Sav 90
90
ĨVUKU YA KANA
Sav 90—106
Andũ Nĩmakusaa ĩndĩ Ngai nĩ wa Tene na Tene
Mboya ya Mwose mũndũ wa Ngai.
1We Mwĩai wĩthĩĩtwe wĩ ũtũo witũ nzyawanĩ syonthe.
2Iĩma itanamba kwĩthĩwa,
o na ũtanamba kũmba nthĩ,
we wĩ Ngai tene na tene.
3Nũtũngaa mũndũ mũthanganĩ ĩngĩ,
ũyasya, “We mũndũ syoka mũthanganĩ,”
4 #
2Vet 3.8
Kwaku myaka ngili ĩmwe nĩ ũndũ ũmwe na mũthenya ũmwe,
ĩilyĩ ta mũthenya ũla ũminĩte kũvĩta,
kana ta masaa manini ala mũndũ ũvangĩwe kũsunga ũtukũ.
5Nũminaa andũ kwa mĩtũkĩ ta ndoto;
mailyĩ ta nyeki ĩla ĩsanzamũkaa kwakya.
6Kwakya nĩyĩthĩawa ĩilyĩ nesa na yĩ nzanzamũku;
ĩa mawĩoo nĩvovaa na ĩyũma.
7Nĩtũminawa nĩ ũthatu waku,
na kũtelemw'a nĩ woo waku mwingĩ.
8Wiĩte naĩ sitũ mbee waku,
naĩ sitũ sya kĩmbithĩ vala ũtonya kũsyona.
9Matukũ maitũ makuvĩvaw'a nĩ ũthatu waku;
myaka yaitũ ĩthelaa mĩtũkĩ o ta kũvevũũka.
10Twĩkalaa thayũ myaka mĩongo mũonza,
kana ũla wĩ na vinya ayĩkala myaka mĩongo nyanya.
Ĩndĩ ũu wĩ o vo, myaka ĩsu yĩthĩawa yĩ ya thĩna na kĩĩo;
nĩthelaa mĩtũkĩ na tũyaa.
11Nũũ ũla wĩsĩ vinya wa ũthatu waku?
Nũũ ũla wĩsĩ w'ĩa ũla ũtonya kũetwe nĩ woo waku?
12Kwoou tũmanyĩsye ũndũ thayũ witũ ũkuvĩvĩte,
nĩ kana twĩthĩwe na ũĩ.
13Tũsyokee ame Mwĩai Ngai;
wĩendeea kũthata nginya ĩndĩĩ?
Ĩw'ĩa athũkũmi maku tei!
14Kĩla kwakya twĩanĩae na wendo waku ũtaolekaa,
nĩ kana tũtane na kwĩw'a mũyo mĩthenyanĩ yonthe ya thayũ witũ.
15Tũnenge mĩthenya ya ũtanu yĩana ta ĩla ũtũthĩnĩtye,
na myaka yĩana ta ĩla twonete thĩna.
16Eka ithyĩ athũkũmi maku twone wĩa waku,
na ũieka nzyawa sitũ syone ũkumyo waku mũnene.
17Ũathimo wa Mwĩai Ngai waitũ nĩwĩthĩwe naitũ.
Tũnenge ũsindi maũndũnĩ maitũ onthe ala tũkwĩka!
Ĩĩ, maũndũnĩ maitũ onthe ala tũkwĩka!
Currently Selected:
Sav 90: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
