Nth 5
5
Kwĩsũvĩana na Ũlaalai
1Mwana wakwa, ĩthukĩĩsye ũĩ wakwa,
tea kũtũ kwaku wĩw'e ũmanyĩsyo wakwa,
2nĩ kana ũsũanĩae maũndũ ala maĩlĩte,
na ndeto ila wĩneenaa ikoonanasya kana wĩ na kĩlĩko.
3Ilomo sya mũndũ mũka kĩlaalai syĩ mũyo ta ũkĩ wa nzũkĩ,
na ũneeni wake nĩ mũtendeu kwĩ mauta.
4Ĩndĩ mũminũkĩlyonĩ e wũũ ta kĩluma,
nĩ mũĩ ta ũvyũ mũĩ ngalĩko syelĩ.
5Maũũ make matheeaa kĩkw'ũnĩ,
matambya make maatĩĩaa nzĩa ya kũthi vala maveva ma ala akw'ũ mekalaa.
6Ndasũanĩaa ĩũlũ wa nzĩa ya thayũ;
nzĩa syake nĩ nthyoeku, ĩndĩ ndamanyaa ũu.
7Kwoou yu ana makwa, mbĩthukĩĩsyei,
na mũikaatie ndeto ila ngũmũtavya.
8Ĩkala vaasa na mũndũ mũka wa mũthemba ũsu,
ndũkatate kũthengeea mũomo wa nyũmba yake.
9Walea kwĩka ũu ũkaasya ndaĩa yaku;
ũkaaĩsya myaka yaku kwa andũ mate tei.
10Aeni makoosa ũthwii waku w'onthe,
na kĩla ũthũkũmĩe kĩkatw'ĩka kya mũndũ ũngĩ.
11Mũminũkĩlyonĩ wa thayũ waku ũkesa kũĩa mũno,
yĩla nyama syaku na mwĩĩ waku ikathela.
12Ũkaneena wasye, “Namenete ũmanyĩsyo mũno,
na ngoo yakwa yavũthĩtye ũkany'o mũno!
13Ndyaaĩthukĩĩsya amanyĩsya makwa,
kana ngatea matũ nĩw'e atai makwa.
14Yu ngilĩlye kũthela vyũ,
nĩ katĩ wa ĩkomano ya andũ onthe.”
15Nyusaa kĩw'ũ kuma kĩthimanĩ kyaku mwene,
kĩw'ũ kĩseo kĩla kĩvĩtaa kuma kĩthimanĩ kyaku mwene.
16Nĩkũlya, nthongo syaku nĩsyaĩlĩte kũnyaĩĩkĩa kĩla vandũ,
tũlũsĩ twa kĩw'ũ kũnyaĩĩkĩa malelũnĩ?
17Kĩthima kĩu nĩ kyaku wĩ weka,
ndwaĩlĩte kũkĩtũmĩanĩa na andũ angĩ.
18Nthongo yaku nĩathimwe,
na ũitanĩa kĩveti kyaku kĩla watwaie wĩ wa mũika.
19Nĩ kyanake ta ndaatai, na nĩ kyendeeasya ta ngondi;
eka nondo syakyo ikwĩanĩae mavinda onthe,
na ũitanĩthaw'a mavinda onthe nĩ wendo wakyo.
20Mwana wakwa, nĩkĩ ũũtanĩthw'a nĩ kĩveti kĩlaalai?
Nĩkĩ ũũkumbatĩlya kĩthũi kya kĩveti kĩte kyaku?
21Mwĩai Ngai nĩwonaa mĩendele ya mũndũ,
na nũsiasya nesa nzĩa syake syonthe.
22Maũndũ mathũku ala mũndũ mũthũku wĩkaa nĩmamũkwatasya,
na ndii sya naĩ yake nimwovanasya.
23Akusaa nũndũ ti mũmanyĩsye,
na kwaa nũndũ wa ũtumanu wake mũnene.
Currently Selected:
Nth 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
