Sav 66
66
Wathi wa Kũtaĩa na Kũtũnga Mũvea
Kwa mwinĩthya: Wathi.
1Andũ onthe ĩũlũ wa nthĩ,
ũkĩlĩlyai Ngai wasya wa ũtanu!
2Inai ĩũlũ wa ũkumyo wa ĩsyĩtwa yake,
mũtaĩei na mbathi sya kũmũkumya.
3Tavyai Ngai mũmwĩe atĩĩ, “Maũndũ ala wĩkaa kaĩ nĩ ma kũseng'ya!
Vinya waku nĩ mũnene mũno,
nginya amaitha maku makenyivya mbee waku maikũkĩa.
4Andũ onthe ĩũlũ wa nthĩ nĩmakũthaithaa;
nĩmakwinĩaa mbathi sya ũkũtaĩa,
nĩmainaa maikumya ĩsyĩtwa yaku.”
Sela
5Ũkai mwone ũndũ Ngai wĩkĩte,
mawĩa make ma kũseng'ya ala wĩkĩte nũndũ wa mũndũ!
6 #
Kuma 14.21; Yos 3.14-17 Nĩwatw'ĩkĩthisye ũkanga nthĩ nyũmũ;
andũ nĩmaingie ũsĩ maendete na maũũ.
Twĩ vau nĩtwatanie mũno nũndũ wake.
7Nũsumbĩkaa na vinya wake tene na tene,
nũsyaĩĩasya andũ ĩũlũ wa nthĩ.
Ala ang'endu maikekathĩĩe.
Sela
8Inyw'ĩ andũ taĩai Ngai,
na mũituma wasya wa kũmũtaĩa wĩw'ĩka.
9Nũtwĩkalĩtye twĩ thayũ,
na ndaaĩtĩkĩla tũvalũke.
10Nĩkwĩthĩwa we Ngai nĩwatũtatie;
nũtũtatĩte ũndũ silĩva ũsiaw'a na mwaki.
11Nĩwatũlikilye kĩteinĩ,
na watwaĩkya mĩio mĩito.
12Nĩwaekie amaitha maitũ matũsinda;
nĩtwesĩlile kĩw'ũnĩ na mwakinĩ,
ĩndĩ nĩwatũetie vandũnĩ ve ũsũvĩo.
13Ngaete nthembo ya kũvĩvw'a nyũmbanĩ yaku;
ngeanĩsya mawĩvĩto makwa kwaku,
14mawĩvĩto ala neevĩtie na ilomo syakwa,
na kanyw'a wakwa waneena yĩla naĩ thĩnanĩ.
15Ngakũthembea nthembo ya kũvĩvw'a ya nyamũ nou,
nthembo ya ndũũme, nzaũ na mbũi.
Sela
16Inyw'onthe ala mũkĩaa Ngai ũkai mwĩthukĩĩsye,
na nĩngũmũtavya ũndũ Ngai ũmbĩkĩte.
17Nĩnamwĩkaĩlile na kanyw'a wakwa,
na namũtaĩa na ũĩmĩ wakwa.
18Kethĩwa nĩnekalilye ũthũku ngoonĩ yakwa,
Mwĩai ndethĩwa aambĩthukĩĩsya.
19Ĩndĩ kwa w'o Ngai nũmbĩthukĩĩsye,
na akew'a mboya syakwa.
20Ngai nĩataĩwe,
ũla ũtaalea mboya syakwa,
kana akaeka kũmbenda na wendo wake ũtaolekaa.
Currently Selected:
Sav 66: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
