Sav 145
145
Wathi wa Ndeviti wa Kũtaĩa
1Ngakũnenevya we Ngai wakwa na mũsumbĩ wakwa,
na kũtaĩa ĩsyĩtwa yaku tene na tene.
2Kĩla mũthenya ngakũtaĩaa,
na kũkumya ĩsyĩtwa yaku tene na tene.
3Mwĩai Ngai nĩ mũnene na nĩwaĩlĩte kũtaĩwa mũno;
vai mũndũ ũtonya kũmanya ũnene wake.
4Nzyawa ĩmwe ĩkatavya nzyawa ĩngĩ ĩũlũ wa mawĩa maku;
makatavany'a ĩũlũ wa meko maku manene.
5Ngasũanĩaa ĩũlũ wa ũkumyo mũnene wa ndaĩa yaku,
na kũsũanĩa ĩũlũ wa mawĩa maku ma kũseng'ya.
6Andũ makaneena ĩũlũ wa ũtonyi wa meko maku ma kũtĩsya,
na ngatavany'a ĩũlũ wa ũnene waku.
7Makatanĩa nguma ya ũseo waku mwingĩ,
na kwina na ũtanu ĩũlũ wa ũlũngalu waku.
8Mwĩai Ngai nĩ mũseo na e tei,
ndathataa mĩtũkĩ na ausĩe wendo mwingĩ ũtaolekaa.
9Mwĩai Ngai nĩ mũseo kwa onthe,
na nĩwĩw'ĩaa tei syĩndũ syonthe ila woombie.
10We Mwĩai Ngai, syũmbe syaku syonthe ikakũtaĩaa,
na atheu maku onthe makakũtaĩa.
11Makatavany'a ĩũlũ wa ũkumyo wa ũsumbĩ waku,
na kũtavany'a ĩũlũ wa vinya waku,
12nĩ kana andũ onthe mamanye ĩũlũ wa meko maku manene,
na ũkumyo mũnene wa ũsumbĩ waku.
13Ũsumbĩ waku nĩ ũsumbĩ wa tene na tene,
na ũsumbĩ waku nĩwĩkalaa nzyawanĩ syonthe.
Mwĩai Ngai nĩ mũĩkĩĩku ndetonĩ syake syonthe;
nĩ mũseo mekonĩ make onthe.
14Mwĩai Ngai nũũngamasya onthe ala mavalũkaa,
nĩwũkĩlasya ala avalũku.
15Metho ma onthe makũsiasya na wĩkwatyo,
naku nũmanengae lĩu woo ĩvindanĩ yĩla yaĩlĩte.
16Nũkũnzũaa ũvĩ waku,
na kwĩanĩsya vata wa syĩndũ syonthe ila syĩ thayũ.
17Mwĩai Ngai nĩ mũlũngalu nzĩanĩ syake syonthe,
na e tei mekonĩ make onthe.
18Mwĩai Ngai e vakuvĩ na onthe ala mamwĩkaĩlaa,
ala mamwĩkaĩlaa na ũw'o.
19Nĩwĩanĩasya mavata ma ala mamũkĩaa;
nĩwĩw'aa kĩĩo kyoo na aimatangĩĩa.
20Mwĩai Ngai nũsũvĩaa onthe ala mamwendete,
ĩndĩ akamina ala athũku.
21Ngataĩaa Mwĩai Ngai kĩla ĩvinda;
syũmbe syonthe nitaĩe ĩsyĩtwa yake ĩtheu tene na tene.
Currently Selected:
Sav 145: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
