Sav 49
49
Ũtumanu wa Kwĩkwatya Ũthwii
Kwa mwinĩthya: Savulĩ ĩno yaandĩkiwe nĩ nzyawa sya Kola
1Andũ onthe ĩthukĩĩsyei ũndũ ũũ!
Teai matũ inyw'ĩ ala mũtũaa ĩũlũ wa nthĩ,
2ala anene na ala anini,
athwii vamwe na ngya.
3Nĩngũneena ndeto sya ũĩ;
mosũanĩo ma ngoo yakwa nĩmekũete ũmanyi.
4Nĩngũtea kũtũ kwakwa nĩw'e nthimo,
na ngĩelesya ũndũ ĩkwasya nĩendee kũkũna ngitaa nini.
5Ĩvindanĩ ya mĩisyo ndonya kũkĩa ata,
yĩla nĩthyũlũlũkĩtwe nĩ akengani athũku,
6andũ ala mekwatasya ũthwii woo,
na kwĩkathĩĩa nũndũ wa ũthwii woo mwingĩ?
7Kwa w'o vai mũndũ ũtonya kwĩyovosya,
kana akaĩva Ngai thooa wa thayũ wake,
8nũndũ thooa wa thayũ wa mũndũ nĩ mũnene mũno,
na vai kĩndũ kĩtonya kũĩva thayũ ũsu,
9na kũtuma mũndũ ekala thayũ tene na tene,
na ailea kwĩsa kũthikwa mbũanĩ.
10Ĩĩ, kĩla mũndũ nĩwĩsĩ kana o na ala oĩ makakw'a,
o na ala atumanu na ang'endu o namo makathela.
Onthe makatiĩa andũ angĩ ũthwii woo.
11Mbũa syoo ikatw'ĩka mĩsyĩ yoo tene na tene,
wĩkalo woo wa tene na tene,
o na vala ĩvindanĩ yĩmwe maĩ na itheka syoo.
12Ũnene wa mũndũ ndũmũsiĩĩa kũkw'a,
o ta nyamũ o nake akakw'a.
13Ũu nĩw'o ala mekwatasya vinya woo monaa,
nĩw'o mũminũkĩlyo wa aatĩĩi moo ala mekwatasya ndeto syoo.
Sela
14Makakw'a ta malondu,
na kĩkw'ũ kĩkatw'ĩka mũĩthi woo.
Ala alũngalu makamasumbĩka kwakya,
wũmbo woo ũkathela, wĩkalo woo nĩ mbũanĩ.
15Ĩndĩ Ngai akandangĩĩa,
akambovosya kuma vinyanĩ wa kĩkw'ũ,
nĩkwĩthĩwa akambosa.
Sela
16Ndũkakĩe woona mũndũ atw'ĩka mũthwii,
yĩla ũthwii wake wongeleka mbeange,
17nĩkwĩthĩwa akw'a nde kĩndũ ũkathi nakyo;
ndakatheeanĩsya na ũthwii wake mbũanĩ.
18O na vala yĩla waĩ thayũ eetalaa kwĩthĩwa e mũathime,
na o na vala mũndũ nũkathĩĩawa yĩla ũendee nesa,
19akakw'a athi kũla kwĩ aaũmae make,
ala matakona kyeni ingĩ.
20Mũndũ wĩ na ũthwii na nde na ũmanyi,
akakw'a o ta nyamũ.
Currently Selected:
Sav 49: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
