Sav 46
46
Ngai nĩwe Wĩvitho na Vinya witũ
Kwa mwinĩthya: Savulĩ ĩno yaandĩkiwe nĩ nzyawa sya Kola
1Ngai nĩwe wĩvitho na vinya witũ,
ũtethyo wĩ vakuvĩ yĩla twĩ thĩnanĩ.
2Kwoou tũikakĩa o na nthĩ yaalyũka,
o na iĩma syavalũkanga syũngũnĩ sya ũkanga,
3o na ũkanga weethĩwa na itulumo kana kũthokoana,
na iĩma iithingithangw'a nĩ itulumo syaw'o.
Sela
4Ve ũsĩ tũlũsĩ twaw'o tũetae ũtanu ndũanĩ ya Ngai,
vandũnĩ vatheu vala Ũla wĩ Ĩũlũ Mũno wĩkalaa.
5Ngai e ndũanĩ ĩsu na ndĩkanangwa nongi;
kwakya tene Ngai akamĩtetheesya.
6Nthĩ nilonzanasya, mosumbĩ nĩmatetemaa;
Ngai nũneenaa na wasya mũnene na nthĩ ĩinyaĩĩka.
7Mwĩai Ngai Mwene Ũtonyi W'onthe e vamwe naitũ,
Ngai wa Yakovo nĩwe wĩvitho witũ.
Sela
8Ũkai mwone maũndũ ala Mwĩai Ngai wĩkĩte,
mwone ũndũ wĩkĩte maũndũ ma ũseng'yo ĩũlũ wa nthĩ.
9Nũtumaa kaũ ũthela ĩũlũ wa nthĩ;
nũtũlangaa ũta na kwananga ĩtumo,
nũvĩvasya ngao na mwaki.
10Nũneenaa akasya,
“Usyai, na mũimanya kana nyie nĩ Ngai.
Nganenevw'a katĩ wa mbaĩ,
nganenevw'a ĩũlũ wa nthĩ.”
11Mwĩai Ngai Mwene Ũtonyi W'onthe e vamwe naitũ,
Ngai wa Yakovo nĩwe wĩvitho witũ.
Sela
Currently Selected:
Sav 46: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
