Sav 97
97
Ngai nĩ Mũsumbĩ wa Nthĩ Yonthe.
1Mwĩai Ngai nũsumbĩkaa, nthĩ nĩtane!
Inyw'ĩ ithama mbingĩ sya ũkanga ĩw'ai mũyo!
2Matu na kĩvindu kĩkamu nimũthyũlũlũkĩte;
ũlũngalu na sila wa katĩ nĩsyo wambĩlĩĩlyo wa ũsumbĩ wake.
3Mwaki wĩthĩawa ũmũtongoesye,
na ũivĩvya amaitha make ngalĩko syonthe.
4Ũtisi wake nũmulĩkaa nthĩ;
nthĩ nĩyonaa na kũtetema.
5Iĩma ithelaa ta ĩsoso mbee wa Mwĩai Ngai,
mbee wa Mwĩai wa nthĩ yonthe.
6Matu nĩmatavanasya ũlũngalu wake,
na andũ onthe mayona ũkumyo wake.
7Onthe ala mathaithaa mĩvw'anano nĩmakwatawa nĩ nthoni,
ala mekathĩĩaa na mĩvw'anano ya mana;
ngai syonthe nikumanaa mbee wa Mwĩai Ngai.
8Andũ ma Saioni nĩmew'aa na kũtana,
na ndũa sya Yuta iyĩw'a mũyo,
nũndũ wa motw'ĩo maku we Mwĩai Ngai.
9Nũndũ we Mwĩai Ngai wĩ mũnene mũno ĩũlũ wa nthĩ yonthe;
nũnenevetw'e mbee wa ngai syonthe.
10Mwĩai Ngai nĩwendete ala mamenete ũthũku,
nũsũvĩaa mathayũ ma andũ make;
nũmatangĩĩaa kuma ũtonyinĩ wa ala athũku.
11Kyeni nĩkĩtisaa kwondũ wa ala alũngalu,
ala alũngalu nĩmethĩawa na ũtanu ngoonĩ.
12Tanai nthĩnĩ wa Mwĩai Ngai inyw'ĩ ala alũngalu,
na mũitaĩa ĩsyĩtwa yake ĩtheu.
Currently Selected:
Sav 97: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
