Sav 30
30
Mboya ya Kũtũnga Mũvea
Savulĩ ĩno yaandĩkiwe nĩ Ndeviti. Ũũ nĩ wathi wa ĩvinda ya kũvathwa kwa Ĩkalũ
1Ngakũtaĩaa we Mwĩai Ngai nũndũ nũmbovoetye,
na ndwaaeka amaitha makwa manthekee.
2Ame Mwĩai Ngai, Ngai wakwa, nĩnakwĩkaĩlile ũndetheesye,
naku wambosya.
3Ame Mwĩai Ngai nũmbovoetye kuma vala maveva ma ala akw'ũ mekalaa;
nũnengete thayũ ĩngĩ,
ũkambumya katĩ wa ala maendie vala maveva ma ala akw'ũ mekalaa.
4Inyw'ĩ atheu ma Mwĩai Ngai,
mwinĩei Mwĩai Ngai mbathi sya kũtaĩa;
taĩai ĩsyĩtwa yake ĩtheu.
5Nĩkwĩthĩwa ũthatu wake wĩkalaa o kavinda kanini,
ũseo wake wĩkalaa tene na tene.
Nĩkũtonya kwĩthĩwa na kĩĩo ũtukũ,
ĩndĩ kũyĩthĩwa ũtanu kwakya.
6Yĩla naendee nesa nĩnaisye atĩĩ,
“Ndikasindwa o na ĩndĩĩ.”
7Mwĩai Ngai nĩwambĩkie nesa;
nĩwatumie nĩthĩwa na ũlũmu ta kĩĩma kĩnene.
Nĩvo ĩndĩ wambĩvithie,
na nakwatwa nĩ w'ĩa.
8Ame Mwĩai Ngai nĩnakwĩkaĩlile,
ĩĩ, nĩnakũvoyie we Mwĩai Ngai.
9“Nĩkũlya, kĩkw'ũ kyakwa kĩkakũuna na kyaũ?
Kũtheea kwakwa vala ala akw'ũ mekalaa kũkakũuna na kyaũ?
Andũ ala akw'ũ nĩmatonya ũkũtaĩa?
Nĩmatonya kũtavany'a ĩũlũ wa ũĩkĩĩku waku?
10Ame Mwĩai Ngai mbĩthukĩĩsye na ũimbĩw'ĩa tei.
Ame Mwĩai Ngai ĩthĩwa mũtethya wakwa!”
11Nũalyũlĩte kĩĩo kyakwa kĩkatw'ĩka kũsũnga,
nũmbetangĩĩte kyeva kyakwa na ũkanenga ũtanu,
12nĩ kana ngũtaĩe na thayũ wakwa vate kũkilya.
Ame Mwĩai Ngai, Ngai wakwa,
ngakũtũngĩaa mũvea tene na tene.
Currently Selected:
Sav 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
