Sav 69
69
Kĩĩo kya Kĩmako Kĩnene
Kwa mwinĩthya: Savulĩ ĩno yaandĩkiwe nĩ Ndeviti
1Ame Ngai ndangĩĩe,
nĩkwĩthĩwa kĩw'ũ kĩmbikĩte ngingo.
2Nĩendee kũlika ndakanĩ ndiku,
vala vate vandũ va kũũngama.
Nĩlikĩte kĩw'ũnĩ kĩliku mũno,
na itulumo syĩsĩlĩte ĩũlũ wakwa.
3Nĩnĩnoetw'e nĩ kwĩtana nĩtetheew'e,
na mĩmeo yakwa nĩ ng'alu.
Metho makwa maikwona nesa,
ngweteelete we Ngai wakwa.
4 #
Sav 35.19; Yoa 15.25 Ala mamenaa vate kĩtumi,
nĩ aingĩ mbee wa nzw'ĩĩ sya mũtwe wakwa;
Amaitha makwa maneenaa ũvũngũ ĩũlũ wakwa;
ala mendaa kũmbũaa me na vinya,
ala mendaa kũmina na maũndũ ma ũvũngũ.
Ndonya ata kũtũnga kĩndũ ndaaũya?
5Ame Ngai nĩwĩsĩ ũtumanu wakwa;
nĩwĩsĩ nesa naĩ syakwa syonthe.
6Mwĩai Ngai Mũsumbĩ Mwene Ũtonyi W'onthe, ala makwĩkwatasya maikaasonoke nũndũ wakwa.
Ame Ngai wa Ĩsilaeli, ala maũmanthaa maikaakwatwe nĩ nthoni nũndũ wakwa.
7Nĩkwĩthĩwa nĩvũthĩtw'e nũndũ waku,
na ngakwatwa nĩ nthoni mbingĩ.
8Nĩilyĩ ta mũndũ mũeni kũla kwĩ ana-a-ĩthe makwa,
na ta mũndũ wa nthĩ ĩngĩ kũla kwĩ ana-a-inyia makwa.
9 #
Yoa 2.17; Alo 15.3 Wendo wakwa wa nyũmba yaku nũũndya,
na numano sya ala makũumangaa ningwatĩte.
10Yĩla naĩie na kũtĩĩa kũya,
andũ nĩmambũthisye.
11Neekĩa ngũa ngaamu sya makunia,
andũ nĩmanthekeeie.
12Ala mekalaa mũvĩanĩ nĩmanzukaa,
athengi nĩmaseũvasya mbathi ĩũlũ wakwa.
13Ĩndĩ Mwĩai Ngai nĩngũũvoya,
nĩ kana ĩvindanĩ yaku yĩla yaĩlĩte na wendonĩ waku mwingĩ ũtaolekaa,
ame Ngai, ũnzũngĩe na ũtangĩĩo waku wa w'o.
14Ndangĩĩe ndikalike ndakanĩ;
mbonokye kuma amaithanĩ makwa,
na kuma kĩw'ũnĩ kĩliku.
15Ndũkaeke kĩw'ũ kingĩ kĩmbwĩke,
kana nĩlike kĩw'ũnĩ kĩliku,
kana nĩvw'ĩkĩĩwe mbũanĩ.
16Ame Mwĩai Ngai nzũngĩe,
kumana na ũseo wa wendo waku ũtaolekaa;
nzisye na tei waku mwingĩ.
17Ndũkambĩvithĩle nyie mũthũkũmi waku,
nzũngĩe mĩtũkĩ nĩkwĩthĩwa nĩ thĩnanĩ.
18Thengeea vala nĩĩ ũndangĩĩe,
mbovosye kuma amaithanĩ makwa.
19Nĩwĩsĩ ũndũ nĩumangĩtwe,
ũndũ nĩvũthĩtw'e na ngalea kũnengwa ndaĩa;
nĩwene amaitha makwa onthe.
20Kĩvũthya nĩkĩmbũaĩte ngoo,
na kĩkatuma nĩthĩwa nde na wĩkwatyo;
Nĩnamanthie tei ĩndĩ ndyaawona;
nĩnamanthie andũ ma kũngiakisya ĩndĩ ndyaamona.
21 #
Mat 27.48; Mk 15.36; Lk 23.36; Yoa 19.28-29 Manengie sumu vandũ va lĩu,
na yĩla naĩ na waũni manenga ndivai ngaatu.
22 #
Alo 11.9-10
Mboka syoo nitw'ĩke mũteo kwoo;
mboka syoo sya Kĩ-ũthaithi nimakwatye.
23Metho moo nĩmamesye mbindu nĩ kana maikone,
na mĩongo yoo ĩikonzeka tene na tene.
24Nĩmaete ũsilĩlo waku;
ũthatu waku mwingĩ nĩwĩthĩwe ĩũlũ woo.
25 #
Meko 1.20
Kũla mambĩte maeema kũikaatũe mũndũ;
maeema moo maikaaĩkale mũndũ.
26Nĩkwĩthĩwa mathĩnasya ala ũkanĩtye,
na maneenaa ĩũlũ wa mathĩna ma ala ũũmĩĩtye.
27Mongeleele ũkany'o ĩũlũ wa ũkany'o,
na ndũkaaeke methĩawe na kĩanda ũtangĩĩonĩ waku.
28 #
Kuma 32.32; Ũvu 3.5; 13.8; 17.8 Masyĩtwa moo nĩmavutwe ĩvukunĩ ya thayũ,
maikaandĩkwe ĩvukunĩ ya ala alũngalu.
29Ĩndĩ nĩ na kyalya na thĩna mwingĩ;
ame Ngai eka ũtangĩĩo waku ũnzũvĩe.
30Ngataĩa ĩsyĩtwa ya Ngai na wathi;
ngamũkumya kwa kũmũtũngĩa mũvea.
31Ũndũ ũsu ũkendeesya Mwĩai Ngai mbee wa kũmũthembea ng'ombe,
kana kũmũthembea kasalũ kena mbya na mavũngũ.
32Ngya ikoona ũu na iyĩw'a mũyo;
ala mathaithaa Ngai makathangaaw'a.
33Mwĩai Ngai nĩwĩw'aa mboya sya athĩni,
na ndolawa nĩ ala make ove.
34Ĩtu na nthĩ taĩai Ngai,
mokanga na syonthe ila iendaa nthĩnĩ wamo nimũtaĩae.
35Akatangĩĩa Saioni,
na kwaka ĩngĩ ndũa sya Yuta.
Nĩvo ĩndĩ andũ make metũa vo na kũmĩmesya.
36Nzyawa sya athũkũmi make ikamĩtiĩwa,
na onthe ala mamwendete makatũa vo.
Currently Selected:
Sav 69: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
