Sav 72
72
Mboya kwondũ wa Mũsumbĩ
Savulĩ ĩno yaandĩkiwe nĩ Solomoni.
1Ame Ngai nenga mũsumbĩ ũsili waku wa katĩ,
na ũinenga mwana wa mũsumbĩ ũlũngalu waku.
2Nĩasilany'e andũ maku na ũlũngalu,
na aisilany'a ngya na ũsili wa katĩ.
3Iĩma nietee andũ maendeeo,
na tũlĩma tũiete matunda ma ũlũngalu.
4Mũsumbĩ nĩasilany'e ngya kwa nzĩa nzeo,
na aitangĩĩa syana sya athĩni,
na kũsinda ala mamathĩnasya.
5Mũsumbĩ nĩekale ĩvinda ĩasa ta syũa,
kana mwei nzyawanĩ syonthe.
6Mũsumbĩ nĩethĩwe ailyĩ ta mbua ĩkua mĩũndanĩ,
ta mbua ĩla ĩnyithasya nthĩ!
7Mĩthenyanĩ ya thayũ wake ũlũngalu wĩongeleka,
na mũuo ũyingĩva kũvika tene na tene.
8 #
Nzek 9.10
Akasumbĩka kuma ũkanganĩ ũmwe, kũthi kũvika ũla ũngĩ;
kuma Ũsĩnĩ wa Euvalati kũthi kũvika mũminũkĩlyonĩ wa nthĩ.
9Amaitha make makakumana mbee wake,
nthũ syake ikavalũka nthĩ!
10Asumbĩ ma Talisisi na ma nthĩ syĩ kũasa ila syĩ ũtee wa ũkanga makamũeteae koti;
asumbĩ ma Sieva na ma Seva makamũetee mĩthĩnzĩo!
11Asumbĩ onthe makakumana mbee wake mamũnenge ndaĩa,
na andũ onthe ĩũlũ wa nthĩ makamũthũkũmaa.
12Nũvonokasya mũndũ mũthĩni amwĩkaĩla,
na nũvonokasya mũndũ ngya na ũla ũte na wa kũmũtetheesya.
13Nĩwĩw'ĩaa ala onzu na athĩni tei,
na kũtangĩĩaa mathayũ ma athĩni.
14Akamatangĩĩa kuma thĩnanĩ na ũng'endunĩ wa andũ,
nĩkwĩthĩwa e vata mũno na thayũ woo.
15Mũsumbĩ nĩekale thayũ tene na tene,
nĩanengwe thaavu kuma Sieva.
Andũ nĩmamũvoyeae kĩla ĩvinda,
na kũmũvoyeaa ũathimo kĩla ĩvinda.
16Nthĩ yĩthĩwe na ngetha mbingĩ ya ũsyao wa mbaa mbeke;
mĩmea nĩyusũe iĩmanĩ,
nĩyĩthĩwe na ũsyao ta wa kuma Levanoni.
Andũ nĩmaingĩve mũno ndũanĩ ta nyeki yĩ isesinĩ.
17Ĩsyĩtwa ya mũsumbĩ yĩikaaũle kũvika tene na tene;
nguma yake nĩyĩkale ĩvinda yonthe yĩla yũkĩte.
Andũ onthe ĩũlũ wa nthĩ makaathimwa kwĩsĩla vala ũĩ,
na makaasya kana mũsumbĩ nĩ mũathime.
18Nĩataĩwe Mwĩai Ngai, Ngai wa Ĩsilaeli,
ũla e weka wĩkaa maũndũ ma kũseng'ya.
19Ĩsyĩtwa yake yĩ ũkumyo nĩyĩtaĩwe tene na tene!
Nthĩ yonthe nĩyusũwe nĩ ũkumyo wake.
Ameni! Ameni!
20Ũsu nĩw'o mũminũkĩlyo wa mboya sya Ndeviti mwana wa Yese.
Currently Selected:
Sav 72: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
