Sav 65
65
Wathi wa Kũtaĩa na Kũtũnga Mũvea
Kwa mwinĩthya: Savulĩ ĩno yaandĩkiwe nĩ Ndeviti
1We Ngai nĩwaĩlĩte kũtaĩawa kũu Saioni,
andũ makeanĩsya mawĩvĩto moo kũla ũĩ.
2We ũla wĩw'aa mboya,
andũ onthe makooka kwaku.
3Yĩla naĩ sitũ syatũkĩlĩtye vinya,
we nĩwatũekeie mavĩtyo maitũ.
4Nĩ aathime ala ũnyuvĩte na ũkamathengeesya vakuvĩ,
nĩ kana mekalae wĩkalonĩ waku!
Tũkeanĩwa nĩ ũseo wa nyũmba yaku,
Ĩkalũ yaku ĩtheu!
5Ame Ngai Mũtangĩĩi waitũ,
ũkatũsũngĩa na maũndũ ma kũseng'ya ma ũlũngalu.
Nue wĩkwatyo wa andũ onthe ĩũlũ wa nthĩ,
o na kũvika ala me mokanganĩ me kũasa.
6Nue waseũvisye iĩma kwa vinya waku,
wĩ na ũtonyi waku mũnene.
7Nũvindĩthasya kĩlitũko kya ũkanga,
kĩlitũko kya itulumo syaw'o,
na ituu sya andũ.
8Kwoou andũ onthe ĩũlũ wa nthĩ nĩmaũkĩaa,
nũndũ wa maũndũ manene ala wĩkĩte.
Maũndũ ala wĩkĩte nĩmatumaa andũ onthe ĩũlũ wa nthĩ,
mokĩlya wasya wa ũtanu.
9Nũsũvĩaa nthĩ na kũmĩnyithya,
nũtumaa yĩthĩwa yĩ nou mũno.
Ũsĩ wa Ngai wusũĩte kĩw'ũ,
nĩ kana andũ makwate ngetha ya mbaa mbeke,
nũndũ nue ũseũvĩtye nthĩ ũu.
10Nũnyithasya mĩkao ya mĩũnda na kĩw'ũ kingĩ,
na kwĩanany'a kũndũ kwayo kũtũlu.
Nĩwololoasya mũthanga na mbua,
na kũtuma mĩmea ĩla ĩvandĩtwe yĩana.
11Nũtumaa mwaka mũima wĩthĩwa na moseo maku,
vala wesĩla nĩvatiawa ũathimo mwingĩ.
12Isesi ila syĩ weũnĩ syusũĩte indo,
nasyo iĩma syusũĩte ũtanu.
13Isesi syusũĩte malondu;
myanda yusũĩte ngetha ya mbaa mbeke,
syĩndũ syonthe syĩũkĩlya wasya wa ũtanu na kwina.
Currently Selected:
Sav 65: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
