Sav 45
45
Wathi wa Mũtwaano wa Mũsumbĩ
Kwa mwinĩthya: Savulĩ ĩno yaandĩkiwe nĩ nzyawa sya Kola. Ũũ nĩ wathi wa mũtwaano.
1Ngoo yakwa yusũĩte ndeto nzeo,
yĩla ngwinĩa mũsumbĩ wathi ũũ.
Ũĩmĩ wakwa nĩwĩyũmbanĩtye kwina,
ta kĩandĩki kya mũandĩki mũseo.
2Nue mũndũ-ũme ũla mwanake vyũ aũmenĩ onthe,
wĩ mũneeni mũseo,
nũndũ Ngai nũkũathimĩte tene na tene.
3We mũsumbĩ wĩ vinya, ĩyovee ũvyũ waku kĩnyunyunĩ,
we wĩ wa kũkumw'a na kũnengwa ndaĩa nene.
4Wĩ ũnenenĩ waku endeea kũsinda,
ũũngamĩte kũtetea ũw'o, wĩnyivyo na ũlũngalu.
Ũtonyi waku ũkatuma ũkwata ũsindi mũnene!
5Maangi maku nĩ moĩ,
nĩmatonyaa ngoo sya amaitha maku;
andũ ma nthĩ ingĩ mavalũkaa mbee waku.
6 #
Aevl 1.8-9
Ũsumbĩ ũla Ngai ũkũnengete nĩ wa tene na tene;
ũsumbĩkaa andũ maku na sila wa katĩ.
7We wendete ũlũngalu na ũkamena ũthũku,
kwoou Ngai, Ngai waku nũkũnyuvĩte,
na akatuma wĩthĩwa na ũtanu mwingĩ,
mbee wa asumbĩ ala angĩ onthe.
8Ngũa syaku syonthe syĩ na mũuke mũseo wa manemane,
mũtĩ wĩ mũuke mũseo na mũuke wa kalavuu;
nũtanĩthaw'a na mbathi ikũnĩtwe na mĩio yĩ ndii,
wĩ nyũmbanĩ syaku sya kĩ-ũsumbĩ syanakavĩtw'e na maeo ma nzou.
9Eĩtu ma asumbĩ nĩ amwe katĩ wa aka maku ala me ndaĩa;
na kw'okonĩ kwaku kwa aũme mũtwawa waku mũsumbĩ aũngamĩte vau,
eyanakavĩtye na thaavu kuma Ovili.
10We mũtwawa wa mũsumbĩ ĩthukĩĩsye; tea kũtũ:
Ũlwa nĩ andũ maku na andũ ma mũsyĩ wa ĩthe waku,
11na wanake waku nũũtuma mũsumbĩ akwenda,
nũndũ nĩ mũnene waku, no nginya ũmwĩw'e.
12Andũ kuma Tile makakũetee mĩthĩnzĩo;
athwii makamantha ũseo kuma kwaku.
13Mwĩĩtu wa mũsumbĩ e nyũmbanĩ ya kĩ-ũsumbĩ nĩ mwanake mũno!
Ngũa yake ĩtumĩtwe na ũlii wa thaavu.
14Atwaĩtwe vala ve mũsumbĩ ekĩĩte ngũa yĩ malangi maingĩ,
aatĩĩwe nĩ atindany'a make eĩtu mataamanyana kĩ-mwĩĩ na mũndũ-ũme,
o namo maetetwe vala ve mũsumbĩ.
15Mokĩte me na ũtanu na mũyo,
wa kũlika nyũmbanĩ ya kĩ-ũsumbĩ.
16We mũsumbĩ wakwa ũkeethĩwa na ana aingĩ,
ala mesumbĩkaa ĩtina wa aaũmae maku,
naku ũkamatw'ĩkĩthya asumbĩ masumbĩke nthĩ yonthe.
17Ngatuma ĩsyĩtwa yaku yĩlilikanwa tene na tene,
kwoou kĩla mũndũ akakũtaĩa ĩvindanĩ yonthe yĩla yũkĩte.
Currently Selected:
Sav 45: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
