Sav 28
28
Mboya ya Kũkũlya Ũtethyo kuma kwa Ngai
Savulĩ ĩno yaandĩkiwe nĩ Ndeviti
1Ame Mwĩai Ngai nĩngũkwĩkaĩla,
we mũsũvĩi wakwa ĩthukĩĩsye kĩĩo kyakwa!
Nũndũ walea kũnzũngĩa,
nĩĩthĩwa nĩilyĩ ta ala maendie nthĩ ya ala akw'ũ.
2Ĩw'a wasya wakwa yĩla ngũkwĩsũva,
yĩla ngũkwĩkaĩla ũndetheesye;
nũkĩlĩtye moko makwa melekele Ĩkalũnĩ yaku ĩtheu.
3Ndũkanzilĩle vamwe na ala athũku,
vamwe na eki ma naĩ,
ala maneenasya ala angĩ na ndeto sya mũuo,
ĩndĩ mausũĩtwe nĩ kĩmena ngoonĩ syoo.
4 #
Ũvu 22.12
Maĩve kwĩanana na wĩa woo,
kwĩanana na ũthũku wa meko moo;
maĩve kwĩanana na ũndũ mekĩte,
manenge ĩtuvi yĩla yĩmaĩlĩte.
5Nũndũ mayonaa maũndũ ala Mwĩai Ngai wĩkĩte,
kana syĩndũ ila woombie,
kwoou akamakany'a na kũmamina vyũ.
6Mwĩai Ngai nĩataĩwe,
nũndũ nĩwĩw'ĩte kĩĩo kyakwa kya kũkũlya ũtethyo.
7Mwĩai Ngai nĩwe vinya wakwa na ngao yakwa;
nĩnĩmũĩkĩĩaa.
Nũndetheeasya na kũtuma nĩw'a mũyo,
nĩnĩmũtaĩaa na mbathi sya ũtanu.
8Mwĩai Ngai nĩwe vinya wa andũ make,
nũsũvĩaa na kũtangĩĩa mũsumbĩ wake ũla ũnyuvĩte.
9Ame Mwĩai Ngai, tangĩĩa andũ maku,
na ũiathima ala maku.
Ĩthĩwa mũĩthi woo,
na ũimasũvĩa tene na tene.
Currently Selected:
Sav 28: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
