Sav 33
33
Wathi wa Kũtaĩa Ngai
1Inyw'ĩ andũ alũngalu tanai nthĩnĩ wa Mwĩai Ngai!
Nĩ waĩlu ala alũngalu kũtaĩa Mwĩai Ngai.
2Taĩai Mwĩai Ngai na ngitaa nene,
mwinĩei na ngitaa nini yĩ ndii ĩkũmi.
3Mwinĩei wathi mweũ;
kũnai ngitaa na ũmanyi mwingĩ na mũyũkĩlya wasya wa ũtanu.
4Ndeto sya Mwĩai Ngai nĩ syaw'o,
na nĩmũĩkĩĩku mawĩanĩ make onthe.
5Mwĩai Ngai nĩwendete ũlũngalu na sila wa katĩ;
nthĩ yusũĩte wendo wake ũtaolekaa.
6Mwĩai Ngai nĩwoombie matu aitũmĩa ndeto yake,
nĩwoombie syũa, mwei na ndata aitũmĩa ndeto yake.
7Nĩwoombanĩisye iw'ũ sya mokanga vandũ vamwe,
na oombanĩsya kũndũ kũliku kwa mokanga makũmbĩnĩ.
8Nthĩ yonthe nĩthaithe Mwĩai Ngai!
Andũ onthe ma nthĩ nĩmamũnenge ndaĩa!
9Nũndũ yĩla waneenie nthĩ nĩyoombiwe,
nĩweeaie na yeethĩwa vo.
10Mwĩai Ngai nũtumaa mĩvango ya mbaĩ ingĩ ĩtw'ĩka ya mana,
na kwananga mĩvango ya andũ.
11Ĩndĩ mĩvango ya Mwĩai Ngai nĩyĩkalaa tene na tene;
mĩvango ya ngoo yake nĩyĩkalaa nzyawanĩ syonthe.
12Nĩ ngathime mbaĩ ĩla Ngai woo nĩ Mwĩai Ngai;
andũ ala ũnyuvĩte methĩwe make!
13Mwĩai Ngai nũsyaĩĩasya e ĩtunĩ;
nĩwonaa andũ onthe.
14E vala ũsumbĩkaa ailyĩ,
nũsyaĩĩasya onthe ala matwĩe ĩũlũ wa nthĩ.
15Nĩwe ũseũvasya mosũanĩo moo,
na nĩwĩsĩ maũndũ onthe ala mekaa.
16Mũsumbĩ ndatangĩĩawa nĩ nguthu yake nene ya asikalĩ;
ngũmbaũ ndĩvonokaw'a nĩ vinya wayo mwingĩ.
17Kwĩkwatya ũsindi nũndũ wa mbalasi sya kaũ nĩ mana;
vinya wasyo mwingĩ ndũtangĩĩaa.
18Mwĩai Ngai nũsyaĩĩasya ala mamwĩw'aa,
ala mekwatasya wendo wake ũtaolekaa.
19Nũmatangĩĩaa kuma kĩkw'ũnĩ;
nũmekalasya thayũ ĩvindanĩ ya yũa.
20Ngoo sitũ syeteelete Mwĩai Ngai;
nĩwe mũtethya waitũ na ngao yaitũ.
21Ngoo sitũ itanĩaa nthĩnĩ wake,
nũndũ nĩtwĩkwatasya ĩsyĩtwa yake ĩtheu.
22Ame Mwĩai Ngai eka wendo waku ũtaolekaa wĩkalae nthĩnĩ waitũ,
nũndũ ithyĩ nĩtũkwĩkwatĩtye.
Currently Selected:
Sav 33: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
