Sav 35
35
Mboya ya Kũkũlya Ũtethyo kuma kwa Ngai
Savulĩ ĩno yaandĩkiwe nĩ Ndeviti
1Ame Mwĩai Ngai leana na ala mekũleana nakwa,
na ũyũkita na ala mekũkita nakwa.
2Osa ngao yaku, na ũyosa ngao yaku ya kĩthũi,
na ũyũkĩla wũke ũndetheesye.
3Ũkĩlya ĩtumo yaku na mũsenge waku,
ũsiĩĩe ala manzembanĩtye.
Mbĩe atĩĩ, “Ninyie ũtangĩĩo waku.”
4Ala mekwenda kũmbũaa nĩmasindwe na kwĩkĩĩthw'a nthoni;
ala mekũmbangĩa mũvango mũthũku nĩmatũngĩthw'e na maivũavũanw'a!
5Nĩmethĩwe mailyĩ mavuti maũlũkĩtw'e nĩ kĩseve,
mũlaĩka wa Mwĩai Ngai amasembanĩtye.
6Nzĩa yoo nĩmesye kĩvindu na ĩitendea,
mũlaĩka wa Mwĩai Ngai aendee kũmalũngya.
7Nũndũ mandeie na mũteo vate kĩtumi,
na vate kĩtumi mambĩnzĩa ĩima ĩliku mangwatye.
8Nĩmakwatwe nĩ wanangĩko matesĩ,
na mũteo ũla mandeie na w'o ũimakwatya;
nĩmalike ĩimanĩ yĩu manangĩke.
9Nĩvo ĩndĩ nĩtana nĩ nthĩnĩ wa Mwĩai Ngai,
na kũtana nũndũ wa wovosyo wake.
10Ngakũlya Mwĩai Ngai na thayũ wakwa w'onthe atĩĩ,
“We Mwĩai Ngai nũũ ũla ũilyĩ taku?
Nũtangĩĩaa ngya kuma kwa ala me vinya mbee wasyo,
nũtangĩĩaa ngya na athĩni kuma kwa ala mamathĩnasya.”
11Ngũsĩ sya ũvũngũ nimbũkĩlĩlaa,
ningũlasya maũndũ ndamesĩ o na vanini.
12Mandĩvaa ũseo wakwa na ũthũku,
na kũndia nĩna kĩmako.
13Ĩndĩ yĩla maĩ awau,
nyie nĩneekĩie ngũa ngaamu sya makunia nonany'e kyeva kyakwa.
Nĩneethĩnisye kwa kũtĩĩa kũya;
nĩnavoyie ngumanĩe nthĩ,
14ta nĩ na kyeva nũndũ wa mũnyanyawa kana mwana-a-mwaitũ.
Nĩnakumanisye mũtwe nĩ kyeva ta ngũĩĩa mwaitũ.
15Ĩndĩ yĩla nalikile thĩnanĩ onthe nĩmatanie,
na moombanĩa vamwe manthekee;
andũ ndesĩ nĩmangũnie mate kũeka.
16Ta andũ matesĩ Ngai nĩmambũthisye mũno,
mavevetanasya maeo moo nĩ kĩmena.
17Ame Mwĩai Ngai wĩendeea kũsyaĩĩsya nginya ĩndĩĩ?
Mbonokye maeke kũmbithũkĩa;
tangĩĩa thayũ wakwa kuma mĩnyambũnĩ ĩsu!
18Nĩvo ĩndĩ ngakũtũngĩa mũvea wũmbanonĩ ũla mũnene;
ngakũtaĩa andũnĩ asu aingĩ.
19 #
Sav 69.5; Yoa 15.25 Ndũketĩkĩle amaitha asu makwa athũku matanĩe kũsindwa kwakwa,
ndũkaeke andũ asu mamenaa mana manthekee moona thĩna wakwa.
20Maineenaa ndeto syĩ na mũuo,
ĩndĩ mamanthaa ũndũ mekũsikata andũ ala mekalaa na mũuo maitũmĩa ndeto sya ũvũngũ.
21Manzikataa na wasya mũnene mayasya atĩĩ,
“Aa! Aa! Nĩtũnoonie ũndũ ũneekie”
22Ĩndĩ we Mwĩai Ngai nĩwonete ũu; ndũkatate kũvindya!
Ame Mwĩai Ngai, ndũkethĩwe vaasa nakwa!
23Ame Mwĩai Ngai ũkĩla ũndetee!
We Ngai wakwa na Mwĩai wakwa, neena ũw'o ĩũlũ wakwa.
24Ame Mwĩai Ngai, Ngai wakwa, nzilĩle kwĩanana na ũlũngalu waku,
ndũkaeke amaitha makwa matane nũndũ wakwa.
25Ndũkaeke masũanĩe mayasya, “Aa! Tũnendaa ũu!”
Kana masye, “Nĩtwamũmina”
26Onthe ala matanĩaa thĩna wakwa,
nĩmasonokw'e na kũvũavũanw'a.
Ala monaa me aseo mbee wakwa,
nĩmakwatwe nĩ nthoni na maisonoka.
27Ala mendeeaw'a nĩ ũlũngalu wakwa,
nĩmokĩlye mawasya ma ũtanu na mũyo.
Nĩmaneenae kĩla ĩvinda mayasya, “Mwĩai Ngai nĩ mũnene,
nĩwendeeaw'a nĩ kũendeea nesa kwa mũthũkũmi wake.”
28Nĩvo ĩndĩ nĩtavany'a ĩũlũ wa ũlũngalu waku,
na ngĩũtaĩa mũthenya w'onthe.
Currently Selected:
Sav 35: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
