Sav 73
73
ĨVUKU YA KATATŨ
Sav 73—89
Ũsili wa Katĩ wa Ngai
Savulĩ ĩno yaandĩkiwe nĩ Asavu.
1Kwa w'o Ngai nĩ mũseo kwa Ĩsilaeli;
kwa ala atheu ngoo.
2Ĩndĩ ngalĩkonĩ ĩla yakwa nĩnĩnakilĩlye kũvalũka,
nĩnĩnakilĩlye kũtendelũka.
3Nũndũ nĩnĩneew'ĩaa ala me ngathĩĩo kĩwĩu,
yĩla noonie andũ ala athũku maendee nesa.
4Mayĩthĩawa na mathĩna,
nĩmethĩawa me na ũima wa mwĩĩ na me na vinya.
5Mayĩthĩawa na thĩna ũndũ andũ ala angĩ methĩawa naw'o,
na mainyamaa ta andũ ala angĩ.
6Kwoou ngathĩĩo nĩ ta syo ĩsoa yoo,
naw'o ũng'endu nĩ tayo ngũa yoo.
7Ngoo syoo syusũĩte mesilya mathũku,
na ilĩko syoo syusũĩte mĩvango mĩthũku.
8Nĩmavũthasya ala angĩ na kũneena maũndũ mathũku;
Nĩmekathĩĩaa na kũvanga mĩvango ya kũthĩny'a ala angĩ.
9Nĩmaneeneaa Ngai ndeto nthũku e ĩtunĩ,
na kũthi kĩla vandũ ĩũlũ wa nthĩ maneenete ndeto sya mana.
10O na andũ ma Ngai nĩmaatĩĩaa ngelekany'o yoo,
nĩmetĩkĩlaa kĩla meũneena,
na mayonaa ũndũ mũthũku ĩũlũ woo.
11Makũlasya, “Ngai atonya kũmanya ata?
Ũla wĩ Ĩũlũ Mũno e na ũĩ?”
12Andũ ala athũku methĩawa mailyĩ ũu.
Maendeeaa kwĩthĩwa na ũthwii mwingĩ mate na thĩna.
13Kwa w'o nĩtheetye ngoo yakwa mana,
na o ta ũu ndethetye wĩa wa mana kwĩsiĩĩa ndikeke naĩ!
14Mũthenya mũima nĩkalaa ngĩthĩnw'a,
na kũkanw'a kĩla kwakya.
15Kethĩwa nĩnaneenie ngasya, “Nĩngũneena maũndũ asu,”
nĩthĩwa ndaaĩka ta ũmwe wa andũ maku.
16Yĩla nendie kũmanya maũndũ aa onthe,
ũndũ ũsu waĩ na vinya mũno kwakwa,
17nginya yĩla nalikile Vandũnĩ vaku Vatheu.
Nĩvo ĩndĩ namanyie mũminũkĩlyo wa ala athũku.
18Kwa w'o ũkamaia kũndũ kũtendeu,
na ũituma malika wanangĩkonĩ.
19Maminawa kwa kavinda kakuvĩ,
na kwanangwa vyũ nĩ maũndũ ma kũtĩsya!
20Methĩawa mailyĩ ta ndoto ĩla yaaa mũndũ aamũka;
yĩla we Mwĩai Ngai wookĩla nĩmaaa.
21Yĩla ngoo yakwa yaĩ na kyeva,
na naĩ na woo mwingĩ thayũnĩ,
22naĩ mũndũ mũtumanu na mũng'endu,
nailyĩ ta nyamũ nĩ mbee waku.
23Ĩndĩ ũu wĩ o vo, kĩla ĩvinda nĩthĩawa nĩ vamwe naku.
Nũngwete kw'oko kwakwa kwa aũme.
24Nũndongoeasya na motao maku,
na ĩtina ũkanthokya ũkumyonĩ.
25Nĩ naũ ĩtunĩ ate o we?
Ĩũlũ wa nthĩ vai kĩndũ kĩngĩ ngwenda ate o we!
26O na neethĩwa nĩ mwonzu mwĩĩnĩ na thayũnĩ wakwa,
Ngai nĩwe vinya wakwa;
nĩwe kyonthe kĩla ndonya kwenda tene na tene.
27Onthe ala me kũasa naku makaa;
ũkaananga ala mate aĩkĩĩku kwaku.
28Ĩndĩ ngalĩkonĩ ĩla yakwa nĩ ũseo kwĩthĩwa vakuvĩ na Ngai.
Nĩnĩtw'ĩte Mwĩai Ngai Mũsumbĩ wĩvitho wakwa;
ngatavany'a ĩũlũ wa mawĩa maku onthe.
Currently Selected:
Sav 73: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
