Sav 44
44
Mboya ya Kũkũlya Ũsũvĩo
Kwa mwinĩthya: Savulĩ ĩno yaandĩkiwe nĩ nzyawa sya Kola
1Ame Ngai nĩtwĩw'ĩte na matũ maitũ,
aaũmae maitũ nĩmatũtavisye maũndũ ala weekie ĩvindanĩ yoo,
ĩvindanĩ ya tene:
2Ũndũ we kwa ũtonyi waku walũngilye andũ ma nthĩ ingĩ,
na walikya andũ maku nthĩ ya andũ asu,
ũndũ wakanisye andũ ma nthĩ ingĩ,
na watuma andũ maku maendeea nesa.
3Andũ maku mayaaosa nthĩ ĩsu maitũmĩa mbyũ,
o na mayaasinda na ũtonyi woo ene;
masindie nũndũ wa vinya na ũtonyi waku,
waĩ vamwe namo kĩla ĩvinda nũndũ nĩwamendete.
4Nue mũsumbĩ wakwa na Ngai wakwa,
ũla ũnengae andũ maku Ĩsilaeli ũsindi.
5Nũndũ wa vinya waku nĩtũsindaa amaitha maitũ,
ĩsyĩtwanĩ yaku nĩtũsindaa amaitha maitũ.
6Nyie ndikekwatya ũta wakwa,
o na ũvyũ wakwa ndũkandangĩĩa,
7ĩndĩ we nũtumĩte tũsinda amaitha maitũ,
na ũkatuma ala matũmenete masonoka.
8Mũthenya w'onthe twĩkathĩĩaa nthĩnĩ wa Ngai,
na tũkataĩaa ĩsyĩtwa yaku tene na tene.
Sela
9Ĩndĩ yu nũtũekete na ũkatuma tũsindwa;
yu ndũendanasya na asikalĩ maitũ ma kaũ.
10Nũtumĩte tũkĩa ala matũmenaa,
na ũkatuma amaitha maitũ meyosea mũtavo.
11Watumie tũawa ta malondu,
na watũnyaĩĩkĩsya nthĩ ingĩ.
12Wathooisye andũ maku kwa thooa mũnini,
o na ndwaaĩtya ũtandĩthyo o na mũnini.
13Nĩwatumie tũvũthw'a nĩ atũi maitũ,
twatw'ĩka andũ ma kũvũĩwa ngũĩ,
na kũthekeewa nĩ ala matũthyũlũlũkĩte.
14Nũtumĩte twĩthĩwa andũ ma kũvũthw'a nĩ andũ ma nthĩ ingĩ;
matũthingithĩasya mĩtwe nĩ kĩvũthya.
15Nĩthĩawa na nthoni kĩla ĩvinda,
nusĩwe nĩ nthoni mbingĩ,
16nũndũ wa kwĩw'a kĩvũthya,
na numangano sya amaitha makwa na ala mekwenda kwĩyĩĩvanĩsya.
17Maũndũ asu onthe nĩmatũkwatĩte,
o na vala tũyoolĩtwe nue,
kana tũkananga ũtianĩo witũ naku.
18Tũyaaĩthĩwa tũteũkũatĩĩa,
o na tũyaalea kũatĩĩa mĩao yaku.
19Ĩndĩ watũtiie nyamũnĩ sya kĩthekanĩ tũtetonya;
watũtiie kĩvindunĩ kingĩ.
20Kethĩwa nĩtwoolilwe nĩ kũthaitha Ngai waitũ,
kana tũkavoya ngai ngeni,
21nĩkũlya, kwa w'o wĩthĩwa ũtaamanya ũndũ ũsu,
na nĩwĩsĩ syĩmbithĩ sya ngoo sitũ?
22 #
Alo 8.36
Kwondũ waku twĩthĩawa mũisyonĩ wa kũawa kĩla mũthenya,
twosawa ta malondu ma kũthi kũthĩnzwa.
23Ame Mwĩai amũka, ũkomete nĩkĩ?
Ũkĩla! Ndũkatwĩkye vaasa naku tene na tene.
24Wĩtwĩvithĩla nĩkĩ?
Ndũkolwe nĩ mathĩna maitũ na kũnyamaw'a kwitũ!
25Nĩtũvalũkĩte nthĩ kĩtoonĩ;
tũkomete nthĩ kĩtoonĩ twĩ asinde.
26Ũkĩla ũtũtetheesye,
tũvonokye nũndũ wa wendo waku ũtaolekaa.
Currently Selected:
Sav 44: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
