Sav 146
146
Kũtaĩa Ngai ũla Ũtangĩĩaa
1Mũtaĩei Mwĩai Ngai!
We thayũ wakwa mũtaĩe Mwĩai Ngai!
2Ngataĩaa Mwĩai Ngai ĩvindanĩ yonthe ya thayũ wakwa;
ngainĩaa Ngai wakwa mbathi sya kũmũtaĩa ĩvindanĩ yonthe yĩla nĩ thayũ.
3Ndũkekwatye atongoi ma andũ;
asu no andũ maitonya ũkũtethya.
4Mũndũ akw'a asyokaa mũthanganĩ;
mũthenya o ũsu mĩvango yake nĩthelaa.
5Nĩ mũathime mũndũ ũla wĩkwatasya Ngai wa Yakovo,
ũla wĩkwatyo wake wĩ nthĩnĩ wa Mwĩai Ngai, Ngai wake,
6 #
Meko 4.24; 14.15 ũla woombie ĩtu na nthĩ,
ũkanga na syonthe ila syĩ nthĩnĩ wasyo;
Ngai ũla wĩkalaa e mũĩkĩĩku tene na tene.
7Nĩwumasya sila wa katĩ kwa ala mathĩnaw'a,
na kũnenga ala me na nzaa lĩu.
Mwĩai Ngai nũthaasya ovwa.
8Mwĩai Ngai nũtumaa ilalinda syona nthĩ,
Mwĩai Ngai nĩwũkĩlasya ala avalũku,
Mwĩai Ngai nĩwendete ala alũngalu.
9Mwĩai Ngai nũsũvĩaa ekali ma ũeninĩ;
nũsũvĩaa aka ndiwa na syana ndiwa,
ĩndĩ nũtumaa ala athũku maminwa.
10Mwĩai Ngai nũsumbĩkaa tene na tene,
Ngai waku we Saioni akasumbĩka nzyawanĩ syonthe.
Mũtaĩei Mwĩai Ngai!
Currently Selected:
Sav 146: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
