Sav 38
38
Mboya ya Mũndũ wĩ Thĩnanĩ
Savulĩ ĩno yaandĩkiwe nĩ Ndeviti kwondũ wa nthembo ya ũlilikany'o
1Ame Mwĩai Ngai ndũkangany'e ũthatunĩ waku,
o na ndũkanzilĩle ũthatunĩ waku mwingĩ!
2Nũngathangĩte mũno na maangi maku,
na nũngũnĩte na kw'oko kwaku.
3Nũndũ wa ũthatu waku nĩ na kyalya kingĩ,
o na mavĩndĩ makwa me na kyalya nũndũ wa naĩ syakwa.
4Nĩmbw'ĩkĩtwe vyũ nĩ naĩ syakwa;
iitavĩte ta mũio mũito ndavikya.
5Nũndũ wa ũtumanu wakwa,
itau syakwa nĩsyoete na niũnyunga.
6Nĩngwalw'a mũno na nĩngunguutĩtye,
ndindĩaa kũĩa mũthenya w'onthe.
7Kĩnyunyu kyakwa kĩna kyalya kingĩ,
na mwĩĩ wakwa w'onthe nĩ mũwau mũno.
8Nĩ mwonzu na nĩ mũthelu vyũ,
nĩ na kyeva ngoonĩ na nĩngũluma nĩ kyalya.
9Ame Mwĩai Ngai nĩwĩsĩ kwenda kwakwa kw'onthe,
nĩwĩw'aa kũluma kwakwa kw'onthe.
10Ngoo yakwa nĩkũkũna mũno,
vinya wakwa nĩ mũnini,
na metho makwa nĩmaekete kwona nthĩ nesa.
11Anyanyae makwa na atindany'a makwa mainthengeeaa,
nũndũ wa itau syakwa,
o na andũ ma mũsyĩ wakwa mekalaa vaasa nakwa.
12Ala meũmantha thayũ wakwa metea mĩteo yoo,
na ala mekwenda kũmbũmĩsya meneena maũndũ mathũku;
mũthenya w'onthe mavangaa maũndũ ma ũvũngũ.
13Nĩilyĩ ta mũndũ ũtew'aa nthĩ, ũla ũtatonya kwĩw'a.
Ta mũndũ ũtaneenaa, ũla ũtatonya kumya wasya.
14Ĩĩ, nĩilyĩ ta mũndũ ũtatonya kwĩw'a,
ũla ũtatonya kũsũngĩa.
15Ĩndĩ nĩngwĩkwatĩtye we Mwĩai Ngai,
naku we Mwĩai Ngai, Ngai wakwa ũkanzũngĩa.
16Nũndũ nĩngũvoya ndyasya atĩĩ, “Ndũkaeke andũ matane nũndũ wa thĩna wakwa,
ndũkamaeke mekathĩĩe nũndũ wa ũvalũku wakwa.”
17Ngilĩlye kũvalũka,
na kyalya kyakwa kĩithelaa.
18Nĩngumbũla ũthũku wakwa,
na naĩ syakwa niũnthĩny'a.
19Amaitha makwa nĩ athangaau na me na vinya;
ala mamenaa vate kĩtumi nĩ aingĩ.
20Ala manduvaa ũthũku nũndũ wa ũseo wakwa,
nĩ amaitha makwa nũndũ nĩkaa ũla ũseo.
21Ame Mwĩai Ngai ndũkandie!
Ame Ngai wakwa ndũkethĩwe vaasa nakwa!
22Ame Mwĩai Ngai Mũtangĩĩi wakwa,
ĩkalaate ũndetheesye!
Currently Selected:
Sav 38: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
