Sav 25
25
Mboya kwondũ wa Kũtongoew'a na Kũsũvĩwa
Savulĩ ĩno yaandĩkiwe nĩ Ndeviti
1Ame Mwĩai Ngai,
nĩngũvoya mboya yakwa;
2Ngai wakwa nĩngwĩkwatĩtye.
Ndũkandeke nĩsonokw'e,
ndũkaeke amaitha makwa matanĩe kũsindwa kwakwa!
3Ĩĩ, ndũkaeke ala makwĩkwatasya masonokw'e,
ĩndĩ eka ala mekalaataa ũkũng'endea masonokw'e.
4Ame Mwĩai Ngai mbony'e nzĩa syaku;
manyĩsye kwĩsĩla nzĩanĩ syaku.
5Ndongoesye ũw'onĩ waku na ũimanyĩsya,
nũndũ nue Ngai wakwa ũla ũndangĩĩaa,
nĩkwĩthĩwa ngwĩkwatasya kĩla ĩvinda.
6Ame Mwĩai Ngai lilikana tei waku na wendo waku ũtaolekaa,
ila woonanisye kuma tene.
7Ndũkalilikane naĩ sya wana wakwa kana mavĩtyo makwa.
Ndilikane we Mwĩai Ngai wendonĩ waku ũtaolekaa,
nũndũ we Mwĩai Ngai wĩ mũseo.
8Mwĩai Ngai nĩ mũseo na nĩ mũlũngalu,
kwoou nũmanyĩasya eki ma naĩ nzĩa ĩla maĩlĩte kũatĩĩa.
9Nũtongoeasya ala auu kwĩka ũla waĩlĩte,
na kũmamanyĩsya nzĩa syake.
10Nzĩa syonthe sya Mwĩai Ngai nĩ sya wendo ũtaolekaa na ũĩkĩĩku,
kwa ala meanĩasya ũtianĩo na motw'ĩo make.
11Kwondũ wa ĩsyĩtwa yaku ame Mwĩai Ngai,
ndekea naĩ syakwa nĩkwĩthĩwa nĩ nene.
12Nũũ ũla ũkĩaa Mwĩai Ngai?
Akamũmanyĩsya nzĩa ĩla waĩlĩte kũatĩĩa.
13Akaendeeaa nesa kĩla ĩvinda,
na syana syake ikatiĩwa nthĩ.
14Mwĩai Ngai e ndũũ na ala mamũkĩaa,
na nũtumaa mamanya ũtianĩo wake.
15Nĩnĩkwatasya Mwĩai Ngai mavinda onthe nĩ kana andetheeasye,
nũndũ nowe ũkandangĩĩa kuma mũisyonĩ.
16Ame Mwĩai Ngai nzisye na ũimbĩw'ĩa tei,
nũndũ nĩkalaa nĩ nyioka na nĩngũnyamaw'a.
17Mathĩna ma ngoo yakwa nĩ mongeleku,
mbonokye kuma mathĩnanĩ makwa.
18Sisya mathĩna makwa na monyamao makwa,
na ũindekea naĩ syakwa syonthe.
19Kwa sisya ũndũ amaitha makwa maingĩvĩte,
kwa sisya ũndũ mamenete mũno wĩana!
20Ame nzũvĩe na ũimbonokya;
ndũkatate kũeka nĩsonokw'e,
nũndũ nĩvithaa vala ũĩ.
21Ũseo na ũlũngalu ninzũvĩe,
nũndũ nue nĩkwatasya.
22Ame Ngai ovosya andũ maku Ĩsilaeli,
movosye kuma mathĩnanĩ moo onthe!
Currently Selected:
Sav 25: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
