Sav 37
37
Kũĩkĩĩa Mwĩai Ngai
Savulĩ ĩno yaandĩkiwe nĩ Ndeviti
1Ndũkenyamasye nũndũ wa ala athũku,
ndũkew'ĩe eki ma naĩ kĩwĩu.
2Nũndũ asu makathela ta nyeki;
makooma o tondũ matũ ma mĩtĩ momaa.
3Ĩkĩĩa Mwĩai Ngai na ũyĩka ũla ũseo;
ũkatũa nthĩ na ũyĩthĩwa ũsũvĩonĩ.
4Mantha ũtanu nthĩnĩ wa Mwĩai Ngai,
na akakũnenga kĩla ngoo yaku ĩkwenda.
5Nenga Mwĩai Ngai thayũ waku w'onthe;
mũĩkĩĩe nake akakũtetheesya.
6Akatuma ũlũngalu waku wumĩla ta kyeni,
na ũw'o waku woneka ta syũa mũthenya katĩ.
7Thũmũa nthĩnĩ wa Mwĩai Ngai na ũimweteela na wũmĩĩsyo;
ndũkenyamasye nũndũ wa ala maendeeaa nesa,
kana ala meanĩasya mĩvango yoo mĩthũku.
8Ekana na ũthatu na ũitiana na ũthũku!
Ndũkenyamasye; ũndũ ũsu ũlikasya mũndũ naĩnĩ.
9Nũndũ ala athũku makavetangwa,
ĩndĩ ala mekwatasya Mwĩai Ngai makatiĩwa nthĩ.
10Ĩtina wa kavinda kanini mũndũ mũthũku akavetwa;
ũkamũmantha vala ũnaĩ na ndũkamwona.
11 #
Mat 5.5
Ĩndĩ ala auu makatiĩwa nthĩ,
na maitanĩa wusũu wa moseo.
12Mũndũ mũthũku nũvangĩaa mũndũ mũlũngalu mĩvango mĩthũku,
na kũmũvevetanĩsya maeo nĩ kĩmena.
13Ĩndĩ Mwĩai Ngai nũthekeeaa ũla mũthũku,
nũndũ nĩwĩsĩ mũminũkĩlyo wake wĩ vakuvĩ.
14Ala athũku makũaa ũvyũ na kũkoota ũta moae ngya na athĩni;
moae ala mekaa ũla waĩlu.
15Mbyũ syoo ikatonya ngoo syoo ene,
na ũta woo ũkatũlangwa.
16Nĩ kavaa kĩndũ kĩnini kya mũndũ mũlũngalu,
kwĩ ũthwii mwingĩ wa andũ aingĩ athũku,
17nũndũ Mwĩai Ngai akamina vinya wa ala athũku,
na kũsũvĩa ala alũngalu.
18Mwĩai Ngai nũsũvĩaa ala mamwĩw'aa,
na ũtiĩwa woo ũkeethĩwa wa tene na tene.
19Ĩvindanĩ ya mathĩna maikasonoka;
ĩvindanĩ ya yũa makeethĩawa na lĩu mwingĩ.
20Ĩndĩ ala athũku makakw'a;
amaitha ma Mwĩai Ngai makooma ta malaa ma kĩthekanĩ,
makathelekelya, ĩĩ, makathelekelya ta syũki.
21Mũndũ mũthũku nũkovaa na ailea kũĩva,
ĩndĩ mũndũ mũlũngalu nũnenganae na ũlau.
22Ala maathimĩtwe nĩ Mwĩai Ngai makatiĩwa nthĩ,
ĩndĩ ala ũumanĩĩte makavetangwa.
23Mwĩai Ngai nĩwonasya mũndũ nzĩa ila waĩlĩte kwĩsĩla,
na nũsũvĩaa ũla ũmwendeeasya.
24O na aluluutĩka ndavalũkaa nthĩ,
nũndũ Mwĩai Ngai nũmũkwatĩĩaa na kw'oko kwake.
25Naĩ wa mũika ĩndĩ yu nĩ mũkũũ,
ĩndĩ ndyaaona mũndũ mũlũngalu aeketwe nĩ Mwĩai Ngai,
kana ngona syana syake iivoya lĩu.
26Kĩla ĩvinda nĩ mũlau na nũkovethasya,
na syana syake niathimawa.
27Ekana na ũthũku na ũyĩka ũla ũseo,
na nzyawa syaku ikatũa nthĩ tene na tene.
28Nũndũ Mwĩai Ngai nĩwendete sila wa katĩ,
na ndakaekana na atheu make.
Nũmasũvĩaa tene na tene,
ĩndĩ nũlũngasya nzyawa sya ala athũku.
29Ala alũngalu makatiĩwa nthĩ,
na maitũa vo tene na tene.
30Kanyw'a wa mũndũ mũlũngalu ũneenaa ndeto sya ũĩ,
na aneenaa ĩũlũ wa sila wa katĩ.
31Nĩwĩkalasya mĩao ya Ngai wake ngoonĩ yake,
na ndesaa kũthi ũtee wayo.
32Mũndũ mũthũku nĩwoveeasya ũla mũlũngalu,
na kũmantha ũndũ ũtonya kũmũaa.
33Ĩndĩ Mwĩai Ngai ndakamũnengane ũtonyinĩ wa mũmaitha wake,
kana aeke atw'ĩĩwe kwĩthĩwa e mũvĩtany'a.
34Mwĩkwatye Mwĩai Ngai na ũikwata mĩao yake;
akakũnenevya ũtiĩwe nthĩ,
na ũyona ũla mũthũku aiminwa.
35Nĩnonete mũndũ mũthũku na ũte tei,
aendee nesa ta mũtĩ ũmeete mũthanganĩ wa nthĩ yaw'o.
36Ĩtina nĩnesie kwĩsĩla vo na neethĩa ate vo,
nĩnamũmanthie ĩndĩ ndyaamwona.
37Syaĩĩsya mũndũ ũtatũlwa mũtĩ, na keteea mũndũ mũlũngalu,
nũndũ mũndũ wa mũuo nĩwĩthĩawa na nzyawa,
38ĩndĩ eki ma naĩ makaminwa,
na nzyawa syoo ikaminwa vyũ.
39Ũtangĩĩo wa ala alũngalu wumaa kwa Mwĩai Ngai,
nĩwe wĩvitho woo ĩvinda ya mathĩna.
40Mwĩai Ngai nũmatetheeasya na kũmavonokya;
nũmavonokasya kuma kwa ala athũku na kũmatangĩĩa,
nũndũ mevithaa nthĩnĩ wake.
Currently Selected:
Sav 37: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
