Sav 10
10
Mboya ya Ala Mathĩnaw'a
1Ame Mwĩai Ngai nĩkĩ wĩ vaasa mũno?
Wĩvithaa ĩvindanĩ yĩla twĩ na mathĩna nĩkĩ?
2Andũ athũku me na ngathĩĩo nĩmathĩnasya ngya mũno;
eka nemo ene makwatwe nĩ mĩvango ĩla maseũvĩtye.
3Mũndũ mũthũku ekathĩĩaa nũndũ wa mawendi mathũku ala wĩ namo;
mũndũ wĩ na ĩtomo ya syĩndũ nũmũumaa na kũmũvũthya Mwĩai Ngai.
4Nũndũ wa ngathĩĩo mũndũ mũthũku ndamanthaa Ngai,
mesilyanĩ make onthe vai mwanya wa Ngai.
5Kĩla ĩvinda mũndũ mũthũku nũendeeaa nesa maũndũnĩ make;
ndatonya kũmanya ũndũ ũsilĩlo wa Ngai ũilyĩ;
nũvũthasya amaitha make onthe.
6Asũanĩaa akasya, “Ndikathingithw'a nĩ kĩndũ;
ngeethĩawa na ũtanu ĩvinda yonthe,
na ndikethĩwa na thĩna o na ĩndĩĩ.”
7 #
Alo 3.14
Aneenaa ndeto sya kũumana, ũvũngũ na sya kũtelemya.
Nĩwendete kũneena ndeto sya kĩmena na nthũku.
8Ekalaa kũndũ motũinĩ oveesye;
nĩwumaa kĩthekanĩ akoaa andũ matena ĩvĩtyo.
Nũsyaĩĩasya evithĩte one ala matetonya.
9Oveeasya evithĩte ta mũnyambũ wĩ kĩsumonĩ kyaw'o,
oveeasya nĩ kana akwate ngya;
nũmakwataa na kũmakusĩĩsya mũteonĩ wake.
10Ũla ũtetonya nũvithũkĩawa na kũvalũkw'a nthĩ;
nũvalũkaw'a nĩ ũtonyi wa mũndũ mũthũku.
11Mũndũ mũthũku asũanĩaa akasya,
“Ngai nĩwũlĩtwe; nũvw'ĩkĩte ũthyũ wake, na ndesa kwona kĩndũ.”
12Ame Mwĩai Ngai ũkĩla; ame Ngai kany'a mũndũ ũsu mũthũku,
ndũkolwe nĩ ala meũthĩna.
13Mũndũ mũthũku atonya kũvũthya Ngai ata?
Nĩkĩ ũsũanĩaa akasya, “Ngai ndengany'a?”
14Ĩndĩ we Mwĩai Ngai nĩwene ala me na thĩna na kyeva;
nĩwĩyũmbanĩtye kĩla ĩvinda kũmatetheesya.
Mũndũ ũla ũtetonya nũkwĩkwatasya we Mwĩai Ngai;
kĩla ĩvinda nue wĩthĩawa wĩ ũtethyo wa syana ndiwa.
15Mina vinya wa mũndũ ũla mũthũku na wĩkaa naĩ;
mũkany'e nũndũ wa maũndũ mathũku ala wĩkĩte,
nginya wĩthĩe ndatonya kũmeka ĩngĩ.
16Mwĩai Ngai nĩ mũsumbĩ tene na tene;
andũ ma nthĩ ingĩ makathela kuma nthĩ yake.
17Ame Mwĩai Ngai nĩwĩthukĩĩasya kwenda kwa ala mathĩnaw'a;
nũmathangaasya na ũyĩthukĩĩsya kĩĩo kyoo.
18Ete sila wa katĩ kwa syana ndiwa na kwa ala mathĩnaw'a,
nĩ kana vaikethĩwe mũndũ o na wĩva ĩũlũ wa nthĩ,
ũtonya kũthĩny'a andũ ĩngĩ.
Currently Selected:
Sav 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
