Nth 4
4
Ũseo wa Kwĩthĩwa na Ũĩ
1Ana makwa, ĩthukĩĩsyei ũtao wakwa nyie ĩthe wenyu,
teai matũ nĩ kana mũkwate ũmanyi,
2nũndũ nĩngũmũnenga ũmanyĩsyo mũseo;
mũikalee momanyĩsyo makwa.
3Yĩla naĩ kamwana kanini nĩ mũsyĩ kwa ĩthe wakwa,
no inyie nĩ nyioka naĩ kana ka inyia wakwa.
4Ĩthe wakwa nĩwamanyĩasya akambĩa atĩĩ,
“Kwata ũlũmye ndeto syakwa na ngoo yaku yonthe,
kwata mĩao yakwa, na ũkekala thayũ.
5Ĩthĩwa na ũĩ na ũyĩthĩwa na ũmanyi;
ndũkaaũlwe kana ũlee kwĩka ũndũ ngũkwĩa.
6Ndũkaaeke kwĩthĩwa na ũĩ,
naw'o ũkakwĩkalasya;
enda ũĩ naw'o ũkakũsũvĩaa.
7Kwĩthĩwa na ũĩ nĩ ũndũ mũnene, kwoou ĩthĩwa na ũĩ;
enda kwĩthĩwa na ũmanyi mbee wa syĩndũ ila ingĩ syonthe.
8Ũnenevye, naw'o ũkakũnenevya;
ũkumbatĩlye, naw'o ũkakũnenga ndaĩa.
9Ũkakwĩkĩa ngovia mbanake mũtwenĩ waku;
ũkakũnenga ngovia mbanake ya kĩ-ũsumbĩ.”
10Mwana wakwa, ĩthukĩĩsye,
ĩtĩkĩla ũndũ ngũkwĩa nĩ kana wĩkale thayũ myaka mingĩ.
11Nĩnakũmanyĩsya nzĩa ya kwĩthĩwa na ũĩ;
nĩnakũtongoesya kũmanya kwĩthĩwa wĩ mũlũngalu.
12Yĩla ũendete, ndũkasiĩĩawa nĩ kĩndũ,
na yĩla wasemba, ndũkaluluutĩkaa.
13Kwata ũmanyĩsyo ũlũmye, ndũkaũlekye;
ũsũvĩe, nĩkwĩthĩwa nĩw'o thayũ waku.
14Ndũkaatĩĩe nzĩa ya ala athũku,
na ndũkaatĩĩe mũendele wa andũ avuku.
15Athũkĩa nzĩa ĩsu, ndũkamĩsĩle;
mĩtie na ũiendeea na mbee.
16Nĩkwĩthĩwa andũ athũku maikomaa matekĩte ũndũ mũthũku;
mailĩkawa matambĩte kũtuma mũndũ avalũka.
17Nũndũ kwĩka ũthũku nĩw'o lĩu woo,
na ũng'endu nĩw'o ndivai yoo.
18Ĩndĩ nzĩa ya ala alũngalu nĩ ta kyeni kya kũikya,
kĩla kĩendeea kũkena mbeange nginya kũkakya vyũ.
19Mĩendele ya andũ athũku nĩ ta kĩvindu kĩkamu;
mayĩsĩ kĩla kĩmaluluutĩkasya.
20Mwana wakwa, ĩthukĩĩsye nesa ndeto syakwa,
tea kũtũ kwaku wĩw'e ndeto syakwa.
21Ndũkaaieke syume vala ũĩ,
syĩkalye nthĩnĩ wa ngoo yaku.
22Nũndũ nĩsyo thayũ kwa mũndũ ũla ũikwataa,
na nĩsyo ivoasya mwĩĩ w'onthe wa mũndũ.
23Sũvĩa ngoo yaku wĩyumĩtye vyũ,
nũndũ nĩyo kĩthima kya thayũ waku.
24Ndũkaneenae ndeto sya ũng'endu,
na ndũkaneenae ndeto nthũku.
25Ĩkalaa ũsyaĩtye mbee ki,
na ũyĩkalaa ũsyaĩtye maũndũ ala me mbee waku.
26 #
Aevl 12.13
Sũanĩaa nesa nzĩa ĩla ũkwĩsĩla,
na maũndũ maku onthe makeethĩawa me maĩlu.
27Ndũkaathũke ũtee ngalĩko ya kw'oko kwa aũme kana kwa aka;
ndũkaalike ũndũnĩ mũthũku.
Currently Selected:
Nth 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
