Sav 71
71
Mboya ya Mũndũ Mũkũũ
1Ame Mwĩai Ngai nĩvithaa nthĩnĩ waku,
ndũkaaeke nĩsonokw'e o na ĩndĩĩ!
2Ũlũngalunĩ waku mbonokye na ũindangĩĩa;
tea kũtũ ũmbĩthukĩĩsye na ũindangĩĩa.
3Ĩthĩwa ĩvia yakwa ya wĩvitho,
vandũ valũmu va kũndangĩĩa,
nũndũ nue ĩvia yakwa na wĩvitho wakwa.
4Ame Ngai wakwa ndangĩĩe kuma ũtonyinĩ wa andũ athũku;
kuma vinyanĩ wa andũ athũku na mate aseo.
5Nĩkwĩthĩwa we Mwĩai nue wĩkwatyo wakwa,
nue we Mwĩai Ngai nĩĩkĩĩe kuma nĩ mũnini.
6Kuma yĩla nasyaiwe nue nĩkwatasya,
nue wambumisye ĩvunĩ ya mwaitũ;
ngakũtaĩaa ĩvinda yonthe.
7Thayũ wakwa wĩthĩĩtwe ngelekany'o kwa aingĩ,
ĩndĩ we nue wĩvitho wakwa mũlũmu.
8Nĩngũtaĩaa mũthenya w'onthe,
na kũtavany'a ũkumyo waku.
9Ndũkambĩkye ũtee ĩvindanĩ ya ũkũũ wakwa;
ndũkaandie yĩla vinya wakwa wĩthela.
10Nũndũ amaitha makwa maneenaa ĩũlũ wakwa,
na ala mambovasya mambũae maneenanasya vamwe,
11makasya atĩĩ, “Ngai nũmũtiĩte, mũatĩĩei mũmũkwate,
nũndũ vai mũndũ wa kũmũvonokya!”
12Ame Ngai ndũkathi vaasa nakwa,
Ngai wakwa ũka mĩtũkĩ ũndetheesye.
13Amaitha makwa nĩmakwatwe nĩ nthoni na kũminwa;
ala mendaa kũmbĩka naĩ nĩmakwatwe nĩ nthoni na kũvũthw'a.
14Ĩndĩ nyie ngeethĩawa na wĩkwatyo mavinda onthe;
o na ĩngĩ ngakũtaĩaa mbee na mbee.
15Ngatavanasya ĩũlũ wa meko maku ma ũlũngalu;
mũthenya w'onthe ngatavanasya ĩũlũ wa meko ma ũtangĩĩo waku,
o na kau nditonya kũmamanya onthe.
16Mwĩai Ngai Mũsumbĩ, ngooka na kũtavany'a maũndũ manene ala wĩkaa.
Ngatavany'a ĩũlũ wa ũlũngalu waku; ũlũngalu waku wĩ weka.
17Ame Ngai kuma nĩ mũnini nũmanyĩĩtye,
na kũvika o na ũmũnthĩ nĩndavanasya maũndũ ma kũseng'ya ala wĩkĩte.
18Kwoou Ngai, o na nĩ mũkũũ na nĩ na mbuĩ ndũkaandie,
nginya nĩtavany'e ĩũlũ wa vinya waku nzyawanĩ syonthe ila syũkĩte,
ũtonyi waku kwa kĩla ũmwe ũkoka.
19We Ngai ũlũngalu waku ũvikĩte matunĩ,
nĩwĩkĩte maũndũ manene.
We Ngai nũũ ũilyĩ taku?
20We ũla ũtumĩte nĩthĩwa na mathĩna maingĩ me woo,
nũũvuũkya thayũ wakwa ĩngĩ;
kuma kũndũnĩ kũliku nthĩ,
nũũmbũkĩlya ĩngĩ.
21Nũũtuma nĩthĩwa na ndaĩa mbingĩ,
na ũingiakisya ĩngĩ.
22We Ngai wakwa ngakũtaĩaa na ngitaa nene,
nĩkwĩthĩwa wĩ mũĩkĩĩku.
Ngaina ngĩũkumya na ngitaa nini,
we Ũla Mũtheu wa Ĩsilaeli.
23Ngookĩlasya wasya wa ũtanu,
yĩla ngũũtaĩa na mbathi,
nũndũ nũmbovoetye.
24Mũthenya w'onthe nganeenaa ĩũlũ wa ũlũngalu waku,
nũndũ ala mavangaa kũmbĩka naĩ nĩmasindiwe na masonokw'a.
Currently Selected:
Sav 71: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
