Sav 59
59
Kũvoya Ũsũvĩo kuma kwa Ngai
Kwa mwinĩthya: Savulĩ ĩno yaandĩkiwe nĩ Ndeviti. Amĩandĩkie yĩla Saũlo watũmie andũ mathi nyũmba kwake makamũae
1 #
1Sam 19.11
Ame Ngai wakwa, mbonokye kuma amaithanĩ makwa,
nzũvĩe kuma kwa ala mambithũkĩaa!
2Mbonokye kuma kwa andũ asu athũku;
ndangĩĩe kuma kwa oaani.
3Sisya, nĩmambovetye mambũae;
andũ athũku nĩmombanaa mambũmĩsye.
Ame Mwĩai Ngai, mayĩkaa ũu nĩkwĩthĩwa nĩnĩvĩtĩtye kana ngeka naĩ.
4Vai ĩvĩtyo nĩkĩte, ĩndĩ nĩmeyũmbanĩtye kũmbithũkĩa;
ũkĩla ũndetheesye; sisya thĩna wakwa.
5Ame Mwĩai Ngai, Ngai Mwene Ũtonyi W'onthe, Ngai wa Ĩsilaeli,
ũkĩla ũkany'e nthĩ syonthe.
Ndũkew'ĩe tei andũ athũku ala mathooasya angĩ.
Sela
6Masyokaa ĩa mawĩoo makayĩte ta ngitĩ,
na kũthyũlũlũkangĩla ndũanĩ.
7Ĩthukĩĩsye ũndũ meũneena ndeto sya kũumana na kũtelemya.
Nĩmĩ syoo iilyĩ mbyũ syĩ makanyw'anĩ moo,
ĩndĩ masũanĩaa makasya, “Nũũ ũla wĩtwĩw'a?”
8Ĩndĩ we Mwĩai Ngai nũmathekeeaa.
Nũvũthasya andũ onthe ma nthĩ ingĩ.
9Ame vinya wakwa nĩngũkweteela;
nũndũ we Ngai nue wĩvitho wakwa.
10Ngai wakwa akandongoesya na wendo wake ũtaolekaa,
Ngai wakwa akatuma nona amaitha makwa me asinde.
11Ame Ngai ndũkamoae,
nĩ kana andũ makwa maikese kũlwa.
Manyaĩĩkye kwa vinya waku na ũimasinda,
ame Mwĩai ngao yaitũ.
12Nũndũ wa naĩ ya makanyw'a moo,
na ndeto sya ilomo syoo,
nĩmakwatw'e nĩ ngathĩĩo syoo,
nũndũ wa kũumana na kũkengana kwoo.
13Mamine ũthatunĩ waku;
mamine mathele vyũ.
Nĩvo ĩndĩ andũ onthe ĩũlũ wa nthĩ,
memanya kana Ngai nĩwe ũsumbĩkaa Ĩsilaeli,
na kũsumbĩka kĩla vandũ ĩũlũ wa nthĩ.
Sela
14Amaitha makwa masyokaa ĩa mawĩoo makayĩte ta ngitĩ,
na kũthyũlũlũkangĩla ndũanĩ.
15Mangangaa kĩla vandũ maimantha lĩu,
na nĩmalumaa malea kũvũna.
16Ĩndĩ ngainaa ĩũlũ wa vinya waku;
kĩla kwakya ngainaa ĩũlũ wa wendo waku ũtaolekaa,
nĩkwĩthĩwa wĩthĩĩtwe wĩ wĩvitho wakwa,
ũsũvĩo wakwa ĩvindanĩ ya thĩna.
17We vinya wakwa ngakwinĩa ngĩkũtaĩa;
nĩkwĩthĩwa we Ngai nue wĩvitho wakwa,
Ngai ũla ũmbendete.
Currently Selected:
Sav 59: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
