ na ũmanyi wĩthĩawa wĩ na mũvango mũseo.
2Ũndũ mũtongoi ũilyĩ now'o anini make methĩawa mailyĩ;
ũndũ mũtongoi wa ndũa ũilyĩ now'o onthe ala matũaa vo methĩawa mailyĩ.
3Mũsumbĩ ũte na ũmanyi nũeteae andũ ma nthĩ yake wanangĩko,
ndũa ĩendeeaa nesa kwĩanana na ũmanyi wa atongoi mayo.
4Ũtongoi wa nthĩ wĩ ungu wa ũtonyi wa Mwĩai,
we nĩwĩkĩaa mũsumbĩ ũla waĩlĩte ĩvindanĩ yĩla yaĩlĩte.
5Mwĩai nĩwe ũtumaa mũndũ aendeea nesa,
na nĩwe ũtumaa mũmanyĩsya wa mĩao ethĩwa na ndaĩa.
Mĩkathĩĩo
6Ndũkathatĩe mũtũi waku nũndũ wa kĩla ĩvĩtyo,
o na ndũkeke ũndũ wĩ na ngathĩĩo syĩ na ũng'endu.
7Mwĩai vamwe na andũ nĩmamenete ũng'endu,
na o ta ũu nĩmathataa yĩla sila wa katĩ ũte vo.
8Ũsumbĩ wa nthĩ ĩmwe nĩwosawa nĩ ĩngĩ,
yĩla veethĩwa vate sila wa katĩ,
na veethĩwa ũng'endu na ĩtomo.
9Mũndũ no kĩtoo na mũu, kwoou atonya kwĩkathĩĩa na kyaũ?
Mwĩĩ wake woaa o na e thayũ.
10Ũwau wa ĩvinda ĩasa nũvũavũanasya ndakĩtalĩ;
mũndũ nũtonya kwĩthĩwa e mũsumbĩ ũmũnthĩ na ũnĩ aikw'a.
11Nĩkwĩthĩwa mũndũ amina kũkw'a,
aminawa nĩ myeenya, mũthwa na iinyũ.
12Wambĩlĩĩlyo wa mĩkathĩĩo ya mũndũ nĩ kũmũtia Mwĩai,
yĩla ngoo yake yatia Mũmbi wake.
13Nĩkwĩthĩwa wambĩlĩĩlyo wa mĩkathĩĩo nĩ naĩ,
na mũndũ ũla wĩkalaa na mĩkathĩĩo aetae ũthatyo.
Kwoou Mwĩai nũmaeteae andũ ma mũthemba ũsu mathĩna mataaoneka,
na akĩmamina vyũ.
14 #
1Sam 2.8; Lk 1.52 Mwĩai nĩwumasya atongoi ivĩlanĩ syoo sya kĩ-ũsumbĩ,
na ayĩkalya ala menyivasya ivĩlanĩ isu.
15Mwĩai nũkũĩte mbaĩ na mĩi yasyo,
na akavanda mbaĩ ila syĩnyivasya vandũ va isu.
16Mwĩai nũsindĩte nthĩ sya andũ,
na akasyananga kũvika myambĩlĩĩlyonĩ ya nthĩ.
17Nũvetangĩte nthĩ imwe na akaimina,
na ũkethĩa o na iikalilikanwa ĩũlũ wa nthĩ.
18Mũmbi ndaaũmba andũ methĩwe na ngathĩĩo,
kana akomba ala masyaiwe nĩ aka methĩawe na ũthatu mwai.
Andũ ala Maĩlĩte Kũnengwa Ndaĩa
19Nĩ syũmbe syĩva ila syaĩlĩte kũnengwa ndaĩa?
Nĩ andũ.
Andũ meva?
Ala mamũkĩaa Ngai.
Nĩ syũmbe syĩva ila itaĩlĩte kũnengwa ndaĩa?
Nĩ andũ.
Andũ meva?
Ala matũlaa mĩao.
20Katĩ wa anake masyaanĩw'e, ũla mũkũũ nĩwaĩlĩte kũnengwa ndaĩa.
Mwĩai nũtaĩaa ala mamũkĩaa.
21 # 10.21 Maandĩko amwe ma Ndeto ya Ngai nĩmongelete mũsoa wa mĩongo ĩlĩ na ũmwe ũkwasya: Kũmũkĩa Mwĩai nĩkw'o wambĩlĩĩlyo wa kũendeea nesa; ĩndĩ ũng'endu na mĩkathĩĩo nĩ wambĩlĩĩlyo wa kũendeea naĩ.
22Athwii na ala manengawe ndaĩa vamwe na ngya,
onthe mekathĩĩaa nthĩnĩ wa kũmũkĩa Mwĩai.
23Ti ũseo kũvũthya mũndũ mũĩ o na ethĩwa nĩ ngya,
o na ti ũseo kũnenga mwĩki wa naĩ ndaĩa.
24Mũndũ wĩ ndaĩa, mũsili na mũtongoi nĩmanengawe ndaĩa,
ĩndĩ vai ũmwe woo mũnene mbee wa mũndũ ũla ũmũkĩaa Mwĩai.
25Ngombo mbũĩ ĩkathũkũmwa nĩ andũ mate ove,
na mũndũ wĩ na ũmanyi ndakanyungunyĩsya nũndũ wa ũu.
Wĩnyivyo na Kwĩnenga Ndaĩa
26Yĩla ũkũtethya wĩa waku ndũkekathĩĩe na ũmanyi waku,
kana wĩkathĩĩe yĩla wĩ thĩnanĩ.
27Nĩ kavaa mũndũ ũla ũthũkũmaa na e na syĩndũ syonthe,
kũte ũla ũendaa ayĩkathĩĩa na o na nde na lĩu.
28Mwana wakwa, ĩkathĩĩae wĩ na wĩnyivyo,
na ũyĩnenga ndaĩa ĩla ĩkwaĩlĩte.
29Nũũ ũla ũkatetea mũndũ ũla wĩyĩkaa naĩ mwene?
Nũũ ũla wĩnenga ndaĩa mũndũ ũla ũtenengae ndaĩa?
30Mũndũ ngya anengawe ndaĩa nũndũ wa ũmanyi wake,
nake mũthwii anengawe ndaĩa nũndũ wa ũthwii wake.
31Ethĩwa mũndũ nũnengawe ndaĩa e ngya,
kwa sũanĩa akanengwa ndaĩa yĩana ata yĩla wĩtw'ĩka mũthwii!
Ethĩwa mũndũ nũvũthaw'a e mũthwii,
kwa sũanĩa akavũthw'a mũno wĩana ata yĩla wĩtw'ĩka ngya!
Currently Selected:
Sil 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011