Sav 143
143
Mboya ya Kũkũlya Ũtethyo
Savulĩ ĩno yaandĩkiwe nĩ Ndeviti.
1Ame Mwĩai Ngai ĩw'a mboya yakwa,
tea kũtũ wĩw'e kwĩsũvana kwakwa.
Ũĩkĩĩkunĩ waku na ũlũngalunĩ waku nzũngĩe;
ũĩkĩĩkunĩ waku nzũngĩe!
2 #
Alo 3.20; Aka 2.16 Ndũkanzilĩle nyie mũthũkũmi waku,
nũndũ mbee waku vai mũndũ mũlũngalu.
3Mũmaitha wakwa nũngatĩĩe,
na akanzinda vyũ;
Nũmbĩkalĩtye kũndũ kwĩ kĩvindu,
na nĩilyĩ ta ala makwie tene.
4Kwoou nĩnĩendee kũkw'a ngoo,
ngoo yakwa yĩna kĩũũyũ.
5Nĩngũlilikana mĩthenya ya tene;
nĩngũsũanĩa meko maku onthe,
nĩngũsũanĩa mũno maũndũ onthe ala wĩkĩte.
6Nĩngũkũkĩlĩlya moko makwa ngĩvoya;
thayũ wakwa wĩ na waũni waku,
o tondũ nthĩ nyũmũ yĩthĩawa na waũni wa kĩw'ũ.
Sela
7Ame Mwĩai Ngai nzũngĩe mĩtũkĩ,
ndi na wĩkwatyo o na vanini.
Ndũkambĩvithĩle,
ndikese kwĩkala ta ũmwe wa ala maendaa Ĩimanĩ ya kĩkw'ũ.
8Kĩla kwakya mbonasye wendo waku ũtaolekaa,
nũndũ nue nĩkwatasya.
Manyĩsye nzĩa ĩla naĩlĩte kũatĩĩa,
nũndũ mboya syakwa syũkaa vala ũĩ.
9Ame Mwĩai Ngai ndangĩĩe kuma amaithanĩ makwa,
nũndũ nĩvithaa nthĩnĩ waku.
10Manyĩsye kwĩka kwenda kwaku,
nũndũ nue Ngai wakwa,
Veva waku mũseo nũndongoesye nzĩanĩ ite mĩisyo.
11Ame Mwĩai Ngai ndangĩĩe o tondũ wathanie,
ũlũngalunĩ waku mbumye thĩnanĩ!
12Kwondũ wa wendo waku ũtaolekaa veta amaitha makwa;
mina onthe ala manthĩnasya,
nũndũ nyie nĩ mũthũkũmi waku.
Currently Selected:
Sav 143: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
