Sav 34
34
Kũtaĩa Ũseo wa Ngai
Savulĩ ĩno yaandĩkiwe nĩ Ndeviti yĩla weetw'ĩkĩthisye mũndũ wa ndũũka e vala ve Avimeleki. Avimeleki nĩwamũlũngilye athi
1 #
1Sam 21.13-15
Ngamũtaĩaa Mwĩai Ngai mavinda onthe,
ndikaeka o na vanini kũmũtaĩa.
2Thayũ wakwa ũkeekathĩĩa nthĩnĩ wa Mwĩai Ngai;
ala mathĩnaw'a mew'e ũu na maitana!
3Taĩai Mwĩai Ngai mwĩ vamwe nakwa;
nĩtũkumye ĩsyĩtwa yake twĩ vamwe!
4Nĩnavoyie Mwĩai Ngai nake anzũngĩa;
nĩwambonokisye kuma w'ĩanĩ wakwa w'onthe.
5Ala mamwĩkwatasya Mwĩai Ngai nĩ atanu;
maikaasonoka o na ĩndĩĩ.
6Mũndũ ngya nĩweekaĩlile Mwĩai Ngai, nake amũsũngĩa,
nĩwamũtangĩĩie kuma mathĩnanĩ make onthe.
7Mũlaĩka wa Mwĩai Ngai nũsũvĩaa ala manengae Mwĩai Ngai ndaĩa,
na aimavonokya kuma mĩisyonĩ.
8 #
1Vet 2.3
Samai mũmanye kana Mwĩai Ngai nĩ mũseo;
nĩ aathime ala mevithaa nthĩnĩ wake.
9Inyw'ĩ atheu ma Mwĩai Ngai mũnengei ndaĩa,
nũndũ ala mamũkĩaa maikaĩwa nĩ kĩndũ.
10Mĩnyambũ ya mũika nĩyaĩawa nĩ lĩu na kwĩw'a nzaa,
ĩndĩ ala mamanthaa Mwĩai Ngai maikaĩwa nĩ syĩndũ nzeo.
11Inyw'ĩ syana syakwa ũkai mũmbĩthukĩĩsye,
na nĩngũmũmanyĩsya kũnenga Mwĩai Ngai ndaĩa.
12 #
1Vet 3.10-12
Mũndũ ũla wendaa kwĩkala thayũ,
na wendaa kwĩthĩwa na mĩthenya mingĩ ya ũtanu,
13nĩaekane na ũneeni mũthũku,
na kũeka kũneena ũvũngũ.
14Nĩevathane na ũthũku na kwĩkaa ũla waĩlu,
nĩethĩwe mũndũ wa mũuo,
na ayĩendeea kwonany'a mũuo ũsu.
15Mwĩai nũmasũvĩaa ala mekaa kwenda kwake,
na kwĩthũkĩĩsya mboya syoo;
16ĩndĩ ndendeeaw'a nĩ ala mekaa maũndũ mathũku,
nĩ kana makw'a mole kũũ ĩũlũ wa nthĩ.
17Yĩla ala alũngalu meekaĩla Mwĩai Ngai nũmethukĩĩasya;
nũmatangĩĩaa kuma mathĩnanĩ moo onthe.
18Mwĩai Ngai e vakuvĩ na ala akw'ũ ngoo,
na nũtangĩĩaa ala mate na wĩkwatyo.
19Mũndũ mũlũngalu nũkwataa mathĩna maingĩ,
ĩndĩ Mwĩai Ngai nũmũvonokasya kuma mathĩnanĩ asu onthe.
20 #
Yoa 19.36
Mwĩai Ngai nũsũvĩaa mavĩndĩ make onthe,
vai ĩvĩndĩ yake o na yĩmwe yĩkatũlwa.
21Ũthũku ũkooaa ala athũku;
amaitha ma ala alũngalu makasilĩlwa.
22Mwĩai Ngai nĩwovoasya andũ make;
onthe ala mevithaa nthĩnĩ wake maikasilĩlwa.
Currently Selected:
Sav 34: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
