Sav 98
98
Ngai Mũsumbĩ wa Nthĩ Yonthe
1Mwinĩei Mwĩai Ngai wathi mweũ,
nũndũ nĩwĩkĩte maũndũ ma kũseng'ya!
Kw'oko kwake kwĩ vinya,
kw'oko kwake kũtheu nĩkũtumĩte asinda.
2Mwĩai Ngai nũmanyĩthanĩtye ũtangĩĩo wake,
nũvuanĩtye ũlũngalu wake kwa mbaĩ syonthe.
3Nũlilikanĩte wendo wake ũtaolekaa,
na ũĩkĩĩku wake kwa andũ ma Ĩsilaeli;
andũ onthe ĩũlũ wa nthĩ nĩmonete ũsindi wa Ngai waitũ.
4Nthĩ yonthe nĩyinĩe Mwĩai Ngai na ũtanu;
inai nũndũ wa ũtanu, ĩĩ, inai mũkĩtaĩa!
5Inĩai Mwĩai Ngai mbathi sya kũmũtaĩa mũkũnĩte ngitaa nini,
mũkũnĩte ngitaa nini na mawasya ma mbathi!
6Mũvuvĩte masoo na ũvya,
na mũyinĩa Mwĩai Ngai Mũsumbĩ waitũ na wasya mũnene mwĩ na ũtanu.
7Ũkanga nũuume na syũmbe syonthe ila syĩ nthĩnĩ waw'o;
nthĩ na onthe ala mũtwĩe ĩũlũ wayo inai!
8Mbũsĩ nikũne moko masyo;
iĩma nĩsine na ũtanu syĩ vamwe,
9mbee wa Mwĩai Ngai nũndũ nĩwũkĩte,
nĩwũkĩte kũsilĩla nthĩ,
akasilĩla nthĩ na ũlũngalu,
na kũsilĩla andũ na ũw'o wake.
Currently Selected:
Sav 98: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
