Sav 50
50
Ũthaithi wa W'o
Savulĩ ĩno yaandĩkiwe nĩ Asavu
1Mwĩai Ngai Mwene Ũtonyi nũneenaa,
na kwĩta andũ ma nthĩ yonthe kuma wumĩlonĩ wa syũa kũvika ũthũĩlonĩ wayo.
2Ngai nũtisaa kuma Saioni,
ndũa mbanake mũno.
3Ngai waitũ nĩwũkĩte na ndevindya;
atongoew'e nĩ mwaki ũvĩvasya,
athyũlũlũkĩtwe nĩ kĩuutani kĩ vinya.
4Ngai nĩwĩtaa ĩtu na nthĩ ikũsĩĩe,
nĩ kana asilĩle andũ make.
5Nũneenaa akasya,
“Mbũmbanĩsye andũ makwa aĩkĩĩku,
ala maseũvisye ũtianĩo nakwa kwa kũthemba nthembo.”
6Matu nĩmatavanasya kana Ngai nĩ mũlũngalu,
nũndũ Ngai mwene nĩwe mũsili.
Sela
7Ame andũ makwa, ĩthukĩĩsyei na nĩngũneena.
Ame Ĩsilaeli nĩngũkũsĩĩa ĩũlũ waku.
Ninyie Ngai, Ngai waku.
8Ndiũmũkany'a nũndũ wa nthembo syenyu,
kĩla ĩvinda nĩmũnthembeaa nthembo sya kũvĩvya.
9Nyie ndikwenda tũsalũ kuma ndĩthyanĩ syenyu,
kana nthenge kuma itũũnĩ syenyu.
10Nũndũ nyamũ syonthe ila syĩ kĩthekanĩ nĩ syakwa,
na ng'ombe syĩ iĩmanĩ ngili mbingĩ nĩ syakwa.
11Nyũnyi sya yayaya syonthe nĩ syakwa,
na syĩndũ syonthe ila syĩ thayũ nĩ syakwa.
12“Kethĩwa nĩnĩsa kwĩw'a nzaa ndimũtavya,
nũndũ nthĩ na syĩndũ syonthe ila syĩ ĩũlũ wayo nĩ syakwa.
13Nĩkũlya, nĩnĩĩsaa nyama sya tũsalũ,
kana nganyw'a nthakame ya mbũi?
14Thembeai Ngai nthembo sya kũtũnga mũvea,
na mũyĩanĩsya mawĩvĩto menyu kũla kwĩ Ũla wĩ Ĩũlũ Mũno.
15Ĩvindanĩ ya mathĩna mbĩkaĩlei,
ngamũtangĩĩaa nenyu mũkandaĩa.”
16Ĩndĩ Ngai ekũlya ũla mũthũku atĩĩ,
“Wĩtavany'a motw'ĩo makwa nĩkĩ?
Wĩneena ĩũlũ wa ũtianĩo wakwa nĩkĩ?
17Nũleaa ngĩũkany'a,
na nũleaa ndeto syakwa.
18Woona kĩng'ei ũtw'ĩkaa mũnyanyae wakyo,
na wĩ ngwatanĩo na ilaalai.
19“Kĩla ĩvinda wĩthĩawa wĩyũmbanĩtye kũneena ũthũku,
o na ndwĩw'aa nthoni ũikengana.
20Wĩthĩawa wĩyũmbanĩtye kũneenea mwana-a-ĩthe waku,
na nũsukaa mwana-a-inyia waku.
21Wĩkĩte maũndũ asu onthe na ngavindya,
na kwoou wasũanĩa nĩilyĩ taku.
Ĩndĩ yu nĩngũũkany'a,
na ngĩũvuanĩsya maũndũ asu vyũ.
22“Ĩthukĩĩsye maũndũ aa we ũla wũlawa ninyie,
kana ngũtilange ilungu vate mũndũ ũkũtaany'a!
23Ũla ũthembaa nthembo ya kũtũnga mũvea anengae ndaĩa,
na ũla ũlũngalasya mwĩkalo wake ngamũtangĩĩa.”
Currently Selected:
Sav 50: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
