Sav 9
9
Kũtũngĩa Ngai Mũvea nũndũ wa Ũw'o Wake
Kwa mwinĩthya: Savulĩ ĩno yaandĩkiwe nĩ Ndeviti
1We Mwĩai Ngai ngakũtaĩaa na ngoo yakwa yonthe;
ngatavanasya mawĩa maku ma kũseng'ya ala wĩkaa.
2Ngatana na kwĩw'a mũyo mũno nthĩnĩ waku;
ngaina ngĩkumya ĩsyĩtwa yaku we Ũla wĩ Ĩũlũ Mũno.
3Yĩla amaitha makwa makwona,
nĩmasyokaa na ĩtina;
nĩmavalũkaa nthĩ makathela vyũ.
4Nũmbĩkĩte ũndũ ũla waĩlĩte;
nĩwĩkalĩte kĩvĩlanĩ kyaku kya kĩ-ũsumbĩ,
na ũkaumya ũsili wa ũlũngalu.
5Nũkanĩtye andũ ma nthĩ ingĩ,
na ũkamina ala avuku.
Nĩwavutie masyĩtwa moo kũvika tene na tene.
6Amaitha maitũ nĩmathelete kũvika tene na tene;
nĩwanangĩte ndũa syoo na makola vyũ.
7Ĩndĩ Mwĩai Ngai nũsumbĩkaa tene na tene,
nũlũlũmĩĩlye kĩvĩla kyake kya kĩ-ũsumbĩ nĩ kana asilĩle.
8Nũsumbĩkaa nthĩ na ũlũngalu;
nũsilĩlaa nthĩ ingĩ na sila wa katĩ.
9Mwĩai Ngai nĩwe wĩvitho mũlũmu wa ala mathĩnaw'a,
wĩvitho mũlũmu ĩvindanĩ ya thĩna.
10Ala makwĩsĩ nĩmakũĩkĩĩaa,
nũndũ we Mwĩai Ngai ndwaatia ala makũmanthaa.
11Inĩai Mwĩai Ngai ũla ũsumbĩkaa e Saioni mbathi sya kũmũtaĩa,
tavany'ai meko make andũnĩ ma mbaĩ syonthe.
12Ngai nũlilikanaa ala mathĩnaa;
ndolawa nĩ kĩĩo kyoo,
na nũkanasya ala mamavĩtĩasya.
13Ame Mwĩai Ngai mbĩw'ĩe tei,
sisya mathĩna ala ngũthĩnw'a nĩ amaitha makwa,
we ũla ũndangĩĩaa kuma kĩkw'ũnĩ,
14nĩ kana nĩmatavye andũ ma Yelũsalemu,
maũndũ onthe ala meũtuma ngũtaĩa.
Ngatana nũndũ nũndangĩĩte.
15Andũ ma nthĩ ingĩ nĩmalikile ĩimanĩ yĩla menzĩte;
maũũ moo nĩmakwatiw'e nĩ mũteo ũla mateie.
16Mwĩai Ngai nĩwĩvuanĩtye kwa nzĩa ya ũsili wake wa katĩ;
ala athũku nĩmakwataw'a nĩ maũndũ ala mekaa.
Sela
17Kĩkw'ũ nĩkyo mũminũkĩlyo wa andũ onthe ala athũku;
andũ onthe ala maleaa Ngai.
18Ĩndĩ athĩni maikola o na ĩndĩĩ,
na wĩkwatyo wa ngya ndũkathela tene na tene.
19Ame Mwĩai Ngai ũkĩla, ndũkaeke andũ makũvũthye!
Ete andũ ma nthĩ mbee waku na ũimasilĩla.
20Ame Mwĩai Ngai mekĩe w'ĩa;
eka andũ ma nthĩ mamanye kana mo no andũ.
Sela
Currently Selected:
Sav 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
