Sav 27
27
Mboya ya Kũtaĩa
Savulĩ ĩno yaandĩkiwe nĩ Ndeviti
1Mwĩai Ngai nĩwe kyeni kyakwa na ũtangĩĩo wakwa; ngakĩa ũũ?
Mwĩai Ngai nĩwe wĩvitho wa thayũ wakwa; nũũ ũla nĩkĩa?
2Yĩla andũ athũku mambithũkĩa na kwenda kũmbũaa,
yĩla amaitha makwa na ala mamenaa mambithũkĩa,
nĩmaluluutĩkaa na kũvalũka.
3O na nathyũlũlũkwa nĩ nguthu ya asikalĩ,
ndikakwatwa nĩ w'ĩa,
o na amaitha mambithũkĩa,
ngaendeea kwĩthĩwa na ũkũmbaũ.
4Ve ũndũ ũmwe nĩmũkũlĩtye Mwĩai Ngai,
na now'o nĩmanthaa:
Kwĩkala nyũmbanĩ ya Mwĩai Ngai mĩthenyanĩ yonthe ya thayũ wakwa,
nonae ũseo wa Mwĩai Ngai,
na kũvoyeaa Ĩkalũnĩ yake.
5Nũndũ ĩvindanĩ ya mathĩna akanzũvĩa;
akambitha Ĩkalũnĩ yake,
na kũmbia ũsũvĩonĩ ĩvianĩ ĩtũlu.
6Kwoou ngasinda amaitha makwa ala manthyũlũlũkĩte;
ngaumĩsya nthembo Ĩkalũnĩ yake nĩ na ũtanu;
ngaina na kũtaĩa Mwĩai Ngai.
7Ame Mwĩai Ngai mbĩw'e yĩla nakwĩkaĩla,
mbĩw'ĩe tei na ũinzũngĩa.
8Yĩla waisye, “Ũka ũnthaithe,”
nĩnasũngĩie nasya, “Nĩnũkĩte ũkũthaitha we Mwĩai Ngai.”
9Ndũkambithe ũthyũ waku;
ndũkandũngye nyie mũthũkũmi waku wĩ mũthatu.
Wĩthĩĩtwe wĩ mũtethya wakwa,
ndũkandie kana kũekana nakwa ame Ngai Mũtangĩĩi wakwa.
10Nau na mwaitũ nĩmatonya kũndia,
ĩndĩ Mwĩai Ngai akanzũvĩa.
11Ame Mwĩai Ngai manyĩsye ũndũ ũkwenda nĩke,
na ũindongoesya nzĩanĩ ĩte mĩisyo,
nũndũ wa amaitha makwa.
12Ndũkanengane wendinĩ wa ala mamenaa,
nũndũ ngũsĩ sya ũvũngũ nimbũkĩlĩle,
na mendelemya na ndeto sya ngũlũ.
13Nĩna mũĩkĩĩo kana ngoona ũseo wa Mwĩai Ngai,
nĩ nthĩ ya ala me thayũ.
14Ĩkwatye Mwĩai Ngai!
Ĩlũmye na ndũkakw'e ngoo,
ĩĩ, mwĩkwatye Mwĩai Ngai.
Currently Selected:
Sav 27: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
