Sav 144
144
Mũsumbĩ Aitũngĩa Ngai Mũvea nũndũ wa Ũsindi
Savulĩ ĩno yaandĩkiwe nĩ Ndeviti.
1Nĩataĩwe Mwĩai Ngai mũsũvĩi wakwa,
ũla ũmanyĩasya moko makwa kaũ,
na kũmanyĩsya syaa syakwa kũkita.
2Nĩ Ngai ũmbendete na nĩ we wĩvitho wakwa,
mũsũvĩi wakwa na Mwovosya wakwa,
ngao yakwa vala nĩvithaa,
ũla ũsindaa andũ nĩ kana methĩwe ungu wakwa.
3 #
Yovu 7.17-18; Sav 8.4 We Mwĩai Ngai, mũndũ nĩ kyaũ ũũngane nake;
o mũndũ ũsũanĩe ĩũlũ wake?
4Mũndũ no ta mĩthũmũ;
matukũ ma thayũ wake no ta muunyĩ ũvĩtĩte.
5Ame Mwĩai Ngai vingũa matu maku noitheea,
kiita iĩma nĩ kana itoe syũki.
6Tuma ũtisi ũtisa na ũinyaĩĩkya amaitha;
ĩkya maangi maku na ũimathokoany'a.
7Tambũũkya kw'oko kwaku kuma ĩũlũ,
mbonokye na ũindangĩĩa kuma kĩw'ũnĩ kingĩ;
kuma ũtonyinĩ wa andũ ma nthĩ ĩngĩ,
8ala maneenaa ũvũngũ,
ala mokĩlasya kw'oko kwa aũme makũsĩĩe ũvũngũ.
9Ame Ngai ngakwinĩaa wathi mweũ;
ngaũkũnĩa ngitaa nene ya ndii ĩkũmi na ngĩkwinĩa.
10Nue ũtumaa asumbĩ masinda,
na kũtangĩĩa mũthũkũmi waku Ndeviti kuma kaũnĩ mũnene.
11Ndangĩĩe kuma kwa amaitha makwa athũku;
mbonokye kuma ũtonyinĩ wa andũ ma nthĩ ingĩ,
ala maneenaa ũvũngũ,
ala mokĩlasya kw'oko kwa aũme makũsĩĩe ũvũngũ.
12Ana maitũ ũikanĩ woo,
methĩwe mailyĩ mĩmea yĩanĩte yĩna vinya,
na eĩtu maitũ mayĩthĩwa mailyĩ ituĩ syasũvĩtw'e,
syanakavye nyũmba ya kĩ-ũsumbĩ.
13Makũmbĩ maitũ makausũw'a,
nĩ mosyao ma kĩla mũthemba;
malondu maitũ masyae na kwongeleka,
matw'ĩke ngili mbingĩ isesinĩ sitũ.
14Ng'ombe sitũ nisyaane singĩve,
vate kũvuna kana kũlea kũsyaa;
kũikew'ĩke kĩĩo kya kũthĩnw'a nzĩanĩ sya ndũa sitũ!
15Nĩ aathime andũ ala makwataa moathimo ta asu;
nĩ aathime andũ ala Ngai woo nĩ Mwĩai Ngai!
Currently Selected:
Sav 144: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
