Sav 91
91
Ngai nĩwe Mũsũvĩi Waitũ
1Mũndũ ũla wĩkalaa ũsũvĩonĩ wa Ũla wĩ Ĩũlũ Mũno,
ũla wĩkalaa muunyĩnĩ wa Mwene Ũtonyi W'onthe,
2akeea Mwĩai Ngai atĩĩ, “Nue ũsũvĩo na wĩvitho wakwa;
Ngai wakwa ũla nĩkwatasya!”
3Kwa w'o Ngai akakũvonokya kuma kĩteinĩ kya ũla ũteaa,
na kuma ũwaunĩ mũthũku mũno.
4Akakũvw'ĩka na nzĩa syake;
ungu wa nthwau syake ũkakwata wĩvitho;
ũĩkĩĩku wake nĩ ngao na kakalo kaku.
5Ndũkakĩa ũtĩsyo wa ũtukũ,
kana ĩangi yĩla yĩkaw'a mũthenya,
6kana ũwau mũthũku ũla wũkaa ũtukũ,
kana mothũku ala moaa mũthenya katĩ.
7O na andũ ngili nĩmatonya kũkw'a me vakuvĩ naku,
ĩĩ, andũ ngili ĩkũmi me kw'okonĩ kwaku kwa aũme,
ĩndĩ we ndũkwatwa nĩ ũthũku.
8Ũkasyaĩĩsya na metho maku,
na kwona ũndũ ala athũku makanaw'a.
9Nũndũ nũtw'ĩkĩthĩtye Mwĩai Ngai wĩvitho waku;
Ngai Ũla wĩ Ĩũlũ Mũno mũsũvĩi waku.
10Ndũkakwatwa nĩ ũndũ ũthũku,
mũsyĩ waku ndũkathengeewa nĩ ũthũku o na wĩva.
11 #
Mat 4.6; Lk 4.10 Nũndũ Ngai akeeaĩa alaĩka make,
makũsũvĩe kw'onthe kũla wĩthi,
12 #
Mat 4.6; Lk 4.11 namo makakũkwatĩĩa na moko moo,
nĩ kana o na maũũ maku maikaũmĩw'e nĩ mavia.
13 #
Lk 10.19
Ũkakinyanga mĩnyambũ na syĩmbuva;
ũkakinyangĩa nthĩ mĩnyambũ yĩ kaũ na nzoka syĩ sumu.
14Mwĩai Ngai easya atĩĩ, “Ngatangĩĩa ũla ũmbendete;
ngamũsũvĩa nũndũ nũkũsĩĩaa kana ninyie Mwĩai Ngai.
15Ambĩkaĩla ngamũsũngĩa,
e thĩnanĩ ngeethĩwa vamwe nake,
ngamũtangĩĩa na kũmũnenevya.
16Ngamũtuva kwa kũtuma ekala thayũ myaka mingĩ,
na kũmũtangĩĩa.”
Currently Selected:
Sav 91: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
